龍鳳廚坊

香港其實有好多隱世食店，佢地無宣傳，地方唔方便，甚至可以叫做隔涉，但係出品非常之好，可能只有街坊或識食既人先識去，今次這間於太子與大角咀交界，位處大街與橫街之間的舖頭，有個好大既招牌，爆場度滿分，可是問過好多鍾意食既朋友都唔識，個名稱叫做龍鳳廚坊，甚有臥虎藏龍之勢。

當日一行12人一早Book了位，而且預留了一鼎招牌燉湯及一隻碌鵝。到來時，已見坐滿了人，心想不妙，唔通要坐街邊，幸好原來有個閣樓，這樣反而更加適合我地一大班癲人，唔怕嚇親路人丫嘛。

這間潮州食店沒有鹵水鵝，只有這味招牌碌鵝，整法是將整隻獅頭鵝，放入鐵鑊中，用汁慢慢旋轉鵝身最少二十分鐘，令到鵝身盡吸醬汁，所以這味碌鵝係非常之濃香入味。當隻鵝一上枱，當堂嚇呆了我們，原來一整隻鵝斬件後，仲大過一隻乳豬全體，但不過一會兒，各人已急不及待試食，由於這隻鵝油分充足，所以比較肥，但係一嚐之下，發現鵝肉異常嫩滑，沒有因不斷烹煮而令肉質變嚡，入味非常，真係一味必試既菜式。

另一招牌青欖豬脯雞腳燉湯，味道雖然清淡及清澈，可是不失清甜，十分滋補，聽說青欖同豬肺都對身體好好，所以大家都飲了很多，一鼎湯大約可以分到差不多20碗左右。湯渣則有一大碟，可是不明白點解豬肺的顏色是黑色的，不是白色的麼？真係令我地費解，同時亦令某些朋友疑惑能不能食用，最後大家都只是食了腫腳。

除以上兩味餸之外，亦有一味掛羊頭賣狗肉之作，名叫賽香肉，固明思義即係仿狗肉，香港不能食用狗隻，這裡大廚用了豬手代替，並以煮狗肉既方法去燜煮，成為這味香氣與味道並重既菜式。豬手非常軟滑，以大量香料去燜煮後，大家都食得津津有味，其間某位朋友真係以為香港有狗肉可以食，真係爆笑到極點。

許多人也以為潮州只有打冷菜式，其實仲有好多熱葷都好好味，其中最多人熟識必定昤煎蠔餅，這裡的蠔餅做得不錯，夠香脆鬆化，而且蠔仔都好大粒及數量多，每一口也有滿足感。除了蠔餅外，還叫了鮮茄九肚魚烙，十分特別，平時不能食到，是有季節限定的，基本上整個魚烙都是魚，可是由於九肚魚的質地十分滑溜，食落完全唔覺係魚，十分有趣，而且鮮茄增加了鮮甜味道，果然又是一味佳餚。

梅羔骨食落有點似糖醋骨，可是佢又沒有那麼甜，還帶有少少咸味，增加了不少食慾。墊底的炸菜葉，亦令朋友們回憶起從前，現在很多舖頭都不會再炸菜葉墊底了。

食了鵝，當然要食番味雞啦，今次叫了水晶雞，當然都是類似白切雞那樣，雞肉質地尚可，可是雞皮卻非常滑溜，沒有濃濃的雞味及鮮味，只是一般。

最後一味肉，亦是另一碟有魚作食材既餸，香煎金錢鱔，肉質彈牙，十分惹味，可是份量不多，多人食時，可能要叫兩煲才夠分。

總共有三個蔬菜，分別是啫啫芥蘭、欖菜肉鬆四季豆及蒸片炒豆苗，真的要介紹這個芥蘭，味道受香味固然十分之好，而且份量也是數一數二，從來未食過咁多芥蘭的啫啫煲。

最後叫了荷葉飯及糖醋煎麵，荷葉飯未上枱，已經從運送途中傳來了香氣，打開後，香味更加濃烈，看上去，飯粒分明，還有很多配料。而糖醋煎麵，老闆還特意教我們正宗食法，我到今日才知道原來糖醋煎麵是只煎一面，首先要先將沒有煎的那一面向天放，淋上黑醋，然後反轉，在煎好的一面放上砂糖，待砂糖溶了在麵上後進食，果然酸味與甜味混合在一起，真的非常滋味。其實呢一味煎麵餅是十分考師父功力，煎的不好，整個麵餅會散，可是又不能煎得太耐，因為會燶，控制火喉更加要了得，否則可能就要糟塌了一個麵了。

最令我驚喜的是，飯後會送上哈蜜瓜，可能我地人多，份量十分多。

朋友們都十分滿意這次的聚餐，還說以後多了一個晚飯的地點，我亦十分開心，找到了一間隱世食店。

地址：太子白楊街21號地下