2010年10月31日 星期日

潮苑正宗潮州粉麵

灣仔一帶都真係一個美食天堂,粉麵之類既舖頭都成巷成市,一間蔡欄都讚好食既粉麵舖,正正位於春園街,主賣手打牛肉餅同魚蛋。呢間又係一間午餐時間排滿哂人等位既小店,街道已經非常之窄,再加上等位既人更加窄上加窄,可是都不減排隊既人。


牛肉餅其實是一塊扁了的牛丸,不過牛肉餅爽口彈牙,調味落得好,襯上牛肉既鮮味,吃完一塊又一塊,欲罷不能,河粉軟軟滑滑,直入喉嚨,落少少特製潮式辣椒油,真係美味。


墨魚丸拼墨魚頭,墨丸粒粒白雪雪,非常彈牙,墨魚頭起初以為係好爽脆感覺,不過完全係錯既,居然係軟軟淋淋,雖然係無咩味,不過食落又幾好食。


再配上炸魚皮,先放入湯中浸一浸,等佢索入湯又未淋哂時食,鮮咋無窮。

地址:灣仔春園街37號地下


2010年10月30日 星期六

〖已結業〗口甜舌滑

九龍城係一個美食天堂,對於某幾種類來說,更加係集中地,例如:泰國菜、潮州菜同火煱等等,而相對地每種菜式都各有佢地既特式,可能因為多野食既關係,香港人對甜品更加係愛不釋手,甜品舖都越開越多,差不多每條街都有一間。而今次這間都算係區內既表表者,不知渡過了多少個年頭,仍然努力經營。

 呢個甜品舖以前都幾有名,好多日本雜誌都介紹過,由其是佢地既楊枝甘露,大件夾好食,味道仲幾好添,17蚊一碗,用料一D都唔馬虎,泰國金柚,香甜芒果,椰味重既椰汁,加上超級冰凍,夏天食真係一流,如果嫌細碗唔夠喉,不妨來一個大碗裝,成個湯碗咁大,食完都飽到上心口。


另外,芒果布甸有別於一般許留山既出品,因為布甸呈半透明,十分好味,而且芒果肉超甜,雖然比楊枝甘露細碗,不過勝在飯後甜品,只宜淺嚐,不宜過量。


每逢九點後,慢慢開始熱鬧,有時可能仲要坐街邊,遇著落雨,更加有味添。哈哈!

地址:九龍城衙前圍道7號A地下

2010年10月29日 星期五

再興燒臘飯店

香港最出名既燒臘可能多不勝數,但要數當中出名至極既都可算這間,雖然之前曾被評為呃秤最厲害既燒臘店,可是佢地既出品真係好好食,由其是叉燒,半肥瘦之餘,更加濃濃地增添炭燒味道,現在沒有呃秤之外,感覺仲好似多左好多添。

每逢午飯時間,門口總是排了兩條隊,一條是想入去坐低食既,另一條則是排隊買飯盒的,師父們刀工了得,一下子已經斬好了一盒飯,排隊既永遠都只是維持在3-6人左右,一落單,伙記一嗌,不消30秒已經可以有交易了,快到要用慢鏡重播先見到師父既刀工。

今次選擇坐下品嚐,本想慢慢去食,可是環境既因由,是不能有喘息的機會,旁邊的食客更加三爬兩撥,用最快既時間食完,埋單走人,座位都算十分迫陜。黎得呢到,梗係要食叉燒啦,無錯叉燒始終都係軟軟淋淋,加上絲絲焦香。今次既燒肉就不能說好了,不過味道唔太咸,唔錯唔錯,白切雞雞肉嫩滑,有少少血色。



不能不提的是,呢到既咸蛋隻隻都好靚,爆哂油架,而且又唔會係一味死咸個隻,雖然膽固醇極高,但係一次半次都無所謂啦。咸蛋叉燒飯只係22蚊咋。



另外,我都好鍾意食呢到既乳鴿,間唔中都會兩盒飯配一隻鴿同媽媽一齊分享。鹵水香中帶甜,鴿肉絲毫不老,而且上色均勻。



可能好多人覺得佢D叉燒賣相不佳,可是味道真係一級棒。

地址:灣仔軒尼詩道265-267號地下C座

2010年10月28日 星期四

韓國錦城飯店

大部份人提到韓國食物,只有廖廖可數既幾樣,不外乎燒烤、石頭飯同泡菜,其實韓式食物係包含好多野食,有生、有熟、有辣、有唔辣。我其實都係鍾意食韓燒,因為一件好味既牛肋肉,真係好正。


呢到既燒烤食物醃得好好味,唔會太過濃味,又唔會太辣or太甜,而且所宥肉類都好新鮮,唔覺有任何雪藏味,烤時居然一d油都唔駛落,慢慢烤先可以食出佢地既鮮味,旁邊仲有人間唔中睇下個爐火有無過大,服務十分好。


其實每枱一入座,都會奉上八小碟,每次都會唔同,佢會隨意俾八碟,其中有一兩碟一定有既,呢d前菜食落都幾好食,唔好以為全部都係凍冰冰,有一d仲係熱炒來的,感覺好有heart去做。


香煎海鮮蔥餅係menu內沒有的,不過只要你叫,佢就會整,一來到,熱辣辣,香脆可口,蔥量十分多,不過海鮮就真係少得可憐,甚至少到食完一件都唔覺有海鮮架在,味道就幾好。


韓式炸醬麵真係唔係我杯茶,叫完都食唔落,好大碗,而且味道唔適合我地一般人食,好咸,而且糊口的,所以我食左好少。

總體黎講,味道唔錯,間唔中黎一次都好的。

地址:尖沙咀堪富利士道5號地下

2010年10月27日 星期三

Cova Ristorante & Caffe

之前對COVA既蛋糕有D抗拒,因為食過好多次個芒果撻都係勁酸,不過除左酸之外,整個都係好味既,今次仲有食埋佢d曲奇同芝士條。


個日其實有好多款俾我揀黎食,不過最終都係放棄不了芒果味既,今次呢件mango cake絕對係我預料之外,芒果甜美,而且整件cake好鬆化,一切落去,已經到底,一層蛋糕,一層芒果同cream,足足6層咁多,食完超開心,終於唔再係酸芒果了。另外,中間個件白色蛋糕,其實係cheese cake,芝士味濃郁,都係絕對推介之作。


而呢個牛油芝士條,係我暫時食過咁多之中既表表者,牛油同芝士味濃厚,極度鬆化,十分脆口。


其實呢間既曲奇,我就不太喜歡,覺得太甜,雖然都係好味既,牛油味同朱古力味都好濃味,果仁係我比較鍾意既,因為鬆化既曲奇配合有咬口既果仁,真係絕配。


地址:各COVA專門店

2010年10月26日 星期二

加東叻沙蝦麵

喇沙係香港有不少捧場客,但真係係好味既,不會存在太多,不是一碗貌似紅紅地橙橙地蝦湯就是一碗濃郁既好野,好多店舖都話主打濃味蝦湯,實則上不是每一間都稱得上好味,只是顏色上加上某D原素整成。

灣仔呢間店舖,蝦湯算清甜,可是沒有太過濃郁既蝦味,材料也算多,墨丸、魚片、豆卜之類,當然梗有蝦啦,蝦就比較細隻,雪藏貨式,豆卜吸入了蝦湯之後,好味,魚片都幾鮮味既。


另外,叫了一碟巴東牛肉飯,嗯,其實可以叫做甜味巴東牛肉,因為比我平時食到的更甜,一點辣味都沒有,完全唔似巴東牛肉既味道,十分失望。整體黎講,不過不失。



地址:灣仔謝斐道155號地下D1舖




2010年10月25日 星期一

La Maison

今篇係我第二次介紹呢間餐廳,我真係好鍾意呢間小店既Lunch Set,一兩個禮拜總喜歡去一次,因為佢地好有誠意地每星期更換餐牌一次,每次都會改哂d味道。

今次d相係上兩個星期影的,分別係西冷牛扒、香煎三文魚、紅酒燴雞、古法燉小牛肉同卡邦尼意粉,而前盤都轉了,分別有青蘋果沙律同凱撒沙律,湯就比利式青口濃湯。

西冷牛扒係我既至愛,肉厚肥美,而且肉味十足,個芥茉子汁酸酸地幾惹味。而香煎三文魚煎得外面脆香,內裡軟熟,配上那個忌廉姜汁十分正。


紅酒燴春雞,呢個無試,不過睇落好吸引,d雞肉都好似好嫩滑。另外一個古法燉小牛肉真係唔好食,勁似薯仔炆牛腩咁,不過真係唔好食,好淡味。


到我最欣賞既卡邦尼炒意粉了,味道調得好好,唔會太咸,又唔會太淡,汁既濃度剛剛好,岩岩可以掛係意粉上,最重要d意粉煙煙靱靱,不過食完都有d滯。


沙律每次都有驚喜,不過實在太少了,青蘋果沙律酸酸甜甜好醒胃,凱撒沙律d菜好鮮味。


個湯內既青口,粒粒都好大隻,而家有橙色既肥膏,同埋都有兩三粒,而且忌廉湯味濃厚。


另外,加28蚊就可以有多一客甜品,我今次order左creme brulee 同埋cheese cake,creme brulee 層焦糖太厚,不過d蛋就幾好味,不過見隔離枱既紅酒燴梨更加吸引。


地址:灣仔汕頭街2號廣泰樓1樓B室


2010年10月24日 星期日

聰嫂私房甜品

聰嫂呢個名真係成日聽聞,不過就從來都未試過,原因佢位處將軍澳內,太過遠,所以無去過。可是今年佢衝出了將軍澳,係銅鑼灣開了一間分店,甜品迷有福了,不用再山長水遠入去食了。

甜品有中式又有西式,甜品好多都用上姜汁做,唔知係唔係呢間既特式呢?今次Order了兩款,一款係芒果奶昔燉雙皮奶,另一個係姜汁鮮奶燉蛋。


芒果奶昔燉雙皮奶,是將預先打好了的花奶芒果汁注入放有份量頗多既芒果肉在面既雙皮奶上,味道配在得好,可是甜品甜品真係好甜,好似食緊糖水咁,雙皮奶可能由於凍的關係,完全沒有幼滑的感覺,覺得比較口,幸好芒果汁的甜,配上燉奶,沒有顯現得甜上加甜,如果再甜下去,我諗我都食唔到了。


另一個熱姜汁鮮奶嫩蛋既幼滑程度,完全將芒果奶昔燉雙皮奶比下去,一放入口,已滑入喉嚨,姜汁鮮奶姜味濃烈,配上燉蛋,不會太甜,味道好好。下次有機會想試下姜汁荔枝奶凍,希望會俾到我驚喜啦。

地址:銅鑼灣霎東街33號快捷假日酒店地下G1號舖

2010年10月23日 星期六

八王子拉麵館

講起拉麵,係佐敦有兩間比較出名,一間叫橫綱,另一間就係今次講既八王子拉麵館。香港大部份既拉麵店都主打豬骨濃湯,但係呢到就主打牛骨湯底,牛骨湯底唔會好似豬骨濃湯咁油膩,屬於比較清的一種,顏色有別於豬骨湯底既白色,佢係一碗清澈既濃湯。



2010年10月22日 星期五

巧興麵食店

餃子對於北方人黎講,係一個非常重要既食物,一碗熱辣辣既餃子麵,足夠一日既能力所需。香港食餃子既地方多的是,可是講得出平靚正既,就非常之少。九龍區首推這間小店,由老舖到而家,都已經有25年歷史了,以前其實係開係馬頭圍道的,後來他們一家人分拆各自經營,現在安徽街這間都有好多年了。

開初餃子只有韭菜餃一款,至現在有幾款餃子,味道依然非常出色。韭菜煎餃係我最喜歡既餃子,肉餡同韭菜既比例非常好,韭菜味又不掩蓋肉鮮味,而且每隻餃子既餡料非常飽滿。煎餃既皮用半煎炸方式,所以有香脆既質感,肉餡D汁從破口溢出,再沾上醋同吃,非常美味。


另外,三鮮餃同樣美味,餡料有蝦、豬肉同韭黃,三者配合上黎十分合適,是近年來十分好賣的貨式。牛肉餃我覺相對黎講,不是太好,比較咸。白菜冬菇餃有少少肉餡,味道清淡得黎不失鮮甜。


這裡的炸醬麵係我好鍾意食既,因為唔會同平時廣東既炸醬味道,呢到既麻醬味重,而且係啡色,完住同廣皮炸醬係兩回事,將青瓜絲輕拌入麵中,甜甜既炸醬加清爽既青瓜,倍感清新。


其實呢到既牛展同排骨都好好食,不過每次都會係炸醬麵、北京粗炒同雞絲冷麵中選擇,因為我係唔鍾意食湯麵既,不過如果剩叫餸的話好貴,要幾十蚊一碟,但係黎到呢到其實真係要試下個排骨,真係好好,兩者都燜得好淋,而且非常入味。


仲有呢到既豆漿,佢自家製的,豆味濃郁,雖然比較甜,不過冰凍既關係,配上煎餃,感覺上無咁熱氣。

地址:土瓜灣安徽街7號嘉信大廈地下

2010年10月20日 星期三

芭堤雅小島泰式餐廳

呢兩個月,時晴時陰,每次想到海灘玩既同時,又招風招雨,於是就改做到訪一位住在栢麗灣的朋友,我地一行十多人去了會所玩,肚餓了就到這間餐廳共享晚餐。

一去到餐廳附近的地方,好有外國既feel,露天酒吧及餐廳一字排開,雖然有風味,但我地都係怕熱既人,梗係坐番入店內。店內裝飾樸素,好有小島風味。呢到既食物味道幾好,上菜速度都好快,服務也好,而且免收開瓶費。

叫左好多小食,有泰式小食拼盤、生蝦刺身、燒豬頸肉、炸魷魚、豬同牛沙嗲。好鍾意食裡面既魚餅,好重香料味,又唔腥,而且脆口,雞翼都整得好好。


生蝦刺身好新鮮,蝦肉彈牙,點上特製既辣汁,增添左一份刺激感,越食越開胃。


炸豬頸肉皮脆肉嫩,醃得入味。另外,魷魚筒軟硬適中,可惜偏偏唔係好夠味。


兩款沙嗲都燒得好好,上面仲淋上一D類似沙律醬的汁再烤,味道更上一層樓。


呢到既鐵板蠔仔炒蛋,真係幾好,炒得蛋汁嫩滑,不過好多芽菜。四季豆唔得,無咩味,,又唔夠乾身,兩樣餸形成一個大對比。


明爐烏頭個酸湯好惹味,好鮮甜,不過每次食呢個魚都係一樣,未煮入味,已經俾人消化哂。個冬陰功湯好正,好鮮甜,不過唔夠辣。


兩個咖哩煮得幾好丫,不過唔係我杯茶,黃咖哩唔夠辣,青咖哩反而幾好,夠哂香,而且點薄餅好好味,最後既菠蘿炒飯,好似有D甜,我唔太鍾意。


最後梗係要將我最喜愛既燒雞壓軸出場,呢到d燒雞燒得十分之好,皮脆肉嫩,而且味道一流,食完之後,我地再encore左多一次。


總括黎講,呢到D野食唔錯,服務又幾好,入開黎,食下唔錯。

地址:馬灣珀麗灣沙灘商場1樓1-2號舖