2010年10月8日 星期五

金鳳茶餐廳

奶茶文化已經成為香港人既一部份,連電視台都以呢樣文化黎拍電視劇,可想而知幾咁深入民心,今次講既係一間以首創無冰凍奶茶馳名既金鳳茶餐廳。

由於佢地d凍奶茶沒有加入冰既關係,絕對唔會飲飲下變淡,而且茶味香濃幼滑,深受灣仔一帶既人喜愛,每朝早都見到有一條長龍去排隊買佢地既凍奶茶及新鮮出爐既麵包。



但係今次所講既係佢既精選午餐,包括一碗麵、一個奄列、一個麵包及一杯餐飲。麵可以揀沙嗲牛肉公仔麵,佢比一般茶餐廳既沙嗲牛肉濃味,用黎配上公仔麵真係好正,可惜的是公仔麵係普通既光麵,好淋身,奄列都係一般既火腿奄列,你亦可以轉做煎蛋既,麵包可以揀餐包或菠蘿包,加錢可以轉做菠蘿油,始終熱辣辣既菠蘿油比其他更吸引,最後杯餐飲梗係飲佢地既凍奶茶啦,雖然食既野勁似一個早餐,不過食完飲完之後,都相當飽既。


除左凍奶茶,佢地既麵包都好好食,新鮮出爐既菠蘿包個皮係脆既,加塊鮮牛油,真係美味,另外呢到既雞批都好出名,批皮鬆化,可是餡料少,不過勝在好味,配搭起凍奶茶上黎都係下午茶既精選。


但呢到有一個缺點,佢地又係好似佐敦某某餐廳咁,坐得迫,又催人走,而且一到lunch時間,排隊等位既人龍不絕,食茶餐廳都要等幾個字,真係好多人。

地址:灣仔春園街41號春園大廈地下