2010年11月1日 星期一

Biergarten Fass

Biergarten Fass係Biergarten既姊妹店,開係隔離既地庫位,食既野當然同正店一樣啦,主打德國菜,環境好正,我黎呢到既目的梗係為左佢個大酒桶啦,有五個大酒桶卡位,可以影下相丫嘛。


黎得呢到,梗係要食燒豬手同啤酒啦,果然呢到既豬手非常之出色,比Kxxx Lxxxxx更好味,皮脆唔硬,好鬆化,一咬即開,d肉都好好,唔會太實,而且一早分開哂先上枱,方便大家食。D薯蓉好creamy,酸菜好正宗,加埋好好味。


一來到會送上一籃麵包,係法包來的,配上牛油一碟。


雜腸拼盤d腸就比較遜色,因為有d腸真係好普通,普通到好似金妹牌脆皮雞尾腸,不過其他腸都好好味,特別鍾意個種早餐腸,味道好濃烈,另外d酸瓜唔太酸,好好味。


除左腸拼盤之外,仲叫了小食拼盤,裡面包括兩款腸、酸瓜粒、莎樂美腸粒、火腿粒、芝士粒同漢堡肉。芝士粒好香,配上火腿粒同吃,好美味。酸瓜粒用黎消除莎樂美腸既油膩,相當好,而且送上啤酒,真是一大樂趣。


另外叫了一個特別菜式,燒牛小排配炒薯仔,牛小排香淋並著重肉味,有少少肥膏,十分之欣賞伴碟既炒薯仔,加上洋蔥同炒,味道好正,食完差d想叫多一碟再食。


黎得呢到,梗係要飲啤酒啦,呢到有四款啤酒,由黑啤至最涼既啤酒都有,全部都係麥啤,左起為最淡的,有塊檸檬吊下味,好清新,右邊為最重麥味的,而中間則是最適中,我最鍾意呢杯。


我十分之鍾意呢間餐廳,希望同多些朋友到來暢飲一番。

地址:尖沙咀河內道5號普基商業中心地庫