大閘蟹

十一月又係食大閘蟹既時候了，正所謂九月圓，十月尖，而家呢個時候梗係食公啦，那層肥豬膏般的膏，實在令人著迷。但係今年既蟹價比上年貴，而且市面買到Size大既蟹數目真係少之又少，基於這原因，選擇了食五兩蟹，過一過口隱。

今次買回來的是正宗太湖蟹，蟹身結實，肚雪白，蟹膏橙黃同白分明，金毛蟹腳，質素真係唔錯，值得再食。

先煮滾熱水，放下數張紫蘇葉，因為紫蘇葉能辟蟹既胜味。先反肚蒸一會，之後翻轉蒸多一陣，一盤美味既大閘蟹已可享用。

蒸完之後，蟹身由墨綠轉成鮮豔既橙紅色。雖然細隻，不過蟹腳都非常容易拆開取出蟹肉，揭開蟹蓋，蟹油已不自覺地流出，成枱都係油，看見鮮橙黃既蟹膏，真想連殼都食埋。經過一輪處理，可食用的部份已解剖開，其實只是除去蟹既腮同胃，可能好多人都唔知蟹既胃係邊，就係腮後面有塊白色好似蛋白既三角型物體，記住呢塊野係好寒涼架，所以最好不要進食。

掰開蟹身，先細味兩邊蟹膏，果然甘香無比，那層肥豬膏般的膏真係無懈可擊，之後，慢慢拆開蟹身，蟹肉一絲絲地細嚐，鮮甜無比，配上特製蟹醋，一再回味，因為蟹醋是可以引出蟹味，並且可以驅寒。

食完兩隻之後，飲番一杯老薑茶，既暖胃，又可增加驅寒能力，正。好多人都會買現成蟹醋，不過屋企人通常都自製，以鎮江黑醋、大量薑蓉、赤砂糖及生抽自行調製，所以比出面的更加能引出蟹肉既鮮甜。

整個十一月都係食蟹既好月份，要食趁手，未食既人可能會一試上隱，所以我都要係月尾時間再次品嚐多一次，可是不易多吃，因為膽固醇極高。

其實坊間也有好多酒樓同食肆供應大閘蟹，嫌麻煩的，可以去到這些食肆享用，不過始終沒有在家方便，而且質素有保證，連食相如何，都無人睇到，哈哈。