2011年1月31日 星期一

龍鳳廚坊

龍鳳廚坊係我第一篇係Openrice得到讚賞的編輯推介食評,亦因此得到了許多人的認同及讚賞,所以對這間真的情有獨鍾。


再次到來此處,當然少不了食招牌菜,今次更加盡量食多D之前未試過既餸,今日一行六人,都叫左十一個餸,一個湯,味道依舊好味,完全滿足。燉湯依舊非常清甜,今次的豬肺終於是白色的了,沒有上次黑色的豬肺。

頭盤四個,分別係青瓜脆腸、醬拌茄子、虎皮尖椒及普寧鹽水炸豆腐。青瓜脆腸沒有下食用色素,白雪雪,爽脆清新,墊底的青瓜更加係鮮甜無比,配上特製的醬汁,令人一試難忘。

2011年1月30日 星期日

新興棧食家

天氣正值嚴寒,都係適宜去食粥,既可保暖,又可飽肚。繼新九記後,今次這間也是賣粥出名。係佐敦區內,賣粥的地方多不勝數,唔同款式粥都有,而新興棧就是魚粥界的表表者,一整條魚,由頭到尾都不用浪費地煮出了美味可口,芳香撲鼻的魚粥。由魚咀至魚尾皆有得吃,本人就至鍾愛魚雲拼魚卜,貪佢有嫩滑的魚雲之外,還有爽脆的魚卜,唔係好多地方有得供應架咋。

但今次例外,沒有叫到魚雲拼魚卜,原因是魚卜一早已經售罄,所以絕對係珍品。反而叫了魚雲拼肉丸,真得不要看少這裡的粥,材料極度豐富,實情是2:1既份量,2是指材料,1是指粥,一上枱,粥面已舖滿生菜絲,據講是可以下火的,因為魚既每一部份,都需要用油、酒、薑同蔥爆一爆才可以下粥去煮,既可以辟腥,又可以增添魚粥的鮮味。


2011年1月29日 星期六

忘不了拉麵小籠包

聽聞觀塘有一間新既商場叫東廣場,裡面有一間好出名專賣芝士蛋糕的舖頭,突登慕名而去,亦都係網上搵定晚餐的地點,發現有一間新既點心小籠包專門店,所以就專誠找朋友一齊去試,但這間拉麵小籠包令我非常失望,果然店名沒有改錯,忘不了。這個店名真的不能隨便亂用。店子雖然不大,但座位很多,證明d枱排到十分之擠迫,差點兒要背貼背,一句已道明了一齊,極度唔舒服。

食物方面味道尚算可以,但還有很多提升的空間。最出名的小籠包,真的非常薄皮及唔破,不過就算破了也沒有關係,因為沒有湯的,只有幾滴肉汁,但肉餡算幾鮮味,整體不俗,不過咁少湯的小籠包真係好少。


另一點心煎鍋貼,體積十分之細少,真的可以一口一隻,餡料與小籠包基本上一樣,只是加多了韭王之類的配料,煎的功夫都到家,有香脆的表皮,可是整體只可以話普通。


現在晚飯時段,每枱都會送麻醬粉皮,雖然有好香的麻醬味道,不過都係一般,我覺得加多兩條雞絲都會好少少,因碟粉皮只是每人一啖都食得完的size


最後,叫了一窩砂窩餛飩雞,喝下湯,有濃郁的味道,不過勁似史雲生清雞湯的味道,湯裡的菜肉餛飩如鍋貼一樣,都係同類餡料,從未試過三種不同的點心,可以有同一隻味道,果然物盡其用。不過最經典的是煲內的雞件,估計份量有四分之一隻雞,但雞肉的質地可以用擦膠來形容,真的非常貼切,這味餛飩雞絕對不合格。


開初食完小籠包都諗住再叫多d野食,但食完餛飩雞後,完全是想即刻埋單走人,不能再食了。途中有段小插曲,經理幫隔離枱執野時,隻腳不斷踢到我,第一次無心,算,第二次又黎,到第三次都係咁,佢居然無反應,如果佢覺得店舖細小,坐位迫夾是應份踢到人的,一句對唔住都無講過,所以我要將佢black list,永遠不再幫襯。再者見到OPENRICE那些食評,完住感覺唔到真係咁好食。

地址:觀塘成業街7號東廣場2樓201-202號舖


2011年1月28日 星期五

牛角日本燒肉專門店

最近,牛角大紅大熱,這間日式烤肉店位於九龍灣德福廣場二期內,每逢晚市人龍不絕,未到六時,門口已經排了數十人,準備拎籌。可是現在人氣急升到有過火的境界,未夠八時半,籌已經派發完畢。這天,我六時半到達取籌,門口的店員說大約一個半小時後回來差不多有位,朋友和我唯有到商場行一陣。八時左右回來,可是得到的結果是一半籌都未嗌到,我的籌號是A23,而回來時只是嗌到A11。如果以我平時的性格一定走了,可是我又真的想試一下是何方神勝,唯有同朋友堅持等待。直至九時十五分左終於可以進入了,門口等待的人各自也流露出羨慕的眼光,因為大家都等到呆哂。


2011年1月27日 星期四

沛公甜品

這時候的天氣寒冷,食糖水甜品都要考慮傾向一些熱辣辣既,絕對唔會食冰之類的甜品,所以咩綿花冰,雪花冰都要行開一邊,反而蛋糕、凍餅及熱既糖水就大行其道。沛公甜品以千層班戟做主打,雖然不是首創,不過對於現在呢個市場是缺少的一類。猶記得當年金龍船的千層芒果班戟,令我肥左不少磅數。但這裡豈止芒果一類,實在多不勝數。

千層班戟大約有十幾款,並不時推出新味道,以芒果、榴槤、曲奇及芝士最為熱賣,各款班戟皆有1215層皮,所以比一般班戟結實,不過內裡的忌廉軟滑無比,而且口感豐富,每類砌戟都適當地加入了新鮮水果或特別材料,令味道更上一層樓。每一層芒果班戟皆佈滿芒果肉,混在忌廉內也不失鮮甜濃香的芒果味。




榴槤千層班戟也是熱賣之一,榴槤肉夠creamy,氣味雖然不太濃烈,可是味道卻濃烈得很,喜好者必定喜歡,個人覺得比普通既榴槤更好味,忌廉同榴槤完全能結合。




青檸芝士千層班戟個口感特別,特別在於平時食芝士蛋糕時,一係硬既NY芝士蛋糕,一係軟既TRIMISU,但這個將兩者結合,成為既軟滑又有咬口既芝士蛋糕,令人一再回味。




比較讓人失望的是朱古力,雖然有香濃既味道,可是朱古力忌廉實在太溜,配上朱古力味皮,實在太甜,亦比較溜,可能是我不太喜歡這樣的朱古力味。




雖然沒有叫人氣推介既曲奇千層班戟,可是叫了法式栗子千層班戟,這份都係比較溜的味道,但卻比較輕盈,可能是栗子唔太甜,香味濃郁,令人感覺不太肥膩,所以這份都應是推介才對。




除左千層班戟外,有一個用班戟皮做的甜品,叫心花怒放,賣相一流,足見師父落足心機去製造,是一份以班戟皮包裹著芒果布甸,上面放了一朵用芒果片砌成的玫瑰芝,論賣相,真係無得頂,但論味道,即時給比了下去,芒果布甸味道超假,有好勁的芒果香精味,而且超甜,雖然班戟皮有助減低甜度,但都不足以有所幫助,唯一可喜的是芒果花的芒果肉不是用酸酸的芒果製造。




這裡有一系列以不同酒類燉製的甜品,我們一班人一口氣Order了四樣,分別是蔘鬚百合燉蘋果、菊花清酒燉雪梨、桂花酒釀燉雪梨及圓肉紅棗燉雪耳。四款甜品皆以精緻的燉盅呈上。蔘鬚百合燉蘋果有濃郁的花旗蔘味,味道特別,對提神正氣有一定幫助,是一味不可多得既養生甜品。




另一比較特別的是菊花清酒燉雪梨,相信甜品甚少至清酒入贅,先嚐一下,只有清香既菊花味,但拌了一下再嚐下,清酒味即時湧出,味道清新,令人一試再試。




而桂花酒釀燉雪梨都係屬於清新類型,更富酒味,食完整個人也暖粒粒。




最後,圓肉紅棗敝雪耳則比較普通,只可以說味道幾好,燉既火喉從顏色中可以見到,係清澈的琥珀色。




現在每逢到尖沙咀食飯,沛公甜品已成我的首選。

地址:尖沙咀寶勒巷1號玫瑰大廈地下E舖

2011年1月26日 星期三

泰好味

九龍城有很多間泰國菜館,除了泰式燒烤外,我對這間情有獨鍾,因為價錢實惠,有風味,而且食物質素高。而點解會係有風味,因為暫時環觀九龍城咁多間內,暫時只係得呢間需要係坐街邊,原因是店內只能容納兩至三張枱,有需要時,佢地會將dset係門口及隔旁的橫街內。現在正值寒冷季節,可以一邊食辣野,一邊吹住風,仲唔係有風味。

其實有無風味都係其次,最重要食物好食,而這裡正正做到大件夾好食,價錢比同區平了一至兩成。以生蝦刺身作例子,一般為70蚊一碟,而這裡只賣48一碟,價錢真的平了很多,而且質素幾好。

生蝦結實爽甜,咬落彈牙,自家製的酸辣汁更加係味道超正,超惹味,沾上少少已覺得辣,但又不能不沾,這辣汁正是令生蝦刺身味道昇華的導引。


2011年1月25日 星期二

源發潮州粉麵

繼雲興隆由牛下搬去淘大方向之後,其實有一間早已開了分店,二店合而為一,這間就是以賣蝴蝶腩及豬雜起家的源發。雖然這間已經經營了多年,可是食物水準卻沒有因有固定的地點而有所回升,絕對可以話係水準大跌。

首先係蝴蝶腩,以前係非常美味,肉汁甜美,嫩滑爽口,現在則不能比較,因一比之下,發現普通得很。另一招牌菜豬雜,幸好得以保存味道,沒有太大的退步。原因可能是事前處理功夫依然到家,烹調時沒有用太多汁料去煮,只以上湯灼熟,並且依舊用新鮮的豬內臟,所以沒有走樣。粉腸有粉之餘,仲鮮甜不苦。豬心爽脆有咬口,豬肚爽滑而不靱。

不過最可惜的是豬肺,以前是非食不可,現在是可以不食。而豬手就令我十分苦惱,明知水晶豬手是沒有甚麼味道的,可是偏偏想食,點知真的上了當,完全沒有味道之餘,亦比較硬。


由於水準下降的關係,現在都只是食其他的食物,例如煲仔飯、蠔餅等等,還記得上年這個時份,到源發食儻仔飯時,覺得整得非常之好,整個飯充滿飯香,而且飯焦亦都十分甘香,可是今年再嚐時,整煲飯沒有飯香之餘,還濕淋淋,完全不能起飯焦,排骨好似連醃味都慳番咁,無咩味道,腊腸好似發育不健全那樣,十分短少,煲飯已經比平常細煲,估唔到現在連味道都退步,唉!


反而蠔餅算是給了我驚喜,味道稱職之餘,還份量十足,蠔仔數量多,而且十分鬆化,是一個十分標準的煎蠔餅,總算在豬雜外,還有一樣食物令我滿意。


呢到另一個賣點是辣椒油,自家炒製,辣度有番咁上下,而且蒜味豐富,值得買一樽回家慢慢品嚐。

雖然對這間有不少失望之處,不過豬雜實在令我又愛又恨,膽固醇高又不健康,但偏偏好食的食物就是不健康的食物,而佢地所煮既豬雜又真的十分美味,所以我都唔會俾黑面佢地,保留番一個綠面。希望下次幫襯時,所有食物水準都所回升啦。

地址:九龍灣牛頭角道宏光樓12號舖


2011年1月24日 星期一

阿叔小廚

這段時間,不知是否食大排檔式野食上隱,經常尋找炒餸食菜的地方,今次就來到自己住但又不經常在此食飯的區域搵食,正正是觀塘瑞和街街市熟食市場,雖然位處偏僻,不過都有好多客人幫襯。

上到熟食市場,環境比想像中差,但又不是唔乾淨,只是地方比較舊,因為這個街市並沒有裝修過,仍然是以前那麼殘舊。LIFT門口那檔已坐滿客人,可是今次並不是去那間,而是需要再行入去的阿叔小廚。阿叔小廚並不是歷史悠久的,所以好多人都未必識。但主廚是曾經在北角東寶做廚的,所以味道一定番咁上下。

這裡有幾款招牌菜式,都是以前東寶的拿手好戲,再加上這裡的大廚另外創作的菜式,味道當然好味,成為了另一間隱世食店。其實我都只是看見雜誌介紹,突然慕名去試的。

這裡熱賣的菜式是狗仔豬手,煮法是以煮狗肉的方式去烹調,以南乳去炆豬手,味道濃香吸引,而豬手亦因炆煮良久,肉質鬆軟,稔滑可口,並且可以選擇菜底或河粉底,蔬菜索滿了南乳汁,更加好味,這味餸實在是一道送酒佳品。



2011年1月23日 星期日

恭和堂

近排食得太多熱氣野,真係要去清一清D熱氣,除了之前講過既葛菜水外,另一喜歡去的地方必定是恭和堂,一盅龜零膏即刻幫我下火又降溫,自然地又回復健康的既身體繼續搵食。

百年老字號既龜零膏相信功效必定有,如果唔係都唔可以訖立不倒,所以早前既報告指出成份不足,我絕對唔相信。今次只叫了細盅,唔知點解係用碗上,感覺好奇怪,不過算啦,我都係為左清熱氣,食落有濃郁既苦味,可是慢慢會滲出甘味,加些砂糖調和番D苦味,正所謂苦口良藥。


食完膏之後,飲番碗酸梅湯黎減低番D苦味,酸梅味重,不過唔太酸,仲有甜甜既味道,令我胃口大開。


五花茶茶色混濁,沒有以前那麼清澈,可是味道卻沒有改變,仍然十分好味。


以上是九龍城店的出品,之後是銅鑼灣店既出品。

除左龜零膏外,仲有很多唔同既膏品,不過唔係間間都有,銅鑼灣呢間就有川貝枇杷膏,入口非常甘涼,實在有消熱降火之效,而且入口順滑,可以滋潤喉嚨,實是一個潤口佳品。


食完膏之後飲一杯野係我既指定動作,今次叫了一杯雪梨茶,味道清新,由於之前食完枇杷膏既關係,每飲一啖都異常甘涼。


從圖中也見,九龍城那間無論咩飲品都好,都係用碗飲,感覺以前係涼茶舖飲用時既感覺,可是銅鑼灣店已轉用紙杯了,比較唔環保。


2011年1月22日 星期六

坤記糕品專家



坤記糕品好大可能又會成為另一間電視推介下的犠牲品,最近一次幫襯時,發現有些糕品已經大不如前,連最好食而且唔會酸既白糖糕都有了些微酸味,不知道是受物價或者受客人的影響,整體質素都有所下降。



2011年1月21日 星期五

榮興小廚

現在點心舖大熱之後,連帶茶樓及有點心供應既小菜館也多人起來,榮興小廚係灣仔有一定地位,原來除了小菜做得出色外,午市點心也非常出色,日日爆場兼等位,好不容易才有空位。

這裡的點心都離不開傳統,煎炒煮炸各式各樣都有,而且樣樣都同樣出色。這裡的蝦餃皮薄餡靚,鮮蝦爽口彈牙,而且Size都幾大粒,火喉掌握得好,不會一夾就破。


好多茶樓失傳了的明蝦角,就可以在這裡找到,還記得小時候,每逢到茶樓飲茶,每必要一客沙律明蝦角,一來係炸野,二來有沙律醬,酸酸地好開胃,這裡做得好好,粒粒都飽滿多餡,外層炸得鬆脆,實在黎多兩碟都OK


蒸排骨放棄了一般的豉汁,改用欖角來整,味道當然比豉汁更好吃,咸咸甘甘,增進胃口不少。


XO醬炒腸粉,雖然辣辣地,不過真係幾惹味,每條腸粉顏色都好均勻,證明炒既功夫到家,但仍不失滑溜之口感。


棉花雞及叉燒包都比一般茶樓好食,但又並沒有過人突出之處,現在已經不是每間茶樓都有棉花雞供應,所以都值得一試。


最後那碟埋齋之作,沙嗲牛肉炒河,味道果然唔錯,只是河粉還河粉,沙嗲牛肉還牛肉,並沒有一起炒,失色了不少,下次應該叫佢兜勻。


整體都好出色,正如之前介紹過的小菜般美味,真正是灣仔食肆中不能或缺的一間。


地址:灣仔船街7號寶業大廈地下至1樓





2011年1月19日 星期三

八八八拉麵

最近中環某間拉麵店紅透半邊天,排隊等食都平均要個半至兩個鐘,可是這間位於尖沙咀的拉麵店卻冷清得很,但它的其他分店卻經常爆滿,由其是銅鑼灣那一間。

八八八拉麵店係香港已存在多年,學生時期既我永遠將呢間作為首選既食店,價錢比一般拉麵店平,份量又比一般拉麵店多,味道更加是好。今次在尖沙咀閒逛了一陣,突然好想食拉麵,所以就去了這裡,但是一行下樓梯,已經覺得奇怪,點解咁靜既,入到去看見舖頭大得黎卻沒有人,心知不妙,為何平常人氣鼎盛既銅鑼灣八八八拉麵店在尖沙咀會有如此巨大既對比,但為著醫肚要緊,都入去了。

兩個人各自叫了拉麵、小食及飯團,原來而家仲有汽水送添,由於沒有人的關係,拉麵煮得好快,Order了不久,食物已煮好送上枱。先到的是北海道粟米牛油拉麵,湯底是鹽味,正因為鹽味是比較淡的湯底,牛油正是那碗麵的精華所在,先將牛油溶於湯內,隨即香味四溢,令人食指大動,幸好這碗沒有出現太大問題,只是叉燒又是凍的。


2011年1月18日 星期二

維記咖啡粉麵

早陣子,由於要到石硤尾聽talk,所以專誠來到深水埗搵食,雖然以前係九龍塘做野時,成日都會落去呢邊食,可是咁耐以黎,都未試過係維記食lunch,同事提議到此。太幸運了,唔駛等位就可以即刻入座,可能因為已經兩點了。

同事叫了蛋牛麵,我當然叫潤牛麵啦,黎得呢到點可以唔食豬潤架,話哂最出名係食豬潤,點解同事唔食,因為太高膽固醇,佢話偷食一兩舊就好了,哈哈。

我那碗潤牛麵當然非常好味,可是公仔麵的麵質始終唔好,如果可以連麵質改埋,一定無得頂。豬潤鮮嫩滑溜,無渣無根,加上薑汁同煮,辟去了腥味同燥味,牛肉煮得唔會靱,牛味十足。而且湯底已溶入了牛肉及豬潤的鮮味,令我連湯都飲埋。


蛋牛麵的牛肉都係非常鮮嫩美味,而那隻煎蛋煎得有燶邊,可以盡吸湯的鮮甜味道。


另外還叫了一份咖央西多士share,是用煎的方法去整,所以沒有一般的油膩,在內早已加入了咖央醬,多了一份甜味,而且有非常濃郁既蛋香,可是略嫌煎的不夠火喉,而且唔夠多咖央醬的味道,但整體都是好食的。


這裡的麵份量足,一個男仔一碗麵有可能夠飽。

地址:深水埗福榮街62號及66號地下及北河街165-167號地下D號


2011年1月17日 星期一

雲興隆小廚

自從牛下拆了之後,九龍灣就少了好多有風味既食店,而其中只有少數繼續另覓新舖經營下去,雲興隆就是其中一間,以水煮菜式、煲仔飯及炒餸馳名,好食店得以保存,實在可喜可賀。

雖然我只是在牛下臨拆之前幫襯過舊舖一次,可是卻令我十分懷念。煲仔飯有飯香之餘還有一份焦香,炒餸鑊氣十足,真的十分美味。因此當我知道原來佢地有繼續經營之後,已經急不及待去試,但是這次卻令我有少少失望,沒有以前那麼美味了,可能是沒有了那份大排檔味道。

食左兩次,每次都是叫了煲仔飯及一碟餸,煲仔飯真的沒有以前那麼可口,但仍然美味,炒餸就依然那麼好味。最欣賞這裡的蝦乾排骨飯,食落有一股咸香,是蝦乾誘發出來的味道,排骨鮮甜多汁,兩者混和後,味道昇華百倍,加上煲仔飯那份焦香,必試。


2011年1月16日 星期日

宜家家居超市

我想大家都曾經去過宜家家居美食站食熱狗,那裡的熱狗出名平靚正,而且瑞典肉丸都令好多人崇拜,所以每日都大排長龍。現在宜家都有一個位置專賣零食同冷藏食品,通常都係收銀處附近既一個角位,位置隱蔽。

雖然售賣既貨品不多,可是美食站裡的食物,這裡都有售賣,例如肉丸、熱狗包、芥辣、公主餅和煙三文魚等等......,除左這些之外,亦有一些餅乾、醬汁,所以在家自製宜家美食站也不錯,也可趁有聚會時作大食會。

瑞典肉丸美味好多人都知,所以買了一包以慢火煎煮,等佢粒粒變金黃色,脆皮面也漸漸形成後,將另外購買的肉丸汁煮熱,淋上去就成了一道美味的宜家肉丸,不能漏了酸甜的果醬來增加口味。



2011年1月15日 星期六

太興新世代

一講起凍奶茶,香港實在有很多出名的店舖售賣,不過數極都未數到太興,可是偏偏鍾意呢到既凍奶茶,與金鳳同樣地係無冰,可是比金鳳更加冰凍,原因是除了雪凍了之外,再加上冰鎮,整杯放在一盤凍冰內,使奶茶飲到尾都咁冰凍。

奶茶不但茶味濃郁,而且仲好幼滑,雖然份量不多,不過勝在夠質素。每次黎太興食飯都會飲凍奶茶。


太興除了凍奶茶外,不能漏了燒味,始終太興都是以燒味起家,燒肉及燒鵝皆皮脆肉嫩,叉燒軟滑入味,肥瘦均勻。最欣賞係首創的焗飯,青芥辣忌廉焗燒肉飯及蜜桃汁焗叉燒飯,兩者味道超出了燒味固有的框框,用西式烹調方法去加工中式燒味,實在夠創新。


青芥辣忌廉焗燒肉飯味道不俗,可是太過攻鼻,如果芥辣與忌廉份量平均就好些。蜜桃焗叉燒飯,雖然甜了一些,不過都係好味,肥叉再焗上一焗,有了一股焦香,更加吸引。


另外,發現了肉燥煎蛋飯,味道都不錯,可以拍得住某些台灣食店既味道。現在佢地有了尚湯火鍋,令我更加想去試下湯底究竟是如何濃郁,價錢大約一SET$110左右。


地址:九龍灣宏照道38號MegaBox 10樓7號舖





2011年1月14日 星期五

嚐泰泰國餐廳酒吧

近期lunch時間,經常都去發掘一些好食又便宜既舖頭幫襯,最近發現石水渠街有一間上樓既泰國餐廳,味道唔錯,而且價錢適中,都只係40左右,但已有一碟飯、特飲和甜品,名字叫嚐泰。

今天我和同事各自叫了自己喜歡的食物,我order左鹵水豬手飯,味道一流,豬手燜得軟稔,表皮甜甜地,肉質唔鬆散,而且是拆了骨的,份量更是驚人,這裡應該比出面多三分一,,再加上特製的酸辣汁,令豬手更加好味,除了豬手外,還有半隻蛋。


而同事的青咖哩牛肉飯都十分好,味道唔太辣,可是材料豐富,好多香草,再加上泰國青茄,煮出黎的青咖哩特別可口,牛肉有牛味,而且都好軟滑,用汁來拌飯吃,其間我仲不斷搯同事的青咖哩汁食。


除了這兩個飯外,看見隔枱的海南雞飯都好大碟,唔知味道如何呢,我估都應該幾好食。


龍眼冰,唔太甜,而且夠哂冰涼,可以一解辣法的辣。其實整體都唔錯,可是餐廳內燈色昏暗,令我有少少昏昏欲睡的感覺。並且地方不大,如果想食的話,記著要book定位,lunch時間都幾爆場。下次要搵一個晚上黎試,可能有更多意想不到既美食出現。

地址:灣仔石水渠街10-12號匯富閣1樓