同心泰國菜館

要係九龍城食哂所有泰國菜館，我諗都要一頭半個月，每條街都總有幾間，同心應該係當中算係出名個幾間，位於打鼓嶺道，新舖與舊舖只有幾個舖位之隔，味道差唔多，不過新舖環境梗係好d啦。

泰式拼盤有春卷、蝦餅、魚餅同荷葉燒雞。春卷幾好，蝦餅都魚新鮮彈牙，魚餅香料味十足，質感軟滑，最後個荷葉燒雞，我覺得醃得好好，肉質鮮嫩，沾上雞醬，百食不厭。

串燒沙嗲就分別叫了雞、牛同豬，三者以豬最好食，不過相比其他店舖之下，都係一般，唔太乾身。

本來好期待呢個胡椒炒豬頸肉，但黎到好失望，一來勁少鮮胡椒串，唔夠辣，二來配料仲多過肉，三來水汪汪，要乾身先夠辣同好味架嘛，記得好耐之前食過一次之後，都未食過呢樣餸。

咸肉炒椰菜苗，顏色艷麗，青蔥翠綠，咸度適宜，椰菜苗爽脆，好滿意呢個炒菜。

最後叫了一個蝦醬炒飯，不過點解唔同平時食開既，呢個炒飯，佢將d配料擺係碟邊，等食時可以拌入內，食落同平時個d真係有d唔同，感覺好得意。

整體而言，同心都係一個值得去既地方，雖然九龍城好多泰國食肆，但係每一間賣既食物都可能有D唔同，有分北泰同南泰，所以每一間都應該值得入去試一試。

地址：九龍城打鼓嶺道11-13號地下