2010年11月17日 星期三

Hero Sandwich

Hero Sandwich 一睇個名都知係食三文治,呢到招牌菜 - 燒肉眼牛排三文治,非常吸引,我都係慕名專程入去試食,因為位置偏僻,對於外來人黎講,真係好隔涉,又唔近地鐵站,又唔近大馬路,要行到入大角咀大酒店個邊,唔識行既人,可能轉黎轉去都唔知係邊。

一黎到門口,望見裡而唔算太多人,環境望落都幾舒適,可是由於開放式廚房的關係,有股油煙味在店內,薯條係即炸既,所以一開爐炸薯條,就會有一股油煙味,證明抽氣做得唔好。不過又未至於大煙到要即刻離開既。




叫了招牌三文治,燒肉眼牛排三文治,成件三文治成幾吋厚,軟溶既芝士,配上一大疊薄薄的燒肉眼牛排切片,加上生菜絲及洋蔥,賣相非常之吸引。另外,薯條係即炸且連皮的,大大條,好好味。


燒肉眼肉汁非常之豐富,一邊食,一邊不停流,食到成碟都係汁,雖然肉質係好嫩,可是唔知點解無咩牛味,肉味好淡,真係只靠芝士同洋蔥既味道去帶出鮮味,個包係呢到自製既,所以內軟外硬,唔錯。


整個餐都幾好,如果牛肉多些牛味就更加好啦,有機會再入去試下其他,例如熱狗,好似都唔錯,不過最多人都係食燒肉眼牛排三文治。

地址:大角咀詩歌舞街83號亮賢居地下7-8號舖