2010年9月30日 星期四

金源小館

我個人覺得灣仔區既食肆俾人既感覺都係好高級,但係其實都好多平民化既食肆的,係灣仔大王東街就有一間極度平民化既小店,環境同出品都有著香港人坐大排檔既特色,而且價錢十分便宜。呢度有一道菜式,響譽三十年,就係山東燒雞。




呢到既山東燒雞非常入味,雞肉鮮嫩無比,塊雞皮實在非常吸引,正正因為好多人怕肥,唔敢食,只可以嘆他們走寶,加上那個蒜蓉豉汁,非常美味。另一個好好味既餸就係香醋骨,十足十以前屋企煮既味道,好有屋企feel,酸甜味道剛剛好。


一睇到呢碟叉燒炒蛋就知吸引啦,仲有好多蛋汁黏住,一食落口就知嫩滑,有d蔥花吊下味。椒鹽骨鑊氣夠,夠香脆,唔太咸,可以用黎送飯。個肉餅蒸得火喉剛剛好,有D馬蹄粒增加口感。


下圖既金沙蝦,表面好吸引,但係都係覺得金沙蝦都係細細隻好食,成大隻都係差少少,雖然蝦肉結實,但太大隻要剝殼,哂左D金沙汁。梅菜扣肉既梅菜好味,扣肉唔太肥,不過都好好,肥瘦相間,一舊好靚既五花腩,整得好,真係好鬆化。咸肉炒四季豆表面睇黎好似叉燒炒,不過慢慢食落係食得出係咸肉既。


黎到呢到食飯,除左食飯之外,一定唔可以錯過佢地自家製冒甜品,有好多既,最出名既係木槺布甸,不過我就至愛佢既係焦糖雞蛋布甸,味道好正宗,焦糖唔太甜,但係同個布甸好夾,除左呢兩樣外,佢既榴槤雪糕都好多人叫黎食架。


呢間食肆我會不斷黎食,因為平靚正,lunch黎食又平,又夠飽,晚飯都唔錯,只差在環境上,十分殘舊。

地址:灣仔大王東街3號地下

2010年9月29日 星期三

小酒窩餐廳

最近經朋友介紹,去到佐敦近尖沙咀警署一段既廟街,有一間外表平平無奇,但內有乾坤既小店,明明寫住係印度餐廳,點知食既野係Fusion,完全唔清楚佢究竟係一間咩餐廳,不過點都好,野食好味就是皇道。


2010年9月28日 星期二

阿一天下

茶餐廳賣鮑魚,只此一家,呢間就係阿一天下,整體黎講絕對係一間高級茶餐廳。鮑魚大王為左推廣鮑魚文化,與人合作將鮑魚平民化,等多D人可以享受呢種美味。

呢到有好多個餐,例如:阿一鮑魚餐、鮑魚三寶餐及人氣包翅花膠炒飯餐等等...今次食了幾種餐,價錢都係88-168左右,阿一鮑魚餐包括一煲翅、一個鮑魚花菇、一個茄汁洋蔥雞扒、一個杏汁官燕及一碗飯。煲黃燜大鮑翅,味道真係幾好,不過比較杰身,用黎撈飯都唔錯,鮑魚雖小且係鮮鮑,但味道鮮美,茄汁洋蔥雞扒就真係只係用黎間場,送飯食,最尾個個杏汁官燕,都幾足料,不過略淡,只有少許杏汁味。


另外叫了一個買一送一既人氣包翅花膠炒飯餐,即是148有兩份餐,包括餐前小食、砂煲紅燒包翅、豉油皇雞中翼、花膠水晶特式炒飯、時蔬及雜果珍珠撈。餐前小食係XO醬煮鮑魚肝,味道幾得意,有新鮮感,紅燒翅既味道比黃燜翅更加好味,加30蚊可以加大煲翅的,份量多好多架,翅既湯身比較稀,其餘既用了一個大碟裝起,炒飯、時蔬及雞翼擺得好企理,炒飯乾身,唔油,塊花膠都OK既,不過要彈既絕對係個杯雜果珍珠撈,我覺得一D都唔好食,好似罐頭果汁咁。


最後個個餐實實在在俾我最驚喜既心情,雖然只是一盅燉湯同一碟炒飯,但係最出色既竟然係個炒飯,燉湯係蟲草花人參燉竹絲雞,顏色清澈,味道鮮甜,一盅好好味既燉湯,那碟炒飯有一隻小小既鮑魚擺係飯面,呢碟炒飯表面睇落以為好細碟,但其實係好大碟,炒飯內既材料豐富,有鮑魚粒,咸肉等等,炒飯最緊要乾身唔油,食落又濕潤,呢到食完成碟炒飯之後,油都唔多一滴,一個好出色既炒飯。


我覺得呢一間餐廳,未食過,可以試下,食過都可以得閒再食,間唔中一次半次,應該有驚喜既。

地址:尖沙咀北京道71-77號誠信大廈2樓

2010年9月27日 星期一

海鮮島

呢個月,秋風起,應該係食蛇既,不過除左蛇,梗係食海鮮啦。而家d海鮮肥美鮮甜,今次同朋友一齊入到布袋澳,食左海鮮島。

入到去,佢地安排我地坐在係頭個邊,好在呢個時候,有d涼風,唔係真係熱死。我地都係點左一d好普通既海鮮黎食,不過都係好鮮甜肥美既。白灼跳螺,用水烚一烚,鮮甜無比。豉椒炒聖子王,大大隻既聖子配上濃味既豉汁黎炒,惹味得黎又不失聖子既爽脆。


食得海鮮又點可以少左椒鹽鮮魷,味濃得黎,又唔會話太咸,整體黎講岩岩好,外脆內軟。至愛既菜式黎啦,砵酒焗蠔,不過呢個比較失色,覺得唔夠乾身,如果可以乾身d,就可以脆口d,而且食唔出有酒味。


薑蔥炒蟹,本人因為太懶,唔太願意去食,因為食完要洗手,成日d汁因為有生粉既關係,黏住隻手,好討厭,不過食左個蟹蓋,爆膏,十分好食。豉椒炒蜆同聖子一樣,都係好惹味,食完唔口渴。


豉油王蝦碌,味鮮,都幾入味,但是有d好細隻,細過一隻尾指。芝士焗龍蝦,主角當然係個伊麵底啦,哈哈,食哂d麵,d龍蝦都未食完,龍蝦都幾厚肉


楊州炒飯料多乾身,都真係好好味,不過因為太大碟既關係,食到成枱都係,亦係每碟必叫既食物,炒菜賣相好,可是太油膩,油光泛泛咁,雖然夠翠綠,可是真係好油。呢餐海鮮餐,真係好美味,價錢又唔係想像咁貴,可能無叫魚啦,哈哈。


地址:西貢清水灣布袋澳7號B舖

2010年9月24日 星期五

堂記腸粉專門店

之前講完添記,咁就梗係講堂記啦,每次都會一次過食哂兩樣,先食堂記填下個肚,之後就去添記填飽佢,因為係堂記落單,一係就落多D,等佢慢慢整,一係就食完一轉,即走,因為一碟腸粉係要等好耐既。唔知真定假,每次有叫粥既人都會比無叫粥既人快D有腸粉。

點解明知食碟腸粉要等咁耐,都要咁哂時間去等,因為實在值得,每碟腸粉都滑不溜口,而且配搭新鮮。下圖個碟只係最普通既牛肉叉燒腸,呢碟真係普通左D,不過都係堅持個一句"滑不溜口"。


2010年9月23日 星期四

添記法式三文治

添記法式三文治既舖頭位置絕對係一個叫偏僻既地方,如果你唔係揸車的話,真係唔係好想入黎,因為無論搭咩車都要行入黎,雖然唔係太遠,但係要轉黎轉去,好討厭,可是佢又值得我特登入黎喎,簡直矛盾。其實除左添記外,堂記亦係我既心水腸粉店,稍後會擺埋上黎。

佢既法包三文治真係做得好好,係出面食左咁多間,都係無呢間咁出色。一個Order完即刻再入焗爐焗脆既法包,夾著淋淋種種既肉類同醃好的蔬菜絲,真係一大美味。肉類大致上有扎肉、五香腩肉、咸豬手及法式嚼肉,咩叫嚼肉,就是豬肝加上豬肉攪碎之後製成一片一片既肉凍,口感勁似鵝肝,但又十分惹味,而蘿蔔及青瓜絲係酸酸甜甜的,配合上d肉類,十分夾,整個包外脆內軟,外熱內冷,十分得意。


2010年9月20日 星期一

味吉拉麵館

呢間拉麵館係一個連鎖集團既,應該就係UCC啦,不過無論由外面同裡面都睇唔出係出自UCC集團。今次去到既就係MEGA BOX那一間。MEGA BOX內裡表面好似好多野食選擇,但係其實都係無咩邊間好食,咁岩經過呢間,佢地又開左無耐,又未試過,所以就入去試啦。

太約六點四十五分左右,裡面已經坐得八八九九了,我地被安排到一個面對住停車等客區既位置,雖然地方唔迫,但係都唔係太舒服,因為坐位都排得幾密。

首先要講既係佢地既串燒,無論擺盤同味道都好好,外層燒得香口,內裡則肉汁豐富,而且有淡淡既一股鹽味滲出,因為我地叫了鹽燒,呢到係可以Order汁燒的。


2010年9月17日 星期五

鳳華路邊雞飯店

由於屋企無煲湯既關係,間唔中都要有D湯水落肚,所以有時我都會去D有燉湯既舖頭食飯。係九龍城就有幾間啦,當中路邊雞呢個名已經有好耐既歷史,但係你問我九龍城有兩間都係叫路邊雞,而邊間先係正宗既,我就唔清楚了。兩間無論係出品同環境都如出一轍,我向屋企人查問,佢地就話另一間應該係耐D既,不過我覺得最緊要都係食物好食就得了,所以我都無考究過邊間先係正宗。

呢到最出名既梗係雞同燉湯啦,三個人叫了兩個菜干豬肺湯,一個淮杞牛展湯,兩款燉湯都好足料,而且味道好鮮甜。其實呢到仲有好多款湯選擇,要試勻哂,都要黎好多次,而且價錢一D都唔貴,十分抵食。


今次叫了一個霸王雞、一碟雞什同一個菜,雞肉嫩滑,略嫌味道不足,相反雞什味道好鮮,而且又夠入味,可見準備工夫好充足,兼清洗得好乾淨,當中以沙薑汁入味,令到碟雞什更升了一個層次。最重要既係,呢到價錢一D都唔貴,仲有好多特價小菜,所以好多九龍城街坊都當係飯堂日日黎食。


地址:九龍城龍崗道20號地下

2010年9月16日 星期四

滿記甜品

一講起甜品,其實點可以唔講一講榴槤甜品既始祖呢,我想佢都係唯一一間有劃分開榴槤區既甜品舖,以前中學時,黎食o個一刻真係好開心,因為入西貢係一個好遙遠既路程。

黎得呢個又點可以唔食佢既榴槤甜品呢,今次就叫了榴槤糯米滋,表皮煙煙靱靱,裡面香濃無比。另一個係芒果糯米滋,同樣煙煙靱靱,而且芒果鮮甜。


其他既都係白雪系列,即係雲呢拿汁,其實呢個我覺得好普通,無咩特別,如果真係要講特別既係,佢唔同平時出面食既甜品咁,用果汁做底,呢到就唔會係咁樣,感覺會比出面既有新鮮感既。


雖然滿記周圍都有,但我只鍾情西貢呢一間,可能入到西貢會有一種悠閒既心情,好舒服,食個甜品都寧舍滋味。

地址:西貢普通道10號A,B,C地下

La Maison

來既Lunch時間,突然好想不斷去試食新野,所以就找到一間樓上舖既法國私房菜,雖然係lunch set,但係質素一d都唔會將貨就價。每個星期都會轉既餐牌,係一個包餐飽、餐湯、前盤、主菜同飲品既set,而且仲可以以優惠價錢$28去追加一個法式甜品,整set價錢由$58-98不等,男仔都絕對食得飽,因為整個餐都好豐富。


一坐低,waiter就會放低一樽水,並且好有禮貌地向我地介紹是日餐牌,今日就有5個set選擇,我地一行7人,大部份都對西冷牛扒情有獨鍾,所以叫了6個西冷set,一個雞扒set。而且今日既頭盤係薯仔沙律,味道幾好,而且仲好大份。


餐湯則有兩款,一個係南瓜蓉,另一個係蕃茄湯,但係好奇怪地,單睇表面,基本上分唔出邊一個係南瓜湯,邊一個係蕃茄湯,唔講唔知,上面既圖係蕃茄湯,下面則是南瓜湯,再配上一個熱辣辣既新鮮麵包,十分美味。



主菜到了,西冷七成熟配薯菜,原來呢到次次俾既薯菜都唔定的,今次唔係薯條,而係薯餅,十分有趣,另外,仲有一件焗釀茄子。那件西冷牛扒,絕對唔似普通既貨色,食落juicy得黎又有味道,絕對唔會係將貨就價。


另一個雞扒食落好正,好嫩滑,表皮微微焦香,加上白飯及焗釀茄子,配搭還可以。


呢到地方雖然細小,不過環境都唔錯,多人時係會比較嘈,但係俾人既感覺好舒服。係一天繁忙既工作中,呢到會俾到你一個喘息既機會,十分悠閒。最緊要係食得開心,又放心。


地址:灣仔汕頭街2號廣泰樓1樓