靚粥工房

就在九個月前，不嬲鍾意食的我受一個blogger的blog影響，覺得大家都係好食之人，點解人地可以咁有恆心去到邊影邊食，最重要的是還會寫文章來分享，但係我就永遠食完就忘記了，所以就在2010年7月2日那一天，的起心肝放上了我第一篇的文章，不經不覺，我也有二百多篇了，對於一向懶散的我，終於有一樣野可以同人講，我都可以有恆心的，希望之後我不會又半途而廢啦。哈哈。

好多人都問我點解可以搵到咁多好野食，其實大家身邊一向都不乏渠道知道美食的存在，我大多都是從這些渠道找到的，但也有些是拜謝我身邊的親朋戚友，佢地都有好豐富的食歷。

今天寫的這間，我就是在飲食雜誌留意到的，一向鍾情於新鮮魷魚的我，就專誠到了佐敦一間新開的食店品嚐，專賣塔門魷魚，而且還是非常新鮮，原因是老闆的媽媽是負責提供第一手最新鮮手釣的貨源給食店。

這裡的招牌一定是新鮮的塔門魷魚及海產，先來一碗塔門魷魚鯪魚滑粥，粥底很鮮甜，材料很多，可是並不夠軟綿，而是類似碎牛粥般，有d米粒，據估計應是打碎了米才再煲粥，所以出來的結果不是軟綿的，但也有是老闆專登煲成的，等粥有些口感。但魷魚非常爽滑且鮮甜，鯪魚球食到一股新鮮的魚味，並不像擺了很久，而是新鮮攪出來的味道，而且不添加太多調味，比人一種健康的感覺。

另一碗是三滑粥，內有馬交魚滑、蝦滑及鯪魚滑，一睇就知道絕海產粥，味道鮮甜得可以想像，馬交魚滑即是類似潮州的魚蛋，彈牙之餘，亦有足夠的魚味。鯪魚滑不用再說，當然好新鮮。最後的蝦滑真的意想不到，非常弹牙，而且鮮味十足，完住不覺有加入其他肉類般，好像絕蝦肉打成，所以這碗三滑粥也不錯，下次必食金銀蛋蝦滑粥。

剩食粥一定不夠，叫了一碟蜆肉蒜香炒麵，炒麵最重要當然是炒得乾身唔油，碟底差不多沒有多餘的油，真的極考師父手藝，再者夠哂鑊氣。當中的蜆肉份量比預期多，食極都有，由於加入了金蒜同銀芽同炒，使味道更加香濃。

食極都唔夠喉，看見鄰枱食煎蝦米腸食得津津有味，又叫了碟試下，另外還叫了碟蘿蔔糕，兩者均煎得香脆可口，腸粉唔錯，夠滑溜，但蘿蔔糕應是自家製，味道都不錯的，可是唔夠蘿蔔味。

其實今次到來，除了為魷魚外，還想試鱆紅魚雲粥的，可是沒有貨，唯有等待下次到來，希望會有供應啦。

地址：佐敦上海街24號1A號舖