2010年12月14日 星期二

泰式燒烤

繼續係九龍城尋找美味既泰菜,今次呢一間叫毒式燒烤既都唔錯,水準依舊好味,雖然店舖細小,可是人流卻很多,星期五六日經常都需要排長龍。呢到有一樣好特別的,是有一種類似韓燒樣子的火鍋,不過我地最終都只是叫了普通的食物。

諗都唔駛諗串燒點少得,由於在座有一位唔食牛的朋友,所以只叫了豬肉同雞肉,兩者味道都好,可是賣相不佳,而且瘀瘀黑黑,減少了進食的意慾。



但是生蝦一到來,食慾馬上回來,一看見美味的生蝦刺身,胃酸都分泌得旺盛D,食生蝦一定要有一個特製既辣汁,夾著生蒜同辣椒,沾上辣法,簡直美味,蝦肉夠甜夠爽,令人欲罷不能。


除左串燒外,今天好開心有朋友都鍾意食魚,叫了一條鹽燒鰂魚,一上枱,好似食潮州魚飯般揭起塊硬實實的魚皮,內裡一股香氣隨即飄出,魚肉岩岩熟透,沒有散開的感覺。比潮州凍食的食法更好,沒有了一般魚腥味。


期待已久的燒雞出場啦,每一間泰國燒烤店都是燒得特別耐的,可能生燒的關係,需要的時間比較長,燒得微焦的雞皮,嫩滑的雞肉,交織成一個美味的佳品。


其實鐵板蠔仔比人既感覺唔似泰國菜,簡單些來講,即是用鐵板盛著雞蛋炒蠔仔,下面墊著一大堆芽菜,混合來吃,真的是非常出色。


有魚、有肉、有蠔,又點可以唔叫個菜呢,蝦醬炒通菜,未上枱,香味已從遠遠飄來,食落更加惹味,令人食指大動。最後以一個泰式海解炒河作結,味道都係好正,大家都捧著肚皮回家。


整晚菜式都好,只是那個串燒沙嗲比較失色,但又不失好味,十分矛盾,呢一間舖仔絕對要去食。

地址:九龍城南角道33號A地下