2010年12月31日 星期五

定食Doraya

每逢一諗起魚生飯,必定第一時間諗起兩間,一間係雪村,另一間係定食Doraya,兩間價錢實惠,質素上乘。好耐都無去定食Doraya了,今天專誠去品嚐一番,第一次到旺角店享用,平常都是到尖沙咀或銅鑼灣店,這間店比另外兩間少人,入座時間已經係7:00有多,都只有幾枱客,呢個時間,銅鑼灣可能已經坐滿。這裡主打吞拿魚刺身,無論赤身、中Toro,大Toro都有,味道好濃郁,而且非常新鮮。

雖然大魚腩位非常吸引,可是這裡的燒吞拿魚扒更加吸引,將一大塊魚扒輕輕烤一烤表面,將多餘的油分烤出,內裡亦然係生的,感覺內冷外暖,令魚扒更加清新,咬落魚油不斷滲出,非常鮮甜,配上特製的甜醬汁,食多兩碗飯都唔嫌多。


2010年12月30日 星期四

楊記麵家

蝦籽麵係香港是一款好出名既麵食,有好多專賣蝦籽麵既麵舖,可只是賣蝦籽撈麵的,相信只得這間,這間楊記麵家正是沾仔記的姊妹舖,店內幾乎只賣撈麵,因為每位客人入內都只會叫撈麵食。

這裡的餐牌與沾仔記簡直同一個餅印,那個精緻既餐牌已經列出所有食物同飲品,全店都只得十款八款野食。這裡的撈麵底分左蝦籽撈、魚香撈同剩撈,可以選擇配料,有牛肉、鵝腸或牛柏葉,每款撈麵都會附上特制的上湯來食。


蝦籽牛柏葉撈麵如街坊口中評價般美味,雖然牛柏葉切得細碎,無論對口感同質感都扛了折扣,可是正正因為切得細碎,每條牛柏葉都附上了美味的蝦籽,使本身沒有味道的牛柏葉加添了一份美味。金黃的蝦籽鮮味十足,配上本身附上的蔥絲,更加美味。不能錯過的一定是那碗大地魚湯,湯的顏色比起出面的麵舖深色不知多少倍,未入口,已經聞到了那股濃郁的魚味,一喝下去,澎湃的魚味一湧而出,沒有這碗魚湯,那碟撈麵都變得平凡了許多。


另一個我喜歡的食物是鵝腸,這裡有賣鵝腸撈,今次點了魚香撈,魚香撈即是由蝦籽轉用大地魚粉,魚粉質地偏硬,比起蝦籽那份軟滑細緻的質感失色許多,鵝腸沒有肥膏,不過都爽脆,只是這個配搭,沒有想像般美味。


這裡賣的油菜與沾仔記一樣,每天只供應一款菜,人像我這種唔鍾意食菜芯的人就沒有Order了。

這裡的蝦籽撈麵真係無得頂,得閒要去食番碗先得。

地址:灣仔軒尼詩道219號地下




2010年12月29日 星期三

華姐清湯腩

清湯腩好多人都食過,可是唔係間間都咁好食,由其是特別出名那些,偏偏這間就例外,而且更勝過那些名店,每日門口總是排著一條長長的人龍,入面每人都食著清湯腩既麵。華姐這個名字與大利從不間斷,有千絲萬縷的關係,兩間平排而開,活像一對門神般守護著天后的清湯腩生意。

這裡的清湯腩,湯底清澈,味道鮮甜,燉煮的時間和火喉真是十足,那坑腩肥瘦適中,肥位甘香,瘦位軟稔,兩者相間,滋味非常。今次叫了肥腩,當食完所有肥腩後,整碗湯都要一併乾下,十分滿足。這天加了菜飯,令我更加飽肚,菜飯都ok,唔會油淋淋的。


除了清湯腩之外,不能錯過那碗腩汁蘿蔔,清甜無渣,用上湯去炆煮,將所有湯既精華滲入蘿蔔內,使蘿蔔更加好吃,價錢都只是賣十元一碗,食夠兩碗都係20元,抵食。而且其他食物都不錯,價錢都十分相宜。


而且可以選配伊麵底,一碗瘦腩配伊麵,真的是非常好的一餐。特別要讚的是伙記態度親切,完全沒有架子,會主動招呼,收拾碗碟時都特別小心,完全顧及客人的衣物,真的十分細心。


香港咁多間之中,清湯腩都可算是表表者,山長水遠都必定要來一試。

地址:天后電氣道13號A地下


2010年12月28日 星期二

泰姐廚房

食泰國菜首選係九龍城,所以都甚少去其他區品嚐,可是這間卻是我專誠黎食的。泰國菜其實都有分北方同南方,泰姐廚房這間主打泰北菜,其實我都唔識分北方定南方,只知道好似其中一邊係辣些的。

從餐牌中order了一個沙律、一個菜同一碟炒金邊粉。軟殼蟹青木瓜這個沙律無論從外表或材料都表達唔出原來係咁辣,軟殼蟹炸得鬆脆,粉漿上得剛剛好,而青木瓜絲則非常爽脆,唔太酸,是微酸那隻,配合起蘿蔔絲、蕃茄及一些香料,那些辣味慢慢從中滲出,實在美味。


這碟驟眼看,以為是炒荀,其實黃色一條條貌似薯條的是椰子芯,即係椰子樹內最嫩的那部份,換言之,一棵榭都唔會可以做得出好多碟,所以算是比較罕有的食材。椰子芯配以鮮蝦來炒,味道ok,椰子芯的口感同荀無分別,可能都係同一類材料,爽爽脆脆,卻沒有竹荀那股苦澀味道,並帶少少甜味。


最後點了泰式炒金邊粉,炒得唔太乾,又唔太濕,岩岩好,材料亦夠多,蝦、魷魚、魚片同蛋絲,是一碟好好味的炒金邊粉。


兩人各自order了飲品,我那杯青檸沙冰很適合今天的食物,酸酸甜甜,可以更加食出食物的鮮味。


整體來說,真是一間值得幫襯的泰國菜。

地址:天后電氣道80號地下



2010年12月23日 星期四

細妹姐小廚

印象中好似第一篇食評離開香港同九龍區,以後會慢慢向北搵食,經同學介紹,去了荃灣二坡坊的一間大排檔式飯店食飯,我地一行十數人,被安排到隔壁空置舖位坐下,個感覺勁似九龍城的食肆般,左穿右插。

這一餐十分經濟,總共叫了十幾個餸,都只係每人一百蚊左右,特別推介呢到既鵝腸,用上新鮮有肥膏的鵝腸,現在十間有九間都轉用了急凍鵝腸,沒有了那粉粉的肥膏,失去了原有的口感。這間舖是一間以賣潮式和小炒經營的大排檔,所以咩都有得食。

最快來到的一定是打冷既食物,起初只是叫了鹵水拼盤及鵝片,因為好味的關係,之後再叫了一碟大腸拼墨魚,鵝片肉質滑溜,大腸鹵得非常入味,墨魚爽口易咬,靈魂所在正是鹵水汁,雖然唔係非常出色,可是都有一定的水準。


見到有辣酒煮東風螺,同學想食,可是又唔食得辣,轉了叫白灼東風螺,味道好鮮甜,但是Size比較細粒,如果可以大粒些就好了。


食完頭盤,當然開始食一些更加濃味的小菜,這裡的黃金蝦味道唔錯,不過唔夠脆身,d殼唔容易咬開,蝦身size適中,唔會過大。


炸大腸不過不失,夠脆身,而且洗得好乾淨,沒有異味,應該是用了急凍大腸。椒鹽九肚魚功夫到家,外層鬆脆惹味,內裡軟滑。潮州菜不得不提蠔餅,整得OK,不過略嫌不夠脆身,而且好明顯係用左雞蛋,而不是用鴨蛋,可是蠔仔份量多得驚人,差不多每啖都有蠔仔在內。


另一惹味小菜,鑊仔吊燒汁鱔球非常之正,油泡功夫上乖,之後再用煲仔炆後,更加好味,鱔肉非常新鮮結實,而且份量頗多。


籠仔荷葉蒸鴛鴦雞,固明思義是用荷葉包著來蒸,材料有冬菇、雞、同田雞,蒸出來之後,兩者都是鮮味十足,雞肉可能有少少過火,不是太滑,可是田雞卻剛剛好,極之滑溜,調味得宜,吃得到有淡淡既荷葉清香味道。


絕對推介這兒既豉椒炒鵝腸,鵝腸用上新鮮鵝腸,每條鵝腸都黏著肥膏,食落有粉粉既感覺,實在難得,而且與豉椒同炒,味道惹味,食完一條又一條,不能停口。


食左咁多肉,當然有叫蔬菜,叫了一個馬拉盞啫芥蘭和一個手拍蒜蓉炒菜心,先講馬拉盞啫芥蘭,又是一道鑊氣十足,惹味之作,內裡還加有咸肉,好快就俾人消滅了。另一是菜心,可是這裡做錯了,都是用上芥蘭,不過唔緊要啦,都炒得唔錯,幾稔身。最後還叫了一大鍋蠔仔肉碎粥,好鮮甜的味道,而且蠔仔也如蠔餅一樣,份量頗多。


是晚消費實惠,個個都可以捧著肚子回家,實在是一間唔錯既大排檔式舖頭。

地址:荃灣眾安街89號二坡坊地下G舖







2010年12月22日 星期三

Weinstube

最近,對德國食物特別感興趣,經常都會去尋找德國佳餚的餐廳,發現尖沙咀一帶真的佈滿了這類餐廳,今次這間雖然唔係德國餐廳,是奧地利餐廳,可是原來食物款式同德國真係相差無幾,都係食腸、豬手和薯仔之類。

這間餐廳位於亞士厘道的一幢舊樓內,絕對不起眼,唔向上望都睇唔到有個大招牌,實在行過都唔知已經過左個樓梯口。餐廳本身是一間酒吧,左手邊係一列吧枱,行入去是一排排的座位,空間比較焗促,但係帶給一些熱鬧既氣氛。

這裡賣的是麥啤,當然叫了至喜愛既麥啤,入口順滑,夠冰凍,淡淡既味道正好中和濃烈既德國菜味道。朋友也叫了另一款支裝麥啤,味道比較甘一些,而且顏色都深一些。


4個人總共order5碟野食,原來呢到d野食都非常之飽肚。主菜未黎之前,每人都會有一碟麵包配上牛油,所以兩個人絕對唔岩黎食。




首先上枱的是炸磨菇,磨菇隻隻都好大隻,外層非常鬆脆,一咬開即刻滲出磨菇的鮮甜味道,好新鮮,點上他他汁,實在是一碟好好既佐酒小吃,不過十分奇怪,數量竟是7件,真係好少見到呢個數字既份量。




之後輪到雜腸拼盤,對著那些麥當當式薯條十分沒趣,為何是這樣的薯條,薯條凍左已經唔好食架啦,仲要係呢款幼薯條,更加難食。雖然薯條唔吸引,可是雜腸拼盤卻令人垂涎欲滴,本人十分支持最近薯條的白色腸,我估計應是香草豬肉腸,味道濃烈,有好香既香草味,而且質地比較結實。其實我地各有所好,有朋友鍾意最淡味的雞肉腸(右邊起第三條),也有朋友鍾意食早餐腸(左邊起最細的腸),每款腸味道都唔同,做腸既肉類都有不同,有豬肉、牛肉、雞肉,味道有濃有淡,整體來說,都好好味的,比bierxxxxxx更好食。




豬手肯定是必叫貨色,然而不十分出色,可能係唔鍾意食太硬既豬皮啦,我鍾意鬆化少少,這隻要用好大力先咬開,可是味道卻幾好,而且隻豬手已預先分解好,抵讚,方便進食,配菜有酸菜及煮薯仔,酸菜十分好味,咸咸酸酸,可以消減豬手的肥膩,另外薯仔則普通了一些。




終於等到主角上場了,我來這的目的正是為了這個Raclette Cheese,是一盤烤芝士,熱辣辣既軟溶芝士,用上酸瓜、蕃茄及烚薯作配菜,原來將一少份芝士放上酸瓜同吃,味道真係天衣無縫,咸香既芝士加上酸度十足既青瓜,令人有一股清新自然既感覺,可是配上薯仔則大打折扣了,變得十分滯悶既感覺。




最後上枱的是另外Order的洋蔥煙肉炒薯仔,其實是幾好食的,可是因為太大舊的關係,味道唔夠入味,如果用一片片薯片來炒會更好,而且炒得燶些會更好味。




整晚菜式也是不錯,單單一盤烤芝士,已經令我們欣喜萬分,每人也捧著肚皮走出餐廳,覺得是一間值得推介的餐廳。

地址:亞士厘道22號好利時大廈1樓

2010年12月21日 星期二

明洞Express

講起快餐店,大家都第一時間諗起大家樂、大快活和美心MX之類的名字,可是現在有些快餐店慢慢轉變成走高尚路線的Café,最好例子必定是麥當當啦,開出一條新lineMcCafe,慢慢轉變自己既銷售路向。但偏偏就有一些餐廳寧願做快餐,也不願轉做餐廳,可能同人手既安排有莫大既關係,尖沙咀有一間韓國快餐,以前都有幾間分店的,現在好似都沒有了,這間正是明洞express

全自助形式,出去買飛、拎餐、飲水都係自助形式,有趣的是,買完食物後,會有一個電子牌俾你,但係佢又唔講有咩用,好多人都唔知做咩,唯有拎住去等,顯示屏上有一批數字,不過完全都唔知點解,間唔中不斷聽到響聲,但係又唔知係唔係出去拎餐,個氣氛真係好攪笑,最重要係個經理聽到隔離位客人的牌響,個客人又唔知做咩事,佢都唔出聲叫客去拎餐,通常都係d客等得耐去櫃位問先有無野拎,根本無乜人知個電子牌就係通知牌,見到一個熱辣辣既石頭飯,客人唔知道,攪到拎番去時已經凍哂。

不過話明自助形式,都唔可以理咁多架啦,唯有自己傻仔d,一響即刻撲出去問啦。哈哈。我order了一份特級牛肋骨定食,有前菜、湯同主菜連飯,這份定食十分有趣,有一堆咖哩薯仔、一堆用茄汁淋上面既沙律、一份已切好既牛肋骨肉同白飯,唔明點解可以將佢全部擺埋一齊。咖哩薯仔味道幾好,用黎撈飯真係絕配。而個茄汁撈沙律,只是在青瓜絲及菜絲上面淋了茄汁,都算幾fresh,味道只是一般。可是牛肋骨肉就真的非常美味,肉味濃郁,質地鮮嫩,醃得入味,唔會過熟,十分出色之作。除左主菜外,其餘的就麻麻地,湯幾清甜,好重雞味,前菜則普普通通。


另外,石頭飯就評價唔錯,今次選擇了牛肉,由於朋友唔食辣,佢無加辣醬去撈,失色不少,可是味道都幾好,材料十分充足,朋友仲嫌太多配菜添。


有段小插曲,就係個經理十分不友善,搭枱都算啦,仲要叫人搬黎搬去,又唔肯主動幫客人,只是不斷去迎接新客人,另一方面又不斷用行動同表情去驅趕客人,一食完,已叫人收走枱面的餐盤,差d連杯水都要收埋。此時,佢通常都會企係枱邊等人走,這種態度真係不要得。雖然這樣,這裡的價錢真的比平常韓國舖頭平一大截,一個餐都只是80或以下,十分抵食,但首要條件是預左食完會俾人趕。

地址:尖沙咀金巴利道64-66A順輝大廈3號地舖



2010年12月20日 星期一

意粉屋

現在天氣轉冷,當然係打邊爐既好時間,但係平時港式火鍋就食得多,間唔中都要轉下口味,今次就去意粉屋試一試佢個芝士火鍋,這個芝士火鍋雖然不太正宗,不過起碼令今年未食過芝士火鍋既我興奮。

意粉屋今年都不例外,推出兩款味道既芝士火鍋,有經典及黑松露味道,而且可以選擇普通版、燒牛肉拼盤或海鮮拼盤,價錢大約在21X-28X左右,另可加錢追加配料和芝士汁。


2010年12月19日 星期日

榮耀辦館

今篇其實好特別,只是講一間唔太起眼,或者應該咁講,係行過都唔會留意既舖頭仔,佢叫榮耀,位於土瓜灣木廠街,佢係一間小辦館,兼賣砵仔糕、雞蛋仔同夾餅的,賣左不知多少年月,我中學嗰時,經常放學就去買黎食。


這間小舖既雞蛋仔同夾餅賣得十分之平,只是8蚊一底,暫時到過既地方所見,都未有一間咁平,平均都要10-12一底,利強記要賣成13蚊一底。好多人可能講,平野無好,可是這間既出品都唔錯,雞蛋仔有蛋味,仲好飽滿,外皮係脆既,內裡則軟綿綿,而且甜度剛剛好。



另外,夾餅都好好食,而家好多地方既夾餅都只係搽花生醬、牛油同煉奶,但係呢一間仲加埋砂糖,多一份食沙既口感,唔錯。


大家如果行過,不妨買一底試下,叫老闆即做,熱辣辣仲好食。

地址:土瓜灣木廠街(工聯會旁)


2010年12月18日 星期六

明珍美食

香港人對食既要求其實都幾高,一盅兩件源自廣州,以前是有錢人才可享有的高尚食物,但現在都已經平民化,而且必定是港人既驕傲,因為港人做的更出色。然而其中一樣食物既飽肚又好味,講的就是盅頭飯,款式十分多,有鳳爪排骨、北菇蒸雞及梅菜肉餅等等……

係土瓜灣落山道有一間賣盅頭飯賣到出哂名既舖頭,雖然外貌不揚,可是盅頭飯既非常出色,有好多人都會專盛到來購買回家享用,一到午飯時間,門口停泊了許多的士,這裡亦是司機們的眾腳點,價格便宜,食物美味。除左做街坊及司機們的生意外,甚至有時見到有很多外景車到來購買飯盒。


呢到既招牌係鳳爪排骨飯,鳳爪十分惹味,排骨更加非常美味,用了肥瘦度適中的,醃得入味,食落唔會嚡口,絕對係新鮮排骨。呢到吸引咁多人黎買,原因係佢既飯底,以蒸的方式去做,飯粒分明且煙靱,有好香既米味。兩者配合得宜,出來既結果就係日賣幾百盅的驕人成就。


除左鳳爪排骨飯之外,都仲有很多款式可以選擇,肉餅整得都好結實而不硬,原因也是用了新鮮肉整仄成,無論配上土魷或梅菜都令我姆指大動。而雞飯則比較普通,未食過呢到既盅頭飯的話,就不要試雞飯了。


如果想食呢到既盅頭飯,最好係上晝11點後至2點左右呢段時間,相對地夜晚以蒸餸為主,沒有太多盅頭飯可供選擇,白走一趟就不好了。


另外,呢個的雞頭大包真係好大個,食完一個都已經夠飽,餡料眾多,有臘腸、雞翼同肉等等……最重要的是都係幾蚊一個,十分抵食,味道都不賴。

我是這裡既長期支持者,間唔中都會特登買回家食,希望佢地水準唔會下跌啦。

地址:土瓜灣落山道1C舖地下