2011年2月7日 星期一

三木韓國料理

呢排無咩胃口,轉食刺激性野來增加食慾,韓國菜正岩口味。在尖沙咀內,有無數咁多間韓國料理店,有平、有貴、有平民、有高尚,適隨專便。而三木係當中算是一間比較大型的韓國料理店,位於堪富利士道內的一幢大廈的2樓,以賣傳統韓食為主。




打開餐牌,花多眼亂,每樣食物的圖片盡入眼簾,一時之間也定不了案,唯有從最簡單又最多人食的食物埋手,韓式炒年糕、燜牛肋骨、石頭窩飯、海鮮煎蔥餅、牛什清湯。起初以為份量,需要再order,可是食完後,大家也飽上心口。




最欣賞韓式炒年糕,紅噹噹,加上少許綠色及黃色,顏色美麗,味道更加一流,甜中帶辣,當中有一片片啡色的食物,其實就是韓式魚蛋,當所有材料拌以辣醬炒後,配以煙煙靱靱的年糕再炒,實在增加不少食慾。




另一推介是炆牛肋骨,所有牛肋骨已經炆得入哂火喉,軟滑無比,最重要係有牛肉味,配料亦相當入味及稔身,成枱人反而爭相搶吃蘿蔔,連平時唔食蘿蔔的我都加入戰團,可想而知,是那麼好味。最後連醬汁也給朋友伴飯吃清光。




略嫌海鮮煎蔥飯不夠多材料,而且海鮮分佈唔平均,一塊可以好多,另一塊可能好少。但煎到脆邊的餅確實係好味,沾上特製的辣法,令味道更加突出。




雖然石頭窩飯好多地方都有得食,可是這個什綿石頭窩飯就真係正,材料多之餘,石頭窩亦好夠熱,不消一會,已經有一層層薄薄的飯焦形成,實在非常脆口。加上侍應純熟的技術,已經將所有材料及醬汁與飯拌勻,每一啖都有均勻的材料非常美味。




最後,以一個韓式牛什湯作結,但好可惜,全晚唯一失望之作。雖然未食過真正的韓式牛什湯,但這個味道好淡,而且牛什好靱,一D都唔好食。




其實這裡的前菜都唔錯,有八小碟,唔夠可以refill,其中最欣賞那碟薯仔,夠入味,又夠稔身,食落粉粉地,唔錯。




另外有一碟醋青菜,絕對係開胃口的良好前菜,入口酸酸地,湯出微微的辣,而且青菜仲好爽脆,正,食完後,胃口大開。




不要看輕這碟銀魚仔,係一D都唔腥,而且仲好鮮味。




埋單前,會有水果供應,幫助消化,是晚每人也是百六蚊左右,價錢不貴,食物質素好,是一間可以得閒來食的韓食店,下次必定要試下韓燒先得。


地址:尖沙咀堪富利士道12-16號宏貿發展大廈2樓