2010年9月7日 星期二

大中華飯店

這間大中華飯台,一聽個名會覺得好"娘",但係那些食物款式絕對唔會"娘",我也是經朋友介紹黎試下。一去到時,俾佢個墟撼既情況嚇親,都已經夜晚9:00了,居然仲有好多人等位不特止,仲要坐埋係街邊,好彩一早book左位,但係都要等左一陣先安排到入座。

坐低後梗係第一時間睇餐牌啦,8版餐牌已經表明哂所有佢既招牌菜,當日我地一行7人叫了9個餸。第一個黎既就係鐵板黑椒豬手,一上枱,熱氣逼人,香氣撲鼻,十分吸引。食落就覺得d黑椒味好好食,不過隻豬手d肉就硬左d,但係都係好味既。




跟住黎既就係三樣炸既餸,第一個係琵琶豆腐,炸得脆口,外脆內軟,魚味好重。之後個兩個炸既餸真係不得了,黃金鮮魷十分好味,咸蛋黃完完全全帶出了鮮魷既鮮味,雖然賣相唔靚,但係味道搭夠。最尾個味南乳吊燒鱔,鱔身肥美甘香,肉質結實,證明好新鮮。上漿炸脆後,配上特製既南乳汁,真係好滋味。


接著我期待既清蒸花甲出場了,真的非常鮮甜,配上那個酸甜辣汁,真係出奇地合襯,可是不點辣汁更加吸引我,不知不覺間已食了5-6隻。另一驚喜是兩個炒菜,第一個係上湯煮菜心苗,個湯真係十分之鮮甜,因為用料頗多,我見到有帶子粒、竹笙、蒜子、肉碎同金華火腿,真係一d都唔吝惜,菜心苗索哂d上湯,十分入味,正!那碟看似普通既西蘭花炒牛肉,炒得好好味,牛肉嫩滑無渣。所以兩碟炒菜,我都係不斷食。


最後,叫了呢到最出名既臘味糯米飯,佢係上枱時係客人面前撈勻既,一邊撈,一邊加入材料,臘味既香氣四處飄散,真係令人更加流口水,食落飯粒煙靱,配料繁多,水準之作。如果鍾意食真正既生炒糯米飯既朋友就唔駛試了,因為佢近乎煲仔飯既質地,可能唔岩口味。煎韭菜餃只是普普通通貨色,所以不點也罷。


整體黎講,十分之滿意,仲有好多餸想試,由其是那道燒奶豬,希望下次可以試到啦。

地址:長沙灣福榮街539號地下