2010年8月31日 星期二

Noren

Noren係一間日本小店,最近人氣急升,雖然食物選擇唔多,不過勝在夠出色。

豚肉飯亦係小弟既喜歡食物之一,可是豚肉要煮得好,係好難架,嫩滑唔"鞋"口,而且無渣,真係難上加難。

今次呢間既豚肉飯真係好好味,仲畫龍點睛,加上一塊細細既青椒仔,豚肉肉質好嫩滑,火喉岩岩好,好大塊,但係一D都唔薄,可是飯粒就軟左少少,如果多少少煙靱感就最好啦。豚肉飯有一個餐,包前菜、酸薑同麵豉湯。前菜係大根沙律,好清新,不過係生既白蘿蔔,可能有好多人都唔會食,隔離兩枱就都無食了,其實都幾好食架。


2010年8月30日 星期一

Yo Mama

Froyo真係無處不在,細細地一個灣仔都已經有五六間,係咁多間裡面,Yo Mama算係最出名的一間。

這間Froyo雖然只賣兩隻味,但已經足以打倒對手。原因好簡單,酸味夠,又軟滑。除左原味之外,仲有綠茶味,食落有淡淡既綠茶清香,絕對沒有淹蓋左原本既乳酪味。Toppings有好多選擇,今次我只選了荔枝,但是普通既罐頭荔枝,有點失望。最後我覺得呢間既Froyo真係無論幾多次同一隻味,我都一樣咁鍾意。


地址:灣仔永豐街16號


2010年8月29日 星期日

川福烏冬

係夏天既時候,我覺得食冰涼既野係最好既。冷烏冬係我只愛既選擇,平時都會係屋企煮黎食,因為涼透心,特別開胃。

係尖東個邊,有間係我心目中係幾好食的。川福烏冬同十勝豚丼係同一個集團,而且兩間舖中間係連住,好可惜係坐係川福個邊唔可以order十勝豚丼既野,如果可以,我一定叫一個冷烏冬配厚燒豚肉。


2010年8月28日 星期六

重慶燒

這篇真係好難定位,雖然個名字同食既野都係帶有中式既成份,但係俾人既感覺完全唔係中式食物,但最後都將佢放回中式,因為蒙古食物都算中式。

這間燒炸店又係另一間,出左名就水準大跌既例子,以前日日爆場,現在人已不多了,食物質素也大幅下解,而且好認同有D網友既說話,食既野只係同一隻味配係唔同既食物上,其他咩味都食唔到。

本來D橫琴蠔真係又大又抵食,大大隻,但現在貴左好多又細隻。下圖是第一次食時影的,幾大隻。其他食物就千篇一律,因為點了小辣,所以都係辣味,連肉味都食唔到。



但下圖既粟米就真係令我又驚又喜,因為原來粟米可以整到咁辣,因為成舊粟米都黏滿辣粉。







反而朱古力香蕉,我覺得幾好食,可能我鍾意食蕉既關係。大致上,以前水準好,現在差得不得了,因為已經無服務可言架啦,但食物質素既下降,間接令到佢既評價差上加差。再加上之前曾經有人因食物中毒既關係入院,所以我已經放棄了。


地址:佐敦渡船角文英街20號地下

2010年8月27日 星期五

南台灣原味新館

係黃埔新邨內有一間蔡San激讚既台灣料理,佢就係南台灣原味新館。位置對於好多人黎講可能偏僻左d,但係已經好易搵了,基本上成條街由好耐之前已經變成食街。

呢間台灣料理係少數有提供火煱既台式料理店,雖然我未試過,但係都對火煱好有興趣,希望遲下有機會去試下啦。

由於我只是Lunch時間去,所以都無乜叫到特別既食物,只是叫了幾個set黎食,一個牛肉麵、排骨麵、海鮮湯飯及醬肉炒飯,另加一個自選小食拼盤,同幾杯飲品。

牛肉軟淋,有濃郁既味道,湯底都好重牛味,整體好味。排骨就ok的,麵條都幾彈牙,唔錯。個炒飯夠炒得不油不膩,食落口,一粒一粒的,唔錯。


個小食拼盤,我揀選了花枝丸、周氏蝦卷、鹽酥蚵仔同鹽酥雞。估唔到最快食哂既係鹽酥蚵仔,蚵仔都算大隻,炸得乾身,但內裡仍然係多汁鮮嫩。鹽酥雞比較薄身,所以裡面都比較乾身。蝦卷好味,炸漿唔會太厚身,而個花枝丸普普通通啦。飲品就普普通通,而家太多了,出色的也太多了。


地址:紅磡民泰街35號遠榮樓地下B1B號

2010年8月25日 星期三

2010年8月23日 星期一

M & S - Cheddar Cheese Crispies

咁耐都未講過我最鍾意食既零食,今次就講下呢個零食啦。自從我以前上司介紹我食之後,就發現不能自拔,經常都買番黎食,而且簡直係惡魔食物,一食就唔能夠停口,最瘋狂個次一連食左三盒。


一開盒,已經聞到好香既芝士味,食落口,好鬆化,勁重芝士味,雖然係肥,但係真係停唔到口,不斷係咁食,一食哂,就入貨。可是,這個芝士酥經常都無貨,價錢雖然唔平,但係發現原來真係好多人都鍾意食,我的幾位同事經我介紹之下,慢慢跌入惡魔既手裡,所以公司長期都有架貨。

我誠意推介呢款美味零食。

地址:馬莎各門市

2010年8月22日 星期日

墾丁茶房

睇完戲,諗住係Mega Box搵食,突然記起呢到開左間新既台式食舖,,原來呢間係大快活集團既,咁就去左試。

佢位於11樓的一角,要行到最入個邊。佈局好似係海邊咁,有座燈塔,藍天白雲,好寫意。比較特別既係,門口擺左一部電單車。

食物方面,試了一個小食拼盤、焗飯同飲品。個涼拌冷盤擺放得好精緻,分別係檸檬汁青瓜、麻辣冷豆腐同麻醬茄子。檸檬汁青瓜爽口帶酸,不過無咩味。麻辣冷豆腐相對三樣內,比較好食,辣度都夠,但係豆腐唔夠滑,有d"鞋"。最後既茄子,好普通,加上麻醬增加左佢既味道。


今次我試了蜜糖芥末焗豬頸肉飯,芝士夠多,豬頸肉都幾好味,d飯用既米好得意,類似珍珠米,煙煙靱靱,上面個塊係蘋果黎的,不過好不倫不類,好甜,完全唔想食,隔離幾枱都係食左一啖就放棄了,個焗飯味道係好既,但係可以的話,最好唔好有塊蘋果啦。


下圖兩杯飲品分別係左手邊既梅子果茶,右手邊既係青蘋果茶,我覺得佢調較得好甜,味道都係街邊個d好飲d。

2010年8月21日 星期六

泰豊屢酒家

香港真係一個美食天堂,真係咩都有得食,而且從過去既歷史痕跡發現,京菜應該係四五十年前係好興既,大部份老舖都係個個時期開設。

泰豊屢就係其中一間,環境格局古色古香,掛滿了好多字晝,當中仲有張大千既晝,而樓梯有一幅兩層樓咁高既晝,絕對要留下足跡啦。


食物方面,水準不過不失,但絕對沒有驚喜或再次幫襯既意思。先講主角,北京填鴨都唔差,不過無想像中咁好,因為真係好大片肉,我鍾意半肉半皮個D多D。


山東燒雞好香,因為之前卥時,已經上哂色同味。賽螃蟹就麻麻地,可能無左隻蛋黃,無咁滑,而且有D地方好"老"。


一睇以下兩碟就知,賣相差,咕嚕魚塊攪到好似層層疊咁,黏埋一舊。再睇下碟京燒羊肉,黑到呢,好燶,而且好肥。兩碟整體都唔覺好食,不過個海蜇,好爽好脆,好食之極。


雲吞雞好多菜,D雲吞好好食,個湯都幾清,沒有太多油,呢個好食。食完正餐,梗係要食番個甜品,高力豆沙,賣相都做得幾好,起碼唔會三尖八角,足見師父都有一定功力,但係另一個甜品,賣相實在太差,連相都唔想影,未見過有一間做拔絲香蕉,可以做到黏埋一齊,落完水之後,都係一餅過,而且仲要唔係脆,係"林"架,真係好難食。


不過呢到既火煱係好正架,長長既煙囪,好有特色,可以黎試下。

地址:尖沙咀漆咸道29-31號溫莎大廈


2010年8月20日 星期五

肥高美食

肥高美食可能個名吸引唔到你去,佢有個招牌菜式就應該令到你去試。一味沙拉菜式已經令你有股衝動去試,哈哈,其實我就係俾呢樣野吸引左去試。

呢到首推沙拉蝦球啦,雖然我無影到相,不過我肯定好食過豬簽骨,因為佢D沙拉汁唔係出面見到咁簡單,佢加入左芒果汁落去煮,令到整體既甜味都突出哂,配以海鮮類真係絕配,但豬簽骨本身已經唔係有咩味既食材,所以要不斷去蘸汁食,絕對不建議去試,食沙拉骨都好D。


2010年8月19日 星期四

糖百府

唉! 差左。香港人就係咁架啦,一出名就係變質。好記得當時呢個舖只係開左幾日,我就特別約班朋友去試,個時既味道仲記得清清楚楚,係好清新既果味,但係而家我大部份只係食得到係加左好重奶既味既綿花冰。

當時我無記錯的話,仲同老闆傾左一陣,同佢講我地特別黎捧場,佢仲話第時會好多味,因為當時只係得5-6款味。個時,我最欣賞佢個芒果冰,正,又大碟,成座山咁高,配埋蜜瓜粒同芒果粒,真係好FRESH。


2010年8月18日 星期三

泉章居

泉章居永遠都係我同一大班同學慶祝生日既好地方,原因十分之簡單,平靚正,食到飽飽都係每人百幾,多幾個大胃王都夠食,而且地點都係旺區,一間係旺角,另一間係銅鑼灣。

佢地既特色菜係鹽焗雞、梅菜扣肉、炸大腸等等客家菜。D雞真係幾好,夠入味,又夠嫩滑,而且份量都幾大隻,而家好多地方隻雞都細細隻,真係到喉唔到肺。



2010年8月17日 星期二

品香樓

大排檔已經慢慢係香港既生活內絕種,取而代之既係一間又一間既小舖頭,係南山邨內就有一間街坊餐廳,同埋簡直係城大人既飯堂,價格便宜,食物質素都幾好。

呢到D小菜做得幾好,而且又夠鑊氣,每逢下晝同夜晚,都經常坐無虛席,日日爆柵。我覺得呢到既咕嚕肉同避風塘豬手,整得好好食,仲有一個黃金魷魚,即係咸蛋黃魷魚,雖然膽固醇極高,可是真係忍唔到口。


2010年8月16日 星期一

Yogurtime

最近天氣咁炎熱,自自然然就喜歡左每日食完Lunch就去嘆番杯yogurt,呢間位於船街既yogurt店,每逢lunch時候,我都見到好多OL買黎當lunch食。

Yogurtime每日都有四種味道供應,Euro Tart, Vanilla and Chocolate係每日都有既。只有一種味係每日都更換,真係日日都唔同,我見過幾隻味,有青蘋果、焦糖吉士、藍梅、荔枝、香蕉朱古力、Pina Colada等等,聽講呢間店係有成100種味道既,遇到大時大節,可能仲有特別味道推出。

我食左咁多次,覺得荔枝清新得黎又唔甜,係夏天食,真係好正。反而個青蘋果味太重奶味,又唔夠酸,差D。Vanilla 同 chocolate 就好似軟雪糕,完全唔似yogurt。原味即係euro tart,呢個都唔錯。呢到仲有好多有特色既toppings,好似dry banana,煙煙韌韌,好得意,另外,mochi都好得意,仲有好特別既以色列椰絲糖,加埋落去都幾好食。


上圖係同事既錯配,荔枝配朱古力,大纜都扯唔埋,再加上chocolate clips,失敗左。


荔枝配euro tart,大家都酸酸地,好夾,白色一粒粒既係mochi,好似燸米糍,配合上黎好得。


chocolate banana配麥維他,飽肚之作,好重朱古力同香蕉味,不過太甜。


軟雪糕組合,朱古力配雲里拿,加上蜜糖脆脆,ok 的,不過一d都唔似yogurt。

地址:灣仔莊士敦道60號嘉薈軒地下3號舖

2010年8月15日 星期日

山頭火

久聞鰂魚涌既山頭火拉麵有幾咁好食,所以當知道 i-square 有時,就第一時間起程去試,雖然舖頭細細,但係等候時間都唔係太長。

當日試了幾樣野,覺得個日式撈麵好得意,因為平時都撈麵都係以冷麵為主,今次則以拉麵為題,配以一碗豉油湯底,感覺新鮮。麵條好彈牙,湯底都好鮮甜,不過就有一層油係面,但係食得拉麵都預左有層油,所以都唔係太介意,裡面有一隻糖心蛋,有d好似排骨既肉,實則似一碗排骨拉麵多d,整體配起上黎都幾好食。



2010年8月14日 星期六

程班長台灣牛肉麵

台灣牛肉麵係香港都已經存在左好多年了,由最初既既第一間台灣牛肉麵,至現在五花八門咁多間,不斷咁引入唔同地區既牛肉麵,而最新既首推程班長台灣牛肉麵。

佢間舖係好細,而且好擠迫,枱與枱之間,真係只夠一個人側住身行過,而且全店充斥著牛肉麵既香味,可是當你食完,就會覺得係一個唔好既味,因為你件衫已經吸哂d味。


牛肉麵加辣,辣度夠,麵條彈牙,可是湯底超級多油,可是香港好多人都接受唔到咁多油,因為一上枱,你會見到湯面泛起一遍油光。牛肉並唔係用牛展,佢應該係用左牛腩之類黎煮,味道都夠香濃,不過我始終覺得食牛肉麵需要配上大大舊既牛展肉,先係最美味既。


我另外亦叫了一碟飯,本來係想叫礦肉飯,但係居然無哂,我已經係晚上6:30去食,未到晚飯已經賣哂,係唔係真係煮得咁少丫,如果係,下次加番限量供應丫嘛。我碟雞飯係蔥油雞飯,佢地係飯上淋上佢地既肉燥汁,個味都煮得幾好,可是d雞肉無咩味,蔥油都吊唔起d味,所以真係好普通,好似食緊白切雞飯咁。

食完正餐之後,叫了榴槤班戟,味道好似滿遁,不過我覺得始終都係滿記好食d。總括來講,未食過,可以試,不過一次就夠了。

    地址:銅鑼灣駱克道463-483號銅鑼灣廣場二期地下                                      

2010年8月13日 星期五

北方餃子源

每逢一到Lunch時間,想係灣仔搵食,多人到插針都插唔入,而且好多舖頭都會趕客走,但偏偏好多間趕客走既都客似雲來。

皇后大道東尾既餃子源就係其中一間,如果你想係裡面有好招呼同慢慢食,唔好意思,你地可以轉地方了,事關呢到既老闆絕對有燥狂症,你可以一路食,一路聽到佢用上海話鬧人,有時仲可以見到D食客同佢大戰添,仲有你係無權自己揀位坐既,要由佢幫你安排,你話轉枱,佢真係會趕你走架,不過呢到絕對為你係一個平凡既Lunch時間增添好多色彩。

講回食物方面,事實上佢d食物又真係好吃,但係佢好狼死,事關佢全部都係湯餃,如果你想要煎餃,佢會做,不過每碟要收多八蚊,即係38蚊一碟煎餃。



呢到我覺得有三種餃係幾好食既,例如:鮮肉翠玉瓜、鮮肉芹菜同羊肉餃。翠玉瓜同芹菜,食落有甜味,芹菜餃仲散發出一種香味出黎,十分吸引。而羊肉餃就真係幾夠羊味,怕羶既千萬不要試,因為我本人怕羶的,可是呢到咁出名羊肉餃,點都要硬住頭皮食一隻,可是出奇地好味,好多肉汁。但係韮菜餃就麻麻地,我地叫左煎的,可是完全係炸囉,所以一d都唔好食,可以放湯會好味好多。




除左餃之外,好多人都會叫菜飯食,呢到基本上得三款菜飯,分別係炸豬扒(上海排骨)、手撕雞同牛展菜飯,我本人覺得三樣都好味,但手撕雞就比較遜色左少少,可能d雞好鞋口啦,同埋每碗飯都有一匙佢既秘制香料,少少辣,都幾惹味。碗飯份量都幾大架,食一碗配上一杯山楂水,真係好正,可以消埋滯。

真人真事:有一次去食,隔離枱其中一邊坐住一對母子,個細路得幾歲啦,佢好似唔係好想食咁,佢個媽媽唯有好快咁食完,餵仔仔食野啦,但係個細路食得慢,個老闆見到咁既情況,不斷用上海話鬧佢地:「食得咁慢,阻住哂d枱,快d走,出面好多人等緊。」呢段野講左好多次,個媽媽都唔好意思,佢已經好快咁餵緊個細路,個老闆鬧極都唔停,最後,見到仲有少少,直情叫佢地起身埋單走人,唔俾佢再餵個細路食,仲要叫佢下次唔好再黎。個個聽到都嚇親,野都唔俾人地食埋,仲叫人以後唔好黎阻住。

地址:灣仔皇后大道東259號地下

2010年8月12日 星期四

常嚐甜品

夏日炎炎,梗係想食一些冰涼消暑既野啦,常嚐甜品既招牌凍冰冰就係一個明智既選擇。

佢最近仲加左好多款味既凍冰冰,例如:榴槤冰、山竹冰同布冧冰等等,不過我就只愛食芒果,但係有個好得意既情景,就係發現次次食芒果冰冰都用唔同既芒果種,今次影相既係蘋果芒,佢用左半個芒果黎打冰,D冰打得好似雪葩咁,而且一入口,好冰涼,同埋好鮮甜,個冰冰成座山咁,有成一本書咁高。