2010年10月18日 星期一

大榮華圍村菜

我相信榮華呢個名係香港應該無咩人唔識,每逢中秋節時期同入冬時期,佢地既月餅同臘味都好出名,而其中既大榮華其實同榮華都係有淵源既,而主理大榮華既滔滔更加無人不識啦。

大榮華總店係元朗,對我黎講真係山長水遠,都無咩時間可以入到去食,但係係幾年前,開左間大榮華圍村菜係九龍灣,當堂開心哂,因為唔駛再搭車千里迢迢咁入去元朗。

黎得大榮華,當然要試下佢地既豬油撈飯同元朗烏頭啦,雖然豬油極高膽固醇,但間唔中一次都值得既。烏頭黃油充足,而且好大條,又好鮮味,好多人都唔食烏頭既原因絕對係烏頭有一股泥味,但呢到既絕對沒有那股泥味。用梅子麵醬蒸,更加惹味,甜甜酸酸,用黎送飯一流。


無叫到呢到最多人食既圍頭五味雞,我就叫左呢個桂花麥芽雞,食落無咩桂花味,不過咸味清新,而且肉質嫩滑,雖然用上雪藏雞,但完全沒有雪味。


另外,我好喜愛食呢到既家鄉蒸芋泥,用上芋頭磨成泥再加上芋頭絲做成餅型,混入豬肉同蝦,爽口感一流,唔會太淋身,而且鮮味一流,配上少少豉油,完全係一碟鮮味無窮既餸菜。


下面個碟係麵醬金錢鱔,鱔身夠結實,味道甜甜酸酸,送飯一流,只是覺得份量頗少。


主角之一就係豬油撈飯,呢到既豬油撈飯既飯底同白飯唔同,因為豬油撈飯用既飯底係用砵仔蒸熟,飯粒煙煙靱靱,淋D豬油加D豉油撈一撈,滿足哂。


食飽後,仲有糖水送,有紅豆沙同麥米粥,雖然兩者都比較甜,但係味道都唔錯。價錢雖有不斷上升既趨勢,不過都係一個晚飯既好地點。同埋最鍾意食呢到既臘腸卷同馬拉糕。

地址:九龍灣宏開道8號其士商業中心2樓