2010年12月4日 星期六

泰成菜館

係銅鑼灣搵食,點可以唔去登龍街搵呢,除左附近既鵝頸橋街市之外,我想呢條街都係搵食既好去處,各式各樣既店舖林立,有潮州、泰國、車仔麵、粥舖,基本上應有盡有,而當中有兩間泰國菜,其中一間是泰成菜館。

這間舖頭門面沒有另一間咁靚,但係佢d出品都幾好食的,而且連而家好少有既糯米醲雞翼都有,先將雞全翼起骨,釀入糯米餡料,先蒸後炸,再切件上枱,鬆脆既外層,包著軟綿綿又不失咬勁既糯米,點上泰式辣雞醬,真係美味。


串燒沙嗲都唔錯,不過始終都係九龍城既金泰好食少少,雖然邊位有焦香,不過唔明點解其他地方就好似岩岩熟咁。(這張相用手機拍,所以比較朦)


螄庵經白灼後,鮮味到不得了,少少血水簡直係精華所在,點上特製既辣汁,不停口地食,直至成碟無哂為止,不過食呢類海產始終都係搵d有保證既店舖先好食,觀察所得,呢到都尚算企理,所以就order了。


最後,叫了一個蝦醬炒飯結尾,炒得飯粒分明,加入了豆角增加口感,上面舖滿了煎香了的蛋絲,拌勻後食,上面那幾片泰國臘腸,甜甜地,幾好味。


整體來說,食得過,不過位置過於迫狹,如果可以寬敞少少就好啦。

地址:銅鑼灣登龍街36號登輝大廈地下