2010年12月6日 星期一

新九記粥麵

咁多篇食評居然無一篇講過粥,連腸粉都介紹左,點可以無粥既呢。講起粥,好多人病左個時才會想起食粥呢回事,可是平常都很少會食,其實香港賣粥既地方真係好多,特別係專賣魚粥既舖頭仲多。而粥亦分開好多類,例如潮州粥和生滾粥,而我對於生滾粥更加情有獨鍾,因為可以有好多新鮮材料一起煮,及第呀,艇仔呀,魚卜呀等等,煮完出黎,熱辣辣,係冬天食真係既保暖,又實際。

灣仔有一間以食粥聞名的粥舖,佢就係新九記粥麵,每逢放飯時間,門口總有一批人等著,目的就是一嚐這裡滋味無窮的粥,粥底好鮮味,而且好綿,可以選擇的配料何其多,由各部份既魚,以至新鮮既豬雜都有,當然普普通通既皮蛋咸瘦肉粥都有啦,價錢大約30蚊以上一碗,不過保證嚐過後,會覺得超值。

今天當然不例外,叫了一碗蠔豉皮蛋粥,碗內既蠔豉足足有一隻匙羹咁大,而且唔止一隻,係有四隻咁多,本來以為咁多隻,一定係d好渣既蠔豉,點知食落,味道超級濃郁。


魚片粥當然都係非常之鮮味,魚片剛剛好熟度,唔腥,又多蔥同薑。


終於等到講最好味既野啦,就係粥灼豬雜,可以揀位置的,食左兩次,一次剩食豬潤,一次係食粉腸拼豬潤,兩次都有叫潤係因為非常之新鮮同好食,剛剛好熟度,爽口,而粉腸更加正,食得出係新鮮貨,內裡仍然有粉的,而且一d苦味都無。


除左粥之外,呢到都有一般既粉麵食,叫左炸醬撈麵,酸甜辣好均勻,唔會偏向任何一邊。另外,呢到既麵可以轉做伊麵,好多地方都無伊麵供應,整體好好食。


其實呢到夜晚會變成一間用粥底做鍋底既店舖,雖然無可能同出面既火鍋店比,但係用粥底打邊爐就真係少有,配料基本上都係滑牛、魚同豬雜,不過樣樣都係新鮮貨,食完哂所有配料後,鍋粥先係精華所在,十分鮮味。

現在冬天到了,食粥正正就是時候,配合打邊爐,簡單係人生一大樂事。

地址:灣仔大王東街9號地下