小店

這間小店現在已經不能再叫做小店了，本來只是一間很細既店舖，可是現在已經有分店，並且越開越大了，我今次去小店既原因不是為了食晚飯，而是去對面的細舖食甜品，一早已經對佢地既甜品略有所聞，裝飾整得好靚，正好撞岩有朋友生日，就到此享用甜品。

店內氣氛幾好，有柔和既光線和播放著音樂，感覺舒服。甜品以西式為主，沒有一般以果汁做既西米撈之類，好像去高級餐廳咁。我地三個人Order了四個甜品，每個甜品一黎到，居然唔係品嚐，大家係不斷左影右影，因為實在太靚了，雖然甜品師父以簡單既顏色同線條畫公仔，可是配合甜品既擺位，就像一幅藝術品咁。

首先來到既甜品，係我鍾意既檸檬撻，甜酸適中，餅底都幾重牛油味，焗得唔錯，配上一些甜美生果，味道更加豐富，碟上畫了一棵蘋果樹同草地，俾人感覺好清新。

之後係芝士蛋糕，口感同味道都好似係紐約芝士餅，芝士味濃郁，質感結實。碟上那個蟹圖案十分之可愛。

這款正正做生日蛋糕最好不過，第一我朋友好鍾意心太軟，第二容易插上爉燭，切開時流出來既感覺好精彩，大家記住要事先同師父講明係邊個甜品寫字同寫咩字，師父就會跟隨你既意思發揮。這個甜品，朱古力味香濃，亦有流漿，可是覺得太甜。

最正既甜品出場啦，這間即焗既芝士撻配雪糕，味道一流，最好食係呢個，個撻無論質感同軟滑度都似十足蛋撻，加了芝士入去，味道更加香口，由於咸味重過甜品，撻面上灑上少許糖粉增加甜度，雪糕用Cone裝上，溶左既雪糕唔會流到撻底，夠細心。

如果想俾驚喜生日既朋友，這間小店係一個唔錯既選擇，因為正正對面仲可以食埋餐飯，之後Order甜品，佢會送過去，十分方便，而且味道仲幾好添。餐牌好得意，係一幅一幅圖，可以睇完先叫。

我覺得食物質素都唔錯，可以試下，而且慶祝一流，因為店邊既裝飾真係正。

地址：九龍城侯王道2B地下