2011年1月31日 星期一

龍鳳廚坊

龍鳳廚坊係我第一篇係Openrice得到讚賞的編輯推介食評,亦因此得到了許多人的認同及讚賞,所以對這間真的情有獨鍾。


再次到來此處,當然少不了食招牌菜,今次更加盡量食多D之前未試過既餸,今日一行六人,都叫左十一個餸,一個湯,味道依舊好味,完全滿足。燉湯依舊非常清甜,今次的豬肺終於是白色的了,沒有上次黑色的豬肺。

頭盤四個,分別係青瓜脆腸、醬拌茄子、虎皮尖椒及普寧鹽水炸豆腐。青瓜脆腸沒有下食用色素,白雪雪,爽脆清新,墊底的青瓜更加係鮮甜無比,配上特製的醬汁,令人一試難忘。




醬拌茄子就比較失色,茄子煮熟後,淋上醬汁,醬汁味道唔夠,而且是熱的,所以十分普通。


虎皮尖椒帶少少辣,豉椒汁味香濃,加上煎釀魚肉加入辣椒,鮮味十足,是一道送酒的佳品。


看似一道普通不過的炸豆腐,其實是一道豆味十足,非常滑溜的炸物,有一股濃烈的豆燶味,實在不是百福豆腐可比美的。


招牌碌鵝沒有以前那麼濃味,不是是否減少了翻碌的次數,顏色也比以前畸淡,可是味道依然是好的,墊底的酸蘿蔔實在酸味十足,可以減少碌鵝的肥膩,食得津津有味。


其實我對賽香肉不太感興趣,因為有類似醃羊肉用的孜然粉,我不好這種味道,但對心而論,都是好食的,豬手燜得夠火喉,加上砂窩的熱力,香氣一下子迫了出來。


上次食過九肚魚烙同蠔烙,今次想食唔同既烙類,所以點了這個鮮蝦水瓜烙,聽個名正常黎講,一定是水瓜做底,幾隻鮮蝦做面,可是這裡一反常態,蝦肉與水瓜是同等份量,每一口也有蝦仁,整個水瓜烙都充滿鮮味,而且脆口,非常好味。


梅羔骨雖然好味,但略嫌梅的味道唔夠層次,深入D講,是咸味不足,梅羔骨應是先酸甜,後有咸味滲出,令人有梅味既after taste先岩,但這裡做不到這種味道。


香煎金錢鱔是一味煎炸功夫到家的作品,一層薄薄的脆炸漿包著彈牙的鱔肉,配上薑蔥再炒,味道十分惹味。


欖菜肉碎四季豆真的不濟,太濕太油,四季豆太稔,所以不推介大家去食。


啫啫芥蘭煲惹味十足,香氣四溢,可是今次d菜太老,食落好多渣,而且有少少生,可能太多人叫,廚房一次過炒,未夠火喉就拎出黎放砂煲,雖然砂煲有熱力,但未足夠令未夠火喉既芥蘭熟透。


最後叫了兩款甜品,兩者皆唔好食,綠茶糕雖然綠茶味重,可是奶味都好重,沒有甜味,感覺好像食緊糕狀既green tea latte。蛋白杏仁茶其實味道唔錯,可是太稀,如果可以杰少少,就prefect了。


整體水準一致,略嫌味道減退些微,可以有回昇的空間,希望越黎越生意興隆,不會令到水準下跌。

地址:太子白楊街21號地下