香港老飯店

滬菜係香港中菜既地位祟高，新派既當然受歡迎，但係舊派既都有一定既支持者，通常比較少後生仔女去食，只嘆走寶，因為始終舊舖先有一D特別既風味。

香港老飯店一聽個名就知係一間有相當時間既舖頭，佢地多年來賣既滬菜，味道正宗，賣相都幾好。當日去到坐低時，枱面放了一小碟前菜，食落係鹵水豆腐，好特別。

是日七個人總共叫了3個冷盤，6個主菜，3個飽點，1個甜品，先講冷盤，叫了燻蛋合桃，燻蛋真係好正，煙燻味重又溏心，合桃脆口。一個鹽水鴨，鴨肉結實，咸味適中，我好鍾意食。最後一個係燻魚，相對之下，呢個唔太好食，我覺得整得唔好，好普通。

松鼠桂花魚賣相一般，味道都一般，因為個汁好重茄汁味，好甜，食落好滯。

以上既係小排骨同炸八塊，小排骨食落都幾好，炸八塊即係炸雞件，哈哈，係飯店食KFC，哈哈，不過又幾好味，我幾鍾意，D雞雖然係雪雞，不過都好鮮嫩。

主角到啦，每人一件蜜汁火方，即係一件飽夾著一件炸腐皮，再加上一塊用蜜糖煮過既金華火腿，咸咸甜甜真係幾得意，食完仲想再ORDER添。

兩碟菜分吃係咸肉百頁小唐菜同雲腿津白，前者咸肉肉味鮮，百頁吸收左咸肉既汁，再配上小唐菜既甜，果然係一道百食不厭既菜式。另一碟係雲腿津白，感覺賣相不佳，幸好味道幾好。

食完主菜，梗係食番D餅點，點了黃金大餅、小籠包同素菜鍋貼，三樣餅點都好好食，黃金大餅即係蔥油大餅，味道好正，熱辣辣，小籠包皮薄餡靚，好鮮甜既湯汁，另外，素菜鍋貼煎得隻隻金黃，脆口，菜餡食落好鮮嫩，食多多都唔滯。

最後，梗係食埋甜品啦，高力豆沙，唔太甜，幾適合食完大餐後既甜點，而且每枱都會奉上果盤。

地址：尖沙咀彌敦道132號美麗華商場4樓F號舖