小弟第一篇就寫自助餐啦，呢間自助餐係我最近幾次覺得最好既一間，位於炮台山油街既一間五星級商務酒店 - 港島海逸君綽酒店。可能一提到海逸酒店，好多都以為呢間係北角海逸(大酒店隔離個間)，不過就百分之一百係錯既。呢間絕對比北角個間好上百倍。
哈哈，入真題啦。雖然呢間酒店既Dinner Buffet 都唔平，一至四收438，五至日收468，但以咁既價錢食到好多正野就真係算超值啦。
頭盤海鮮真係好多選擇有開邊波士頓龍蝦，生蠔，青口，蟹腳等等。生蠔你拎一隻，佢又擺番一隻落去，完全唔駛驚佢REFILL得慢。
之後刺身櫃亦有驚喜，普通既三文魚，吞拿魚之類梗係有啦，但居然連海膽同帶子都有，我食左勁多。大家可以望下，一舊舊啡色既係鵝肝黎架，我又不知食左幾多舊，雖然SIZE只係得一小舊，不過REFILL得都好快架，食到最尾我都可以不斷拎。而且D Coldcut 真係好多，仲有Prama Ham，食多幾塊，咩都回本。
熱盤都好多架，燒牛肉，燒春雞，芝士焗龍蝦，羊架，即炸天婦羅等等，因為冷盤太吸引了，已經無咩位置去食熱盤，最重要梗係留肚黎食甜品啦。
除左以上既食物之外，每位都會奉送鮑魚仔一隻。
甜品既主角梗係MOVENPICK雪糕呢，有十二種味道，另外仲有梳乎里，燕窩蛋白焗鮮奶和一件件既細Cake，細細件可以試多幾件。
講完食物，梗係講下野飲啦，呢到既紅酒、白酒同汽水係任飲既，白酒用冰盤鎮住，夠哂冰凍，好易入口，唔錯唔錯。睇到呢d，係唔係覺得468係超值呢。
地址：北角油街23號港島海逸君綽酒店3樓
沒有留言:
張貼留言