牛皇星

前幾日天氣涼涼地，即刻去左滾佢一滾先，相約好友到佐敦牛皇星一聚，黎得牛皇星梗係為左牛肉而黎。

坐低叫左海底椰湯底滋潤一番，奶白色既湯底，好重椰汁同花奶味，不過飲落都幾好味，裡面已經放有材料，紅蘿蔔呀，粟米呀之類。今次叫了好多野食，必叫既牛肉就Order左牛脊，貪佢脂肪均勻，放入湯內灼一灼，嫩滑得黎又有牛味，食得出非常新鮮。另外，亦叫了牛柳粒，好多網上食評話要一個鐘先好味，但係我地幾個未夠半個鐘已經撈了黎食，其實半個鐘都好腍，不過未入味，但係牛味非常之豐富，油脂豐盛，兩碟牛都值得一讚，今次想食牛姜，無貨，我估通常都係留哂俾熟客，希望下次一次過試哂牛翼、牛頸同牛姜啦。

豬潤起沙，新鮮唔腥，正。蝦滑拼墨魚滑，蝦滑爽口鮮甜，墨魚滑好彈牙。

炸腐竹放入湯淥一淥即食，索左d湯既腐竹好味，不過如果d腐竹可以再薄少少就好了。其他配料都好新鮮，可能因為多人，流量快既關係，每樣野都做到好新鮮。睇下d菜，真係無乜幾何見到咁新鮮。連平時少有既皇帝菜都有得賣，食落感覺鮮嫩版既唐蒿。

呢間火鍋店真係好好，我會繼續支持佢，食牛肉火鍋既首選。

地址：佐敦吳松街149號