四點金潮州料理

土瓜灣北帝街真係慢慢開始越黎越多食肆，其實係幾年前開始，兩邊都已經佈滿食肆，不過只是茶餐廳居多，現在唔同種類菜式都慢慢起頭，這間位於新山道的四點金正正坐落北帝街其中一個路口。

四點金係一間潮州菜，這間是分店，總店在佐敦。食物方面都算種類多，份量都足夠，味道不過不失啦。先講冷盤，豬腳凍味道幾好，份量頗少，碎肉都算多。潮式拼盤包括了鹵水鵝、鹵蛋、紅腸、墨魚同大腸，味道略咸，鹵蛋唔夠色。椒醬肉炒得太乾身，好似一d汁都無，味道都算好的。

熱葷叫了幾個，酸菜明爐魚，其實同泰式魚爐一樣，但潮式有呢樣野真係唔係好知，基本上條烏頭係一條發育不健全的，因為實在太細條了，肉有泥味。沙嗲牛肉芥蘭，炒得幾香，味道都唔錯，d芥蘭仲好翠綠。

花甲炒薄殼，惹味菜之一，不過我唔太鍾意食兩者炒埋一齊，他們說不能只炒薄殼，所以先叫了花甲同炒。招牌菜梅醬骨，味道清新，甜酸適宜，全晚至正呢個餸。

講左咁耐，居然唔記得左潮州名湯，胡椒咸菜豬肚湯，味道唔夠辣，只有咸味，唔太合格。相反地，芋蓉鴨係全晚No.2，雖然份量少，可是食得津津有味，最後再追加一碟，外層鬆化，一咬即溶，好味。

一個係蠔仔烙，另一個係水瓜烙，兩者都好似煎蛋餅咁，望落已經鬆化，咬落仲係實實的，兩者以後者好些，因為水瓜都有D鮮味，蠔仔好似唔新鮮咁，唔好。

潮式炒魚麵同麵線，炒得都幾好，味道唔差，食得過。可是那個糖醋麵，唔係應該煎哂兩面的嗎，這間只煎了一面，一夾上黎，只有煎好那面沒有散，沒有煎那面散哂，基本上應該食手藝，可是這間沒有可言。

最後，想食反沙芋，居然同我地講沒有，我覺得佢係想我地快D走，唔整者，而家D芋頭咁好，點會無芋頭賣，芋泥又有。唯有叫了一個蛋散，可能因而得福，這個甜品整得好好，好鬆，一咬即開。

整體而言，不過不失，比他好的，還有很多。

地址：土瓜灣新山道18號地下