五代同糖

甜品永遠都係飯後既最佳配搭，無論中式、西式我都咁鍾意，熱同凍都有佢地個別既風味，五代同糖又是另一間以星級廚師做招徠既甜品店，不過今次呢間真係比其他做得出色。

我想呢到最出名既都是雞蛋布甸，基本上每枱都會見到佢地既蹤影，有人叫一隻，有人叫一盒，雖然一盒是供外賣用，不過店方也不介意妳堂食，搵埋三五知己，碰一頸蛋殼，別有一番意思。單叫一隻的是用一個玻璃蛋器皿配上焦糖底，外賣一盒那款的是用新鮮蛋殼盛載的，一盒六隻。質感軟滑，雲尼拿味道極香，亦極富蛋香，細嚐之下，發現布滿雲尼拿籽，正是香味所在。

蘋果酥係我最鍾意食既甜品，不過呢到既蘋果酥唔係唔好食，不過無左應有個份酸味，係過甜，佢個蘋果底用左D士多啤梨果醬整，好甜，雖然上面既牛油酥整得好好食，夠鬆脆，牛油味重，但係就係俾個餡拖累。

叫了兩個奶凍，一個係北海道牛奶，另一個係朱古力奶凍，兩個味道唔錯，朱古力係勁重味個隻，不過有少少似飲緊朱古力奶咁，直情係個隻味，兩者密度都好高，亦好幼滑，用黎震震下咁玩都幾好玩，哈哈。

除左呢D出名既甜品之外，我好欣賞呢個西米焗布甸，唔太甜，蛋味夠，而且個面焗得唔太濃，好鍾意。

榴槤班戟其實都係同出面差唔多，唔太出色，又唔太失色，好一般既甜品。

呢個雪花冰，沒有想象中咁差，不過又唔及另外好出名個間咁，不過不失啦，可能兩隻味太過簡單，朱古力同牛奶味，未見突出。

本來想問木瓜雪耳，可惜賣哂，只好叫桂花燉雪梨，可是味道原來都好，桂花味好香，食完好潤添。

整體黎講，呢間真係值得咁多人去等既，D甜品真係幾出色，可是某些甜品略嫌昂貴，蘋果酥實在細得可憐。

地址：尖沙咀加拿分道25-31號國際商業信貨銀行大廈地下8號舖