2010年9月29日 星期三

小酒窩餐廳

最近經朋友介紹,去到佐敦近尖沙咀警署一段既廟街,有一間外表平平無奇,但內有乾坤既小店,明明寫住係印度餐廳,點知食既野係Fusion,完全唔清楚佢究竟係一間咩餐廳,不過點都好,野食好味就是皇道。




一坐低,每人都有塊香脆既蒜蓉多士做餐前小食,睇完個餐牌之後,更加莫名其妙,明明食印度野,但係呢到最出名既係pizza,豬肋骨同risotto,今次叫了兩個pizza、一個risotto、一份豬肋骨同三個甜品。


上面個個pizza係四季薄餅,下面係芝士菠菜,四季薄餅不槐係呢到既招牌薄餅,味道清新,芝士多得黎又好味,下面那個就不過不失啦,材料相比之下,四季實在有好多材料,要叫一定要試下四季薄餅。


豬肋骨絕對係水準之作,味道岩岩好,唔會太酸,唔會太甜,而且d肉已經焗到好鬆化,一切落去,就可以輕易分開,我地食完仲想再order。


要數最騎呢既,絕對係呢個risotto,點解會有呢,我都唔知,不過佢煮得好好,唔會太硬,又唔會太淋,不過好似唔係好夠芝士,但整體都好好味。

黎到甜品既時候,我地叫左三個,第一個係cheese cake,食落去好似唔係用普通既cream cheese整,唔知係唔係用左羊奶芝士,因為有d羶味,不過幾好。第二個係藍莓蘋果酥配雪糕,呢個唔太好,好似將d麥維他整碎後擺上去咁。最尾個個係chocolate brownie,呢個朱古力味好濃郁,唔會太硬。


呢間絕對食得過,記住去試下。

地址:佐敦廟街283號寶發大廈地下