2010年11月30日 星期二

Cafe Express 咖啡亭(麗景酒店)(下篇)

老實講,呢間野食相對來講,款式真係比較少,因為個場地都好細。由於今期做緊蠔既主題,所以都有D特色既熱盤,例如焗蠔、炸生蠔同炒蠔等等,款式唔多,但都OK的,因為食生蠔同海鮮都差不多飽了。

但係整晚既熱盤內,有一樣係我一黎到就話要食既,就係RECELETTER Cheese,呢款芝士係需要係食個時,用發熱線慶溶d芝士,然後用刀刮落去餅乾到。味道咸咸地,又夠芝士味,十分正。


是晚所供應的兩款焗蠔分別係,巴馬火腿配水牛芝士及煙肉洋蔥,兩款都幾好味,不過就覺得煙肉洋蔥惹味d,除左焗蠔,都有一些如焗扇貝同青口,味道唔錯,似是用白汁焗。


熱炒有炒蠔同帶子,味道都幾鮮美,另外,比較喜歡炸蠔,炸得唔錯,唔會淋哂,但係好似refill得好慢,食左一次,都唔係幾見到有,仲有一個炸蝦,好似用左芋頭刨絲包住隻蝦再炸,呢個又係好好味的。


食完一輪熱盤之後,就轉攻燒牛肉,原本第一舊肉開頭第一塊時,切得好厚,變得唔好食,但係佢轉左另一舊肉之後,我要求薄切,即刻唔同哂,第一舊明顯熟過頭,呢舊岩岩好,有少少血水,鮮味同肉味都在,唔錯。羊架朋友話OK的,因為我唔食羊的。不過雞扒真係好好食,好Juicy,雖然係雪藏雞扒,可是個汁好好。


同場見到有肉醬意粉,見到好多人都有拎黎食,聽講仲幾好食添,不過我就無食到了。但係見到都唔錯,已經撈好,肉醬同意粉已均勻在一起。


熱盤過後,當然食甜品,每樣都試少少,貴精不貴多,但係都不是太出色,但係呢到有出面少有既macaroon,有紅色同黃色,但我朋友話裡面既餡並不是應有既味道,例如:紅色可能係紅桑子或者士多啤梨等等,可是呢到卻全部都用朱古力,我並不知道係唔係真係朱古力味,但經朋友一講,我又無明證既情況下,當笑話好了。


試了幾款cake,覺得blueberry cheese cake唔錯,另外那個木槺布甸都幾好,其餘好似都麻麻地,不過有個朱古力噴泉可以玩下。中式糖水有花生糊,都幾特別。


但係一講到拎coupon送既心太軟配雪糕,簡直令人眼前一亮,一亮既意思係眼火爆咁解,心太軟焗到可以變成brownie既質地,裡面無流心,係實心的,又唔太熱,個雪糕硬地擺左半個鐘都唔溶一下,好勁,可以掟死人。不過算啦,其他甜品都唔太差,都ok的。


我朋友最開心既係可以任飲支裝汽水。


整體黎講,呢到真係只可以為左食即開生蠔同海鮮而黎,其餘的沒有亮點,可食可不食,熱盤真係要睇下做咩主題了。

地址:尖沙咀赫德道8A隆堡國際麗景酒店1樓












2010年11月29日 星期一

Cafe Express 咖啡亭(麗景酒店)(上篇)

Buffet已經成為左我生活既一部份,每個月總要去食一次,今次就揀了係網上都幾出名既Buffet,就係麗景酒店既Cafe Express。這間酒店經由多人推介後,經常都爆場,今天都不例外,全場爆哂,但係其實呢到地方真係幾細,通道非常之窄,而且枱與枱之間都排得好密,我想這裡是全港最細既Buffet都唔過份。

到來主要目的,一定係為著生蠔而來,早早聽聞即開生蠔非常美味,所以特地約左一行好友到來品嚐,生蠔果然非常新鮮同肥美,當日總共出了四種唔同地方既生蠔,有法國、蘇格蘭、南非同紐西蘭四隻,不過係由於中途南非那款賣完了,再拿出了紐西蘭。


呢三隻係法國蠔,雖然Creamy,不過蠔味都好重,但係唔知點解好腥,第二轉就無咁勁,因為落了cocktail汁,佢個汁幾好味。但係呢款蠔係當晚無人食,可能真係比較腥的關係,到走時,仍然見到一大堆。


以上咁多幅都係南非、蘇格蘭同法國蠔,上圖最細個隻係南非,肉質鮮甜,creamy類。左邊係蘇格蘭蠔,味道清淡些,我覺得幾好食,而且係四款之中最大隻的,亦係全晚最快無哂既蠔種之一。


當蘇格蘭同南非蠔無哂之後,最尾推出既蠔款,即係紐西蘭蠔,蠔味濃,但係比較瘦削,所以都只係食少系,最尾個轉加了些少紅酒醋吊吊味。


海鮮類就比較遜色,可能少款,有兩款蟹腳、凍蝦、龍蝦仔、青口同翡翠螺,兩款蟹腳都好好食,以幼個款比較甜美,亞拉斯加那款都好味,多汁,翡翠螺好大隻,好爽口脆身,亦很甜美。


魚生款色少,不過質素幾好,三文魚都算肥美,不過吞拿魚好鬆散,鯛魚結實爽口,唔錯,壽司都做得幾好。


是晚供應兩款蠔cocktail,我覺得麻麻地,奇異果那款更加怪。


各款沙律都唔錯,我比較喜歡那個薯仔沙律,不過無影到相,朋友呢個青蘋果腸沙律,清一清味蕾都唔錯,夠哂酸,夠哂refresh。火腿咸香唔夠,就咁食,都唔會話太過咸,加左蜜瓜,反而食唔出火腿味,可能d蜜瓜太甜,煙三文魚好普通。個蝦小食,都幾好,用上芒果做汁醬,另一個吞拿魚配牛油果,唔睇個牌都唔知原來係牛油果。

為著生蠔而來,頭盤已食到飽了。



2010年11月28日 星期日

香河越南餐廳

好老實講,咩叫一山還有一山低,今次絕對表現出黎,而且如果唔係對呢間咁不滿,我都唔想寫呢間老字號。因為之前係我心目中,呢間雖然唔係好食,但係又未至於要俾黑面,但今次真係又要出動黑面,唉。

一入到舖,真係唔明,下層咁多位,職員又唔俾我地坐下層,要我地上上層,咁我地要求坐下面啦,佢又好似好唔忿氣咁,如果妳同我講下層俾人book哂位,我無野講,但佢又唔係。另外,可能我麻煩,要揀位坐,但好正常者,裡面有位,我相信好多人都唔會揀大門口位坐掛。


越式蒸粉卷,睇個賣相都好ok,但係一上枱,已發覺點解係凍既,味道算ok的,呢個已經係全晚最好食個樣了,本來諗住食完呢幾樣野,再落order的,但係食完呢個粉卷之後,未等黎緊既野食,已決定食完即走。


這個牛柳粒紅飯,我相信每間越式餐廳都有既飯都有可能整得好食過佢,牛柳粒應該充滿牛油蒜香味的,但係又係凍既,牛柳粒唔好食不特止,係超靱,真係少d牙力都咬唔開,真係無咩牛油蒜香味,紅飯都可以接受既,再睇下牛柳粒底下既生菜,真係咩胃口都無埋,好似用左好多次咁,乾巴巴又變黃,而且仲係有少少飳既,咩越南野唔係成日都用生菜架咩,估唔到連最基本既菜都處理得咁差。


最後黎個個仲不值一提,求求其其煎下d雞翼,上面擺d蒜蓉就叫蒜蓉椒鹽雞翼,而且仲有一隻係反轉擺,根本連出品都唔望一望就拎出黎,唉。連最基本既牛油雞翼都無,可能呢到覺得牛油唔需要寫出黎啦,不過真係食唔出有牛油味囉。

兩個字形容哂呢間舖,很差。可能我食唔中佢地d招牌食物啦。

地址:銅鑼灣波斯富街89號









2010年11月27日 星期六

The Flying Pan

要中國人接受食腸仔煎蛋多士做晚餐呢個觀念,真係比較難,晚上總要大魚大肉,有米落肚先得,可是外國人係唔會計呢D野既,所以All Day Breakfast就岩哂佢地心意。

The Flying Pan係少數只提供All Day Breakfast既餐廳,因為大部份係夜晚都會轉做酒吧,如果係香港呢個市場裡面,只做一種生意,真係會做唔住,偏偏呢間就屹立不倒。


今次為左Egg Benedict而來,因為覺得生熟蛋配上Holland Sauce真係美味無窮,加上一個小鬆餅,既飽肚,又實際,叫了Egg Norwaian,即係加上煙三文魚,呢到一D都唔吝嗇,有好大塊三文魚,剛剛好,咸味同鮮味增加了Egg Benedict既味道,好好味。餐內包兩個Side Dish,我揀了至愛既炒薯仔同蕃茄湯,薯仔炒得芳香撲鼻,洋蔥加薯仔產生化學作用,變成一味美味既飽肚食物,蕃茄湯有蕃茄蓉在內,鮮甜味美。


另一個餐係Biscuits & Gravy,個Biscuits並不是平時食開既餅乾,係一種類似,鬆餅同多士之間既餅食,咬落有多士既質感,鬆餅既牛油香味,上面放了一個白汁既肉醬,味道好似吞拿魚咁,但又唔係吞拿魚,實在好難形容,雖然好食,不過兩件食哂,真係有D油膩。蛋可以有多種選擇,今次揀選了炒蛋,唔錯,還有蛋汁在內,呢到既肉腸係好似漢堡既肉扒,不過質地硬硬地,唔係咁好,這個餐無論份量同飽肚度都達到頂級,所以要了個沙律去下飽滯。


每個餐都包一杯小果汁,果汁只是普通超級市場買到既盒裝或樽裝果汁。


枱上有一樽好吸引既士多啤梨果醬,好可惜我地點的餐沒有多士,唔係一定勁搽。同埋好多人都以為會唔飽,當食過之後,個個都話飽到食唔哂,間唔中食一次都好有新鮮感。

地址:灣仔駱克道81-85號霸田商業大廈3 樓



2010年11月26日 星期五

民聲冰室

今日終於黎到嚮譽全大坑既民聲冰室了,每次黎到大坑,第一件事就係行入黎,睇下多唔多人等位,可能今日我地早黎既關係,未有太多人等位,好順暢地等了十分鐘有位了。

雖然呢到地方細細,裝修顏色鮮艷,可是這是間擁有幾十年歷史既冰室。這間冰室並不似平常老派既冰室,這裡專攻家常小菜,每日十幾款菜,而特賣菜式非蒸肉餅莫屬,每枱必叫菜式,肉餅這個名字並不能貼切形容,因為一上枱,是一座小山丘,好多人都募這個肉餅塔之名到來。而這裡的餐牌非常有趣,用一塊大膠板寫上了當天的菜式,那塊膠板正正就是平常係茶餐廳掛在牆上的,是晚菜式包括蒸肉餅、羔蟹水蛋等等招牌菜在內十多款式。

蒸肉餅如早前所講,不能用肉餅來形容,用一個塔字來形容比較好,因為大大話話都有5-6吋高,最頂放上了一顆圓潤爆油既咸蛋黃,十分鬆化,而且味道鮮美,咸度剛剛好,用黎送飯或就咁食都同樣回味無窮,因肉餅內有足夠既肥肉,肉餅無肥肉就失去了應有既鬆化感覺,而且生粉也下得很少,沒有漿糊既感覺,完完全全超出了以往對肉餅既觀感。



2010年11月25日 星期四

Al Dente

Al Dente既意思係彈牙咁解,偏偏呢間意大利餐廳就用上呢個名字,唔通佢地D意粉真係咁彈牙?

一看餐牌,已經將招牌菜用框框起,令到食客可以從中挑選心水菜式,總共叫了小食、沙律、Pizza、意粉同主菜,大部份都係推介菜式之中。其實坐低一陣之後,已經會有一小籃麵包,侍應會問要唔要黑醋及橄欖油,麵包都幾好食。



2010年11月24日 星期三

Yamm (甜品篇)

食自助餐時,甜品永遠都會放到最後,因為一食甜品,就好少會再食咸既野,所以唔到最後都唔會去食甜品,幸好這裡的甜品不太吸引,如果唔係又要撐住肚皮走。可是有一亮點,就係即燒既焦糖燉蛋,有唔同香味既酒精,D火燒住上枱,十分好玩,不過有少少好睇唔好食。


大致上甜品都係普通貨色,不過比較特別的是這裡的介乎西式與中式之間既Fusion甜品,如椰汁龍眼肉黑糯米、班蘭西米布甸等等,味道真係一般,黑糯米煮得好淋,無左應有既煙靱質感,而且椰汁味唔太濃,食落有少少淡,其他杯裝甜品都唔太精緻。


但係呢到有Buffet好少供應既Macaron,有四隻味道,分別係士多啤梨、檸檬、綠茶及朱古力,以檸檬及朱古力味最好,前者酸味味的味道,正好中和了Macaron的甜,後者朱古力味濃郁,比較甜。最差肯定係士多啤梨味,甜到飲左幾杯水都散唔到,而且士多啤梨味道好假,綠茶普普通通。


另外,有樣好特別既甜品,叫做生果清湯,我無食到,因為佢係一大盤好似Fruit Punch咁,但係係透明的,唔知甚麼來的。雪糕用上Haagen Dazs,可是由於使用杯裝既關係,款式只有三款,士多啤梨、Cookies & Cream同咖啡味,但亦有好處,方便易拎,乾淨衛生。


整體黎講,自助餐質素幾好,唯是價錢比較貴,甜品唔太吸引,希望下次會有優惠做緊啦。




地址:尖沙咀彌敦道118號The Mira大堂




2010年11月23日 星期二

Yamm (熱盤篇)

頭盤之後,進入精彩既熱盤,今次既選擇唔多,不過勝在出色,好多都係即叫即煮,唔會好似平時咁擺係個熱盤內,吸到變哂味,變哂色,特別推介係鐵板燒同串燒爐,因為有肥美既鵝肝同芝士焗龍蝦。

即叫即煮檔有幾樣,右邊開始係即開生蠔,之後係刺身櫃台及天婦羅爐,跟住係鐵板燒,最尾係串燒爐,櫃台前都擺滿熱食,不過我無去試到,因為鐵板燒係至愛既鵝肝同龍蝦食。



鵝肝份量算大件,而且可以每次都要兩件,雖然要等一陣等佢煎,不過都係兩三分鐘,煎完外層脆口,內裡油份充足,無羶味,鹽下得剛剛好,不知不覺間都食了幾件,其實鐵板煎仲有牛肋骨肉配味噌汁、菇等等,味道好好,好正。


另外,沙嗲味道都幾好,呢到既芝士焗龍蝦,芝士味真係好重,蝦肉焗完之後,味道好香,食極都唔厭,總共食了幾隻。


另一大賣點係燒牛仔肉,火喉岩岩好,外層咸度適中,內裡肉質鮮嫩,有少少血水滲出,大約七成熟左右。燒牛肉最好梗係用一大條黎燒,精華所在在於中間個段肉,不過由於成本太高,而家好多地方都唔會用一大條黎燒,只用一小條來燒,可是呢到卻用一小條做出一大條燒既水準,真係出色,而且配上八款芥辣同醬料選擇,十分細心,醬料有英式芥辣、法式芥辣等等。


天婦羅炸得唔太好,當炸完食物,食物裡面仲有好多油未炸番出黎,由其是蔬菜,茄子滿口是油,蕃薯都有一層油係面,不過,隻蝦就好彈牙,而且炸得直,有水準既天婦羅蝦。

八爪魚丸都幾好,整左一陣就拎,所以外層既皮仲係好脆,內裡岩岩熟,幾好食。

其實仲有好多熱盤,例如牛仔骨,羊架等等,不過今次主攻冷盤同鵝肝之類,沒有空間去試。