2010年12月2日 星期四

和光鐵板燒日本料理 (上篇)

市面上打正旗號做日式燒肉放題的店舖不多,但普遍都係食物質素OK,環境都OK,可是最重要個環係抽氣,好多都做得唔好,食完有時仲衰過食韓燒,但係和光既抽氣做得幾好,食完都唔會成身油煙,呢樣野好少係平價燒肉店做到。



除左環境優雅舒適外,食物質素都好,每碟份量雖然細小,但正因份量少先可以選擇多款,食燒肉都好肥膩,唔係食到太多。現在正做緊優惠,逢星期一至四,晚上八時前埋單,仲享有8折優惠,食完都唔駛200,非常抵食。而且每兩位客人奉送一塊安格斯牛扒同一個刺身拼盤。


主角出場了,一見到張Order紙就不斷剔剔剔,當遞單時已發現我差不多剔了一整張,十幾二十樣食物,可是我地只係得3個人,真係怕食唔哂,會浪費食物。幸好如上指出,每碟食物來到時,份量不是太多,我地3人密密食,最後都食哂所有食物。

第一次order既食物真係好多,有牛胸腹、牛肋骨肉、一口牛、牛舌、豬腩肉、豬頸肉、雞等等肉類,因為每款肉都有幾隻味,都真係不能夠每樣都試,所以最後只可以每款肉揀一兩種味來試,因為好多味道都會重複。

首推梗係牛胸腹,脂肪分佈均勻,顏色艷麗,雖然未達致入口即溶既地步,不過都相當好味,而且有幾款味道選擇,我試哂三款,覺得最好味都係果味同燒汁,因為鹽燒比較淡,同埋無另外兩隻咁淋,但係就比較滯。而附送安格斯雖然顏色唔太靚,不過肉質同味道都幾好,刺身只是一般貨色,幸好都算新鮮。


再來兩客牛舌,我地order左厚切牛舌同法式芥末籽牛舌兩種,雖然芥末籽味道新奇,但係就比較靱,都係厚燒牛舌更得我歡心,厚燒輕輕燒一燒,外脆內嫩,十分滋味,點上檸檬酸汁,去一去油膩,真係食多幾碟都無問題。


之後那個牛肋骨肉雖然好味,但由於食落辣辣地,同埋太重香料味,我最終只食了一小塊,另外一口牛,固然是一啖一粒啦,叫了燒汁,味道當然好味,而且唔會靱,火喉真係好重要,太耐真係會靱,太快又怕太生,每邊一分鐘左右,剛剛好,內裡juicy,外邊焦香。


叫了鹽燒黑豚、柚子豬頸肉、黑七味豬腩肉,各有各好,不過最唔鍾意個黑七味,其實只是七味粉加黑椒,我都係鍾意鹽燒多些,另外柚子味豬勁肉,柚子味重,十分香,淡淡既柚子香,更加引起食慾。鹽燒黑豚,燒到脆香,點一下燒汁,十分美味。


食完肉類之後,轉攻蔬菜類同海鮮類。