2010年11月8日 星期一

金泰美食

每逢到九龍城搵食,都要費剎思量,因為實在太多美食擺在眼前,粵式、港式、日式、越式、潮式同泰式等等,而泰菜更加係九龍城紮根良久,現在計計埋埋都幾十間了,當中貴既、平既、高級既、地道既、泰北味、南泰味都應有盡有,而當中有幾間更加係推介之中既推介。

這間小店係九龍城有三間分店,其中一間只是一檔專賣燒烤既舖頭仔叫金泰沙冰,一間係開係太子道西的小舖叫金泰燒烤,座位加埋都係20個左右,另一間係最大既分店,可以坐上80人以上,後兩個舖頭都係賣燒烤為主,不過亦有一般既泰式食物,我每次到來都為著他們的串燒,除左醃得惹味之外,肉質仲好鮮嫩,唔會太乾太硬,沾上特製既沙嗲醬更加提升了一個層次。


今次叫了豬、牛、雞、腎、墨丸、蝦餅同稔肉各一串,本來好想叫埋雞心同雞肝,,不過無貨,所以無得食,各式各樣的串燒都好好食,只是稔肉我不太接受,那種泰式扎肉既味道,好重蒜蓉同酸酸地既味,而且賣相不佳。這裡既蒜蓉飽,並不是用法包,是用嘉頓那種小手指飽,內夾蒜蓉、蔥同牛油,燒完出黎好香,不過嫌太過少蒜蓉味,蔥味完全覆蓋,不過都幾好食。


另外,叫了一碗細既冬陰功,材料尚算豐富,只是海鮮不太足夠,只有蝦,味道只重酸,不重辣,顏色都幾靚。


青咖哩牛肉炒飯,這個一般,咖哩味辣,牛肉好靱,起初以為佢係牛鬆粒,一來到見到係一塊塊牛肉已覺不佳,不過好在味道不是太差。下次都係叫番蝦醬炒飯或者香草肉碎炒食好D,呢兩個都幾好。


蝦醬炒通菜,味道超捧,條條菜都青綠色,不會過老,而且蝦醬味濃郁,又不會太咸,唔錯唔錯。


壓軸好戲登場啦,就係燒雞半隻,味道正,D雞肉仲好鮮嫩,點些少沙嗲汁吊吊味,而且又大隻,真係好正。不能不提呢到既沙冰,都好好飲,最鍾意飲芒果沙冰,打得好似果汁咁,好多果肉在內,唔太稀,真材實料既保證。

地址:九龍城侯王道9號A地下