2010年11月20日 星期六

板長壽司

基本上,我好少會寫連鎖餐廳的,因為香港既餐廳QC唔夠嚴謹,做唔到間間都一樣味道,總會因廚師既能力有所高低,影響品質,今次都係因為呢個原因要講板長,好多人都話唔好食,但其實唔係每一間都好食,因為佢有十幾間分店,我暫時只係試過其中十間左右,覺得係好食既,暫時只有2-3間我覺得幾好既。

有時真係唔明點解係同一集團,經理可以同我講佢地入左唔同款式既海鰻,問佢點解燒到燶哂,仲死撐話用炭燒,呢間咁有特式既就係尖沙咀LCX內的旗艦店,雖然呢件事發生係半年前,不過我仍然梗梗如懷,當時叫佢換,成盤十舊海鰻只換左其中兩舊,我有影低相去比對的,成碟都係燶架。唉,真係唔明旗艦店既服務仲差過其他分店。

講回一間好的,位於九龍灣德福商場一期內這一間,出品覺得好新鮮,無論賣相同味道都幾好。其實我好鍾意食秋刀魚,前一陣子,秋刀魚係時令魚,叫了一盤秋刀魚刺身,肥美甘香,一放入口,鮮味即出,實在美味,但係好多人都會嫌佢腥,但只要係新鮮同清理好內臟就唔會腥了。



海鰻壽司係我另一至愛,呢款壽司由我係板前銅鑼灣店初初開時食過之後,每次必叫既壽司,熱辣辣既海鰻,配上海鰻汁,魚肉真係好軟熟,入口即溶。


柚子油甘魚壽司,柚子味不會蓋過魚既鮮味,而且魚肉肉質結實,不會一咬就散,柚子有提味作用。


仲有黎到呢到,點可以唔叫珍寶帆立貝壽司,大大粒既帆立貝,出面好多地方都食唔到咁大粒,可是是日售罄,唯有退而求其次食活帆立貝壽司,但真係高低立見,活既居然唔夠鮮甜,雖然肉質可以比得上珍寶的爽口,但係就完全滿足唔到。


海膽壽司,間中都會賣哂,價錢一D都唔貴,係勁多人食既壽司之一。反而佢地D三文魚壽司真係一D都唔得,塊魚生薄薄一片,無咩味道,而且色澤唔靚。反而三文魚醬油漬做得唔錯,有少少魚皮增加左煙靱度,漬過既魚肉,魚味比一般更濃郁,用火槍輕輕燒一燒,多了一份焦香。


小食方面,每次都叫燒玉子,而且必須要凍既,因為真係好好,蛋甜甜地,又結實,沾上豉油同Wasbi,回味無窮。最後,覺得咁多間壽司店,板長個豉油係做得最好的,味道清清地,又夠香味,又夠鮮味,每次差D想當水咁飲。


地址:九龍灣偉業街33號德福廣場一期F23號舖