北京樓

京菜係香港係不可或缺既，一味北京填鴨已經俘虜左好多人，北京樓既填鴨水準真係好好，但係其他菜式就，好普通，我每次都係為食填鴨而去。不過，佢既乞兒雞亦非常好食，乞兒雞又名富貴雞。

鴨舌味道麻麻，但夠爽口，素鵝同雞絲拉皮都係普普通通，基本上D冷盤都不太好食，而且都好細碟。

蔥爆牛肉，味道算淡，平時水準以下，碟糖醋魚更加賣相嚇人，好似受幅射影響咁。

但係碟賽螃蟹就整得十分之好，味道好，夠滑口，不過無左隻蛋黃好似爭少少咁。鮮茄蝦仁鍋巴比想像中平常，因為覺得個汁好假，睇落去都似色素居多。

主角出場了，填鴨鴨肉鮮嫩，鴨皮脆卜卜，味道好好，仲要即席係客人面前片皮，送到時仲熱辣辣。

最尾食埋呢個醬肉炒飯，炒得乾身，好快就俾人食哂。輪到甜品了，棗泥鍋餅煎得好好，皮夠薄，又夠香脆，甜度剛剛好。拔絲香蕉同蘋果，果然香蕉係好食過蘋果的，以前呢到整得好好，而家D水準都差左，唯一值得嘉許既係佢用忌廉黎整，比用冰水整多了一份香味。到最尾，叫了桂花酒釀小丸子，有香噴噴既桂花香，又有酒釀既濃味，食完個心都開心哂。

地址：尖沙咀梳士巴利道3號星光行3樓

和宴

香港真係一個美食天堂，隨時隨地都可以搵到一間食店，我諗香港最多既唔係中式就係日式架啦。

好多人都鍾意食日本野，但係一提到燒烤，佢地都有個錯覺就係，所有燒烤野都係韓國野，其實佢地既分別，係清淡同濃味之分，日式烤肉會比較清淡，韓式會比較濃味。

係尖沙咀廣東道一座食廈內就有一間很好既烤肉店 - 和宴。食和牛一流，雖然價錢一D都唔便宜，不過質素十分之高。

雖然我今次只係去影左午餐Set lunch既相，不過都已經非常之出色。d牛肉紋理均勻，肉味濃郁，輕輕烤一烤已經非常美味。

蓮香樓

蓮香樓係中式老牌飯店之一，係香港有幾成七十幾年歷史，佢既蓮蓉係香港第一家，所以呢到既蓮蓉產品係好出名既。

成圍菜都幾一千左右，真係十分之抵食，味道都係幾好架。

下圖係呢到既冬瓜盅，味道清幽，香氣撲鼻，真係消暑一大佳品。

呢碟係金錢雞，一睇就咩胃口都無哂，係全晚最無人食，同埋賣相最差既，佢做得太過肥膩啦，食落口成口油，差字都唔夠形容。

煎釀鯪魚就普普通通啦，不過覺得佢煎得好乾，如果濕少少，會好開心。

全晚只鍾意食既兩味菜，生炆班翅尾，整得真係好好味，D翅骨脆卜卜，可以食埋，D魚肉都好鮮嫩，成班好快就俾人清哂，呢碟菜式係要預訂架。另一味吸引我既就係八寶鴨啦，功夫繁複，將D八寶料釀入隻鴨內，佢既味道就好似隻粽咁，不過D鴨肉同皮既味融左入D八寶料到。

其實仲有好多菜架，不過搵唔番D相，呢到整既琵琶豆腐好好食，金銀蛋浸菠菜既顏色都好鮮綠，做得唔錯。

地址：中環蘭桂坊威靈頓街160-164號

甜蜜蜜甜品專門店

食甜品又係香港人既其中一部份，以前D人就話飯係食水果，而家就係一定要食甜品先安落，講起甜品舖，又係成行成列咁，梗有一間係附近，呢幾年有好多地區甜品舖衝出佢地原本既地區。呢一間都唔算衝出的，不過佢地本來就唔係坐落尖沙咀，佢前身係紅磡既。個時為左一碗酥皮豆腐花，成日去幫襯，呢間就係甜蜜蜜啦。

下圖個個就係必食既炸香芒春卷伴芒果沙巴翁
，熱辣辣，好好味，皮好脆，點埋個凍冰冰既芒果汁，再加埋個個甜甜既沙巴翁，真係正。

黑白朱古力梳乎里配上雪糕，我覺得普普通通啦，不過都好重朱古力味，可能我本人唔係太鍾意食梳乎里既關係，不過又係一冷一熱，真係好襯。

呢到仲有好多正既甜品，不過未能盡錄，大家記住要去試。個人建議唔好太多人去，唔係搵唔到位。而且間舖唔係太大，又太多人去食，好迫，同埋等位時間都唔短架。

地址：尖沙咀厚福街5-6號地下2號舖

好時沙嗲

九龍有邊間海南雞好食，當然首推好時沙嗲啦。呢間舖頭個位置都幾偏僻，係一個好舊既商場內。

o黎到呢到，梗係要食佢出哂名既沙嗲同海南雞啦，價錢好公道，一D都唔貴。海南雞雖然賣相唔鮮色，不過都好嫩滑，都好新鮮。可是唔知點解覺得好少唔係好夠雞味，但係要讚既係佢D醬汁，因為我食海南雞都係鍾意食星洲既黑豉油。食海南雞梗係最好配埋油飯，D飯真係好好，好夠味道。

沙嗲價錢便宜，可是太細串了，可以大串多少少就好，沙嗲真係做得好好，個沙嗲醬又惹味，真係想叫佢俾多碟我地。

星洲炒蘿蔔糕，我嫌佢炒得太散，好碎，但係都係好食既，因為D配料惹味。此外，開頭為左食咖哩牛腩就叫左油酥餅就相得益彰，不過真係好可惜，唔太好食。

蝦喇沙，味道好鮮，湯底蝦味重，配合椰汁既味，都真係幾好味。總括黎講，為左食海南雞和沙嗲就可以了。

地址：尖沙咀麼地道63號好時中心144-148號舖

小曼谷泰國美食

又到九龍城搵食啦，今次去到一間門口永遠都咁多人既舖頭，小曼谷，睇個名都知係食泰國野啦。

呢到既人龍長期都咁多人，次次都要等，我覺得呢間既串燒同沙冰係好好。生蝦刺身必食啦，夠爽口，又夠彈牙，價錢一般啦。串燒有好多款式俾你揀，味道好正，唔駛點沙嗲汁都咁好食。食雞全翼雖然麻煩，但係都會食黎食，因為燒得好好，同埋我好鍾意食燒腎，外面脆卜卜。

可能有好多人都唔會食泰國沙律，其實係一樣好好食既野，每份沙律都係人手逐份整既，由將D香料落個盅到磨，到上枱，每份都要經過一輪步驟，而且酸酸辣辣好開胃。下圖就係青木瓜絲沙律。

突然心血來潮，好想食呢到既明爐魚，揀左烏頭，配上D酸肉碎湯，又係一醒胃菜。咸魚炒椰菜苗同金邊粉都係OK既。

雖然呢間舖D野幾好，不過近期水準有向下滑跡象。D野唔知點解真係無咁好食，串燒仲可以保持水準。我會再去食，睇下有無改進。

地址：九龍城南角道8-10號

富記飯店

香港都好多名人飯堂架，富記係其中一間，好多明星都去。呢間飯堂D野都幾有創意架，好似片皮雞，旭日初升之類，旭日初升係咸蛋黃帶子，平時都係咸蛋黃蝦個D，呢間就將蝦轉用帶子，感覺新鮮好多。

一開始，就講下旭日初升同黃金蝦先啦，咸蛋黃帶子真係幾好，雖然無左黃金蝦既脆卜卜，不過蛋黃同帶子既鮮甜，配合得好好，黃金蝦就更加好食，平時有D地方整到唔可以成隻食，但係呢間整到可以成隻擺入口，而且大小剛剛好。(D相影得唔好)

南記飯店

一提到九龍城，就會發現係一個美食天堂，林林種種，集合了各家的美食，而泰國同潮州食物就更加多，今次呢篇就係關於潮州野，雖然佢既名字唔夠其他老牌咁出名，但係都好多人幫襯。

打冷野都係平常可以食到既，只是咸雞就唔係咁多地方有供應，不過好似白切雞咁，只是多些咸味，D鵝片就片好嫩滑，條魚飯就好多黃油，好美味，墨魚拼大腸就好夠味道，而且我鍾意墨魚既顏色，絕對無上橙色，大家都知道啦，出面十間有九間都上了橙色。

接下來，有個值得推介既湯，蕃茄紅衫魚湯，但係呢個湯都唔明點解會係潮州野到出現，仲要係熱賣食品，唔通佢係潮州人所創出黎，不過佢地煮得真係好好飲。

椒鹽九肚魚，炸得唔夠喉，蠔餅都唔係太好食，反而個蟹同蝦棗做得幾好，豉椒聖子好夠味，炒得好好，個沙嗲牛肉芥蘭亦都好夠味，但係個通菜好多"水"。

潮式炒麵線好好味，不過太多油，我覺得水瓜肉碎煮魚鰾真係好好味，我差不多食哂成碟，另外，最後梗要食番個蠔仔粥黎完結啦。

南記既份量好大，價錢公正，食到好飽，不過環境就好一般，唔好期望D人好斯文，同好好服務。

地址：九龍城衙前塱道4號地下