泉章居

泉章居永遠都係我同一大班同學慶祝生日既好地方，原因十分之簡單，平靚正，食到飽飽都係每人百幾，多幾個大胃王都夠食，而且地點都係旺區，一間係旺角，另一間係銅鑼灣。

佢地既特色菜係鹽焗雞、梅菜扣肉、炸大腸等等客家菜。D雞真係幾好，夠入味，又夠嫩滑，而且份量都幾大隻，而家好多地方隻雞都細細隻，真係到喉唔到肺。

梅菜扣肉雖然肥膩，但係送飯一流，D肉已經扣到好冧，而且加埋D梅菜汁，食幾碗白飯都夠。炸大腸，皮脆內嫩，已經唔會炸到燶哂，一睇D顏色就知係幾咁鮮色。我對呢兩味菜，真係又愛又恨，雖然肥膩，但係都忍唔口要叫黎食。

下圖係香酥鴨，即係將隻鴨起哂骨，再釀芋頭蓉落油炸，食落又係表皮香脆，內裡熱辣辣，D鴨又唔老，食完好似唔覺食緊肉咁，個感覺係好得意。山楂咕嚕肉，好多地方都有得食，但係呢到舊舊大小均勻，肥瘦比例岩，煮出黎特別好味，唔好以為瘦就好呀，一定要有少少肥先好食，而且佢係加左酸青瓜落去炒，多一份滋味。

其餘既都唔錯，總括黎講，一個字正，可能有人唔認同，不過以咁既價錢食到一D質素都有番咁上下既，就係值得架啦。

地址：銅鑼灣軒尼詩道489號銅鑼灣廣場一期7-8樓