2011年3月8日 星期二

名門私房菜

灣仔真係有好多食肆,私房菜更加特別多,要數其中比較出名的,名門都可算是一份子,老闆是楊貫一的其中一個徒弟,這個我也不知道是否,不過可以肯定的是鮑魚正是這裡的招牌菜,但係平常午餐又點會可能叫鮑魚做餸呢,所以都係叫番懷舊的順德菜合我們意。

平日午市自選套餐係一個好抵食的套餐,沒有加一,已有老火靚湯、自選小菜、時蔬、白飯及糖水,一個人食都絕對飽肚。今日同一大班同事去食,大家都各自從四十多款菜式中揀選自己喜歡的食物,加加埋埋都有十二味菜,十分開心。

然而每次到來,有幾款是指定菜式,以名門秘制骨為首選,每次也是要兩個份量,所以出來比較大碟。可謂秘制骨,即是陳皮骨,未放入口,已可聞到陳皮的甘香,咬落肉質十分嫩滑多汁,外層脆口,食後有股甘香味在口內迴旋,真的十分滋味。




另一道招牌菜必定是順德焗魚腸或者雞蛋煎魚腸,無論何種煮法,皆非常美味。這味的重點是絕不能腥,魚腸及魚潤也清洗的十分乾淨,果然一點腥味也沒有。兩者之中,焗魚腸有脆口的表層,很香口。但煎魚腸也有它的優點,沒有那麼熱氣,而且有點像煎蠔餅般,兩者味道差不多,但口感上卻有極大差異。




蒸豬肉餅大家就食得多,但蒸牛肉餅則不是隨處可食。這味欖角陳皮蒸牛肉餅,在中醫角度內是有食療作用,補血補氣之用,而在我們眼裡則是一味非常出色的菜式,富有陳皮及欖角特有的香氣,牛肉餅結實而不過硬,三者混合後,產生了妙不可言的境界。




試想一下,一隻燜得軟稔的鵝掌,浸在一煲非常濃味而且杰的鮑汁內,味道一定無得頂。這煲鮑汁炆鵝掌每一隻都相當入味,入口即溶,而墊底的生菜更加係精華所在,索滿了鮑汁鵝掌的鮮味。




另一順德的招牌菜煎釀鯪魚,做法繁複,先將一條鯪魚拆皮起肉,魚皮不能破,然後將魚肉打成滑,混和調味後釀回鯪魚皮內,再香煎後配上特制的豆豉汁。雖然這個個程繁複,但確是一道美味的菜式,完完全全食得出那份鮮味及手功。




但是日最多人捧場的則是那碟桂花炒魚肚,不要錯誤地以為係用桂花來少,只是雞蛋,炒完後像極桂花般美麗,是一味考師父功力的菜式,炒得都算不錯,味道幾好,不會過淡,又不會過乾。




山楂咕嚕肉酸酸甜甜,用上半肥瘦排骨,令質感更加甘香美味,十分適合來送飯。反而紅酒炆牛筋腩有D失色,雖然有好香的酒味及燜得稔身,但整體味道偏咸,只是一般貨色。




在眾多煲仔菜中,叫了兩個豆腐煲,一個味濃,但另一個更加濃味,蝦子竹笙豆腐煲算是口味淡少少的,食得出有幾味蝦子的鮮味,竹笙吸入醬汁的味道後,更加鮮甜可口。而咸魚雞粒豆腐煲,未上枱前,已從遠處飄來了一股咸魚香氣,味道惹味,睢粒嫩滑,而且不會太咸,又是一道送飯既佳品。




最後的一個沙嗲粉絲海蝦煲令我們要捧著肚子走,沙嗲夠惹味,粉絲盡索沙嗲海蝦汁的精華,更加美味,但蝦隻偏細,很難拆除蝦殼,所以剩下很多蝦沒有人食用。




由於多人的關係,油菜是用一隻大盤上,是一碟白灼油麥菜,味道淡而無味,大家都只是食一兩條就放棄,因為實在沒有味道,失敗。

最後,還有糖水送,是南瓜露,味道不是太甜,清清地,正好來解一解頭先個餐既肥滯感覺。其實食飯前,每位都會有一碗老火靚湯,還記得第一次到來時,那碗非常甜美的蘋果燉生魚湯,令我一試難忘,好可惜,之後幾次來到都是不同款式,但都要說一句,呢到既湯真係好好飲。


來這裡食飯,餸的份量都算大碟,每次都會好飽,而且座位與座位之間好多空間感,感覺舒適,十分適合一大班朋友慶祝。

地址:灣仔灣仔道83號2

1 則留言:

  1. 似乎呢餐平均都唔錯
    lunch set 幾多錢?

    回覆刪除