2010年10月16日 星期六

蛇王二(燒臘飯店)

又到燉湯時間啦,銅鑼灣呢一間就真係好出名,不過係出名在佢地既蛇羹同脆皮潤腸,岩哂而家呢個季節,因為天氣一凍,好多人都會去食蛇羹。

黎得呢到既人,通常都係食餐,不外乎燉湯餐或係蛇羹餐,但係燉湯餐都分左幾隻架,有唔同價錢既燉湯可以選擇,蛇羹餐雖然只配脆皮潤腸飯,但係補錢又可以轉燒味雙拼,感覺好自由,而且呢到既燒味都好好味。

我雖然無食蛇羹,但係我印象中記得,係好好味既,或者天氣再凍一些時候,就要去補補身,食番一碗蛇羹暖一暖個身。

今次叫了沙參玉竹燉老鴿同埋金銀菜燉豬肺,沒有半點肥油,雖然味道無以前咁濃烈,不過勝在湯味清甜,飲完好似潤勻全身咁,而且湯渣都好多,食埋D湯渣夠哂飽,特別要提既係金銀菜燉豬肺湯內既豬肺,洗得好乾淨,食落勁爽口。




叫了兩碗一樣既燒味飯,就係蛇汁雞拼脆皮潤腸飯,蛇汁雞食落同白切雞無咩分別,不過雞肉嫩滑,大部份雞皮已被去掉,而我最欣賞係佢地既脆皮潤腸,真係幾好食,夠哂肥潤,而且味道鮮味。我會不斷黎食,因為我真係好鍾意飲燉湯同食潤腸,哈哈。


地址:銅鑼灣波斯富街24號