龍鳳廚坊

香港其實有好多隱世食店，佢地無宣傳，地方唔方便，甚至可以叫做隔涉，但係出品非常之好，可能只有街坊或識食既人先識去，今次這間於太子與大角咀交界，位處大街與橫街之間的舖頭，有個好大既招牌，爆場度滿分，可是問過好多鍾意食既朋友都唔識，個名稱叫做龍鳳廚坊，甚有臥虎藏龍之勢。

當日一行12人一早Book了位，而且預留了一鼎招牌燉湯及一隻碌鵝。到來時，已見坐滿了人，心想不妙，唔通要坐街邊，幸好原來有個閣樓，這樣反而更加適合我地一大班癲人，唔怕嚇親路人丫嘛。

這間潮州食店沒有鹵水鵝，只有這味招牌碌鵝，整法是將整隻獅頭鵝，放入鐵鑊中，用汁慢慢旋轉鵝身最少二十分鐘，令到鵝身盡吸醬汁，所以這味碌鵝係非常之濃香入味。當隻鵝一上枱，當堂嚇呆了我們，原來一整隻鵝斬件後，仲大過一隻乳豬全體，但不過一會兒，各人已急不及待試食，由於這隻鵝油分充足，所以比較肥，但係一嚐之下，發現鵝肉異常嫩滑，沒有因不斷烹煮而令肉質變嚡，入味非常，真係一味必試既菜式。

沾仔記

沾仔記呢個名，好多人都聽過或者幫襯過，可是究竟有幾多人知道邊一間先係正舖呢，不過要數最為人熟悉的，應該就是中環的沾仔記了，每逢Lunch都大排長龍，可是店內款式就只有三樣餸，分別是鯪魚球、牛肉同雲吞，可配上麵、米或河，湯底清甜，聽說是加了羅漢果煲成，所以食碗麵都如此講究。另外，都可以說成全中環最抵食的麵店，平常人家賣緊幾十蚊時，這裡都只是二十左石。

一個餐牌已寫上了整間店舖既食物，鯪魚球、牛肉和雲吞，客人只是要幾多餸而定。今次叫了一碗三寶麵，鯪魚球爽口彈牙，一d都唔腥，牛肉依舊有肉味並滑口，雲吞大大粒，蝦多肉亦多，成粒雲吞都要兩口再吃得完，以咁既價錢，食物質素都幾好。

除左麵食之外，都有油菜供應，平常麵舖起碼都有兩至三樣可供選擇，這裡永遠一日都係得一種，今次的是菜心，菜心都好清甜，無渣。飲品都是汽水及豆漿，豆漿唔太甜，以6蚊既價錢，算有所交待。

不過黎得呢到食，都係速戰速決型，食完就走，完全唔會有時間俾妳慢慢hea。

地址：中環威靈頓街98號地下

小肥牛火鍋活魚專門店

天氣慢慢轉涼，最適合去打邊爐啦。香港實在有太多火鍋店，要試勻都可能需要一年半載，大家可以去佐敦近尖沙咀方向同九龍城，真係開到成巷成市，大家都為左搶生意，不斷推出優惠或新奇既火鍋湯底及配料，所以邊間有特別既湯底都吸引到客人去幫襯，而小肥牛火鍋活魚專門店就主打活魚刺身既火鍋店。

尖沙咀分店既位置在亞士厘道的一個地庫內，落到去環境格局都幾好，枱與枱之間都有一定既距離，唔會太過迫，而且光鮮整潔。坐低之後，就開始點食物，由於其中一位朋友有活魚coupon，所以即刻同侍應order一條活魚刺身，當晚只剩下倉魚，並沒有石蚌，因為送的關係，所以都要了。而且係枱面既墊枱紙發現有無糖Asahi啤酒做緊特價，都要了兩罐試下味道，普通版個隻就飲得多，呢隻隻味真係淡好多，有D似BRUEWIH既味道。另外並叫了支德國Schneider Weisse既麥啤飲，呢支味道真係正好多，飲完勁順喉，平時去德國餐廳都會飲呢隻啤酒。

原來第一碟黎既係碟刺身，開初真係估唔到咁大盤，我地四個人都嚇一跳，而且大家開始時驚倉魚好腥，點知原來係好鮮甜，一D都唔腥，三爬兩撥已經將佢消失得七七八八，食完都仲見到條魚個口仲開開合合，此時大家都心感好殘忍，不過原來活魚刺身D肉質係咁結實同鮮味。食完刺身，諗住佢收走啦，侍應反問想將剩餘既魚頭、魚骨同魚尾點樣食，可以斬件當火鍋料，亦可椒鹽炸黎食，最後我地揀了椒鹽，味道都真係唔錯。

戲肉出場了，就是火焰花雕肥牛粒蟹鍋，呢個鍋需要在放湯前，以小火炒勻配料，增加香味，傳應慢慢點火，之後不斷轉動鍋裡的食材，直至香氣滿溢，即放下上湯煲滾，十分像堂煎食材咁。花雕肥牛粒雖經兩種烹調，但一D都唔靱，而且仲好幼嫩同好重酒香，鍋底用上的蟹是花蟹，所以肉質鮮甜，而且都算多膏。

待湯煮熱，已急不及待將D丸類、餃類和一些比較難熟既野放入去，其中覺得以四寶丸最好，包括鯪魚球、墨魚太、牛丸同豬肉丸在內，鯪魚球同墨魚丸勁爽口彈牙，而且鮮味十足。牛丸就比較遜色，可是都幾好味。豬肉丸比想像中更加好，好耐都未試過食新鮮打出黎既豬肉丸了，覺得好好味。

而一系列火鍋料中，個人比較喜歡炸響鈴，因為一放入湯幾秒，即可食用，外軟內脆，而且索入了上湯既精華，簡直係佳品。

另外，鱔片非常之新鮮，肥美鮮甜，肉質可口，雖然份量唔多，不過都覺得抵食。

最後，怎可不提至歡喜的肥牛呢，叫了牛脊位，雪花分佈平均，軟滑可口，而且肉味都濃，因為唔同位置的肉味會有所不同，脊位是比較雪花肥同肉味唔太濃的，而且每兩位仲可以追加十蚊碟既特價肥牛，亦有花雕肥牛可供選擇。

菜類都多款式可供選擇，最近愛上食皇帝菜，佢有蓎”高”菜既特殊味道，但又比它更加鮮嫩，放入湯內灼一灼，美味無比。精華已溶入整鍋湯，應該要加一個公仔麵索下湯汁來食才好，最後都沒有，因為太飽。

整晚我十分滿意，侍應會不時過黎加湯，食物新鮮，仲有就係環境各方面都唔錯。有時間再來試勻其他特式花鍋。

地址：尖沙咀亞士厘道24-38號天星大廈地庫A舖

泰式燒烤

繼續係九龍城尋找美味既泰菜，今次呢一間叫毒式燒烤既都唔錯，水準依舊好味，雖然店舖細小，可是人流卻很多，星期五六日經常都需要排長龍。呢到有一樣好特別的，是有一種類似韓燒樣子的火鍋，不過我地最終都只是叫了普通的食物。

諗都唔駛諗串燒點少得，由於在座有一位唔食牛的朋友，所以只叫了豬肉同雞肉，兩者味道都好，可是賣相不佳，而且瘀瘀黑黑，減少了進食的意慾。

Beaujolais Nouveau 2010

其實今日先寫呢支酒，係遲左D，不過呢支酒每年都會大事宣傳一番，同埋賞味期有限，好值得每年試一次。

這支薄酒萊新酒係今年11月18日推出市面的，這支酒打破了一貫的紅酒知識，平時紅酒係需要經過陳年的，可是這支絕對不能陳年，一定要新鮮飲的，而且賞味期只有三個月。

beaujolais nouveau是採用2010年新採的GAMAY種來釀製，帶有豔麗的紫紅色澤，果香馥郁，由於單寧少，所以口感極度柔順，非常易入口，對一般唔飲紅酒的人都是一個唔錯既選擇。將酒冷藏至約攝氏 10 至 14 度，果味更香，效果更出色。此酒適宜配上口味清淡既芝士或食物，過於濃烈則不太適合。

此酒在惠康特價發售，只賣68一支，肯定為妳在聖誕節日帶上一份驚喜。

松記糖水

我相信好多人都一定聽過式食過松記糖水，因為呢間街知巷聞既糖水舖，由最初得一間舖，到現在都有幾間舖了，分佈在港布新界，佢既風頭一時無兩。那碗幻彩明珠直情係必試作品，未食過都唔係話去過松記。

幻彩明珠其實是一碗包含雜果、明珠、黑珍珠、涼粉於一身既雜果撈，但真正將佢地溶合在一起的，一定係那淋上面既芒果汁及忌廉奶，只要將以上所有材料醬汁混合，即變成一碗美味無窮既幻彩明珠啦，生果非常新鮮，又夠甜，明珠煙煙靱靱，有質感，另外涼粉都唔錯，芒果汁清甜，忌廉奶將整碗昇華，最重要既賣點係滿滿一碗，居然只係賣緊十幾蚊，任何一間甜品舖都唔止賣呢個價錢啦。

而本人最鍾意食既始終都只係芒果明珠，一碗已足夠當一餐飯，食完異常飽肚，而且仲有三大片芒果肉，十分抵食。

另外，要有咬口既一定首推琉璃，查實即係細細粒既水晶珠，呢款水晶珠並唔係周圍都食到，所以感覺好清新，不過食完，有時牙都軟，哈哈，但係都好好食。

黑珍珠同以上幾款其實差唔多，不過朋友偏偏鍾意佢既顏色，透明中間包著一粒黑色籽，清淡D可以試下我朋友既食法，加雪糕，唔加果汁，不過都要加奶，感覺唔錯。

其實不能不提，呢到既中式糖水，水準都有番咁上下，好鍾意食杏仁拼合桃，糊身夠滑，又唔會太杰，好驚食粥仔咁杰。

我覺得松記價錢平，味道又好，實在是一個好地方，等耐少少都值得既。

地址：銅鑼灣堅拿道西15號永德大廈地下G4-G5號地下

阿妹小館

阿妹小館呢個名聽落好老土，不過勝在親切。係土瓜灣呢個不斷老化既區內，俾到食客們一個親切既感覺。這店其貌不揚，十足十一間普過到不可能再普通既街坊食店，可是這裡既招牌菜就曾經嚮遍土瓜灣，一味鮮雞橫掃區內。

不幸的是鮮雞已成絕響，原因就係因為禽流感，再沒有新鮮雞賣了，始終烹調方法及味道不會走樣，所以冰鮮雞都整得好好味。到現在，還有好多街坊到來斬雞加餸，通街都係冰鮮雞同雪藏雞既時期，烹調味道已經成為主要因素。

雞皮有彈性，食落雞肉鮮嫩滑身，當然沒有鮮雞般可口，但都非常好，食時有陣陣咸味滲出，應該係處理雞隻既過程中，用左鹽抹勻雞隻，風乾，所以雞味出眾且鮮甜，雞皮脆口彈牙，好味。

呢到另一招牌 - 炸肉，係用煮熟左既五花腩先蒸，用鹽醃，再拎去炸，所以如果新鮮炸起時，皮係脆卜卜的，不過好多時預先炸起，所以D皮變靱，但也帶出另一種特別既質感，炸肉同切肉都鮮味十足，而且肉質好正，一層肥一層肉，層層疊著。

雖然這裡地方簡陋，不過真係吸引好多街坊到來進食，價錢十分經濟，沒有因通脤，大幅加價，實在可讚，這間小店仍十分關顧低下收入的市民，食飯有湯不特止，還有豆漿或酸梅湯，味道就見仁見智啦，不過實在抵讚。

地址：土瓜灣北帝街99號D地下

鹵八鵝店

前排睇完為食一條街之後，發現香港真係有好多潮式鹵味舖，係灣仔都有兩三間，其中一間就是鹵八鵝店，這間店舖細細，一到食飯時間，坐無虛席，門口常常排了兩條人龍，一條係等位食飯既，一條係排隊買外賣既，或者放工時，見到好多剛剛放工的人去斬料加餸，百幾蚊已經有滿滿一大盒。

這裡由鹵水雞鴨鵝之類既鹵味至豬既唔同部份都有，飯盒可以單拼，雙拼或三拼，價錢都係30-40一盒，加一個例湯都係5元，例湯好多都係我好欣賞既咸菜胡椒豬肚湯，足料抵飲。

呢到叫得鵝店，用既鵝當然係大大隻5-6斤重既獅頭鵝啦，肉質軟滑如絲，食落一d都唔鞋口，加上用幾十年既鹵水去鹵。鹵水汁精華經長年累月不斷累積，鹵出來的食物，都特別醇厚，唔會太咸，又唔會唔夠味，仲有一份鮮味在內。

平時Lunch時間經常去加餸，買四兩鴨舌黎食，雖然價錢唔平，不過都係值得的，鴨舌好肥美。另外，掌翼都有大細之分，大隻的掌可以有半隻人既手掌咁大，翼位長過一把普通間尺，兩者都好好味。

最近喜歡上這裡既沙薑雞，雞肉鮮嫩，而且咸味剛剛好，配上鹵水鵝肉，真係絕配。呢到除左雞同鵝之外，鹵水鴨十分抵食，40蚊已有半隻，件頭仲十分之大，足夠幾個人食。

唔可以食漏其餘鹵味，豬既唔同部份都好好食，有豬脷、豬手、豬大腸或豬頸肉等等，樣樣都好好。

除左普通鹵味之外，潮州人對鵝肝都情有獨鍾，佢地既鹵水鵝肝，好粉，唔會有多餘既臭味，推仲給唔怕膽固醇的人，不妨一試，話哂法國餐廳，一塊要百幾塊，呢到的，一個都係百幾蚊，雖然質素唔同，但係都十分美味，唔同煮法，當然有唔同既味道同感覺。

地址：灣仔春園街20號富國大廈地下C舖

禮記椰汁

前排見到少年食神講土瓜灣既美食時，佢介紹到一間賣椰汁賣左四十年既舖頭，今日特登番土瓜灣食飯，食完買支椰汁潤下喉。

這間椰汁其實真係幾好飲，不過我都唔係成日買，通常都會係冬天才買，原因係由於以前係夏天時，好多烏蠅周圍飛，所以唔會買，不過冬天則沒有問題。

椰汁本身唔太甜，老闆話要就而家時下既人既飲食習慣，已經將甜度減低，以前真係好甜的，不過真係好重椰子味，而且加入花奶更加滑溜，其實呢一杯椰汁係好冰凍架，所以冬天又有少少太凍，不過反轉係夏天真係透心涼，最重要價錢都係幾蚊一大杯，12蚊一大支，好抵飲。

地址：土瓜灣譚公道28號

芽莊越式料理

同久違既朋友食飯係特別開心的，今次相約於尖咀五支旗桿下，更有親切感。五支旗桿距離我地用餐既地方係最近的，這間位於海運大廈內的芽莊越南料理，由以前stone grill個入口入去，直行入去就到了，所以約左一個咁老土既地方等係有原因的。

芽莊越南料理無論裝修同陳設都好靚，店裡最裡頭，係一個無敵大海景，由於時間當時尚早，仍然看見一線線的陽光，真係夕陽無限好，可是一轉眼就轉換成一個美麗既維港夜景，對岸的燈飾悄悄地著起，形成一幅美麗的圖畫。

點了幾款野食，雖然份量唔大，但都足夠食。入座前，個個都話好肚餓，可是我地又不是點了太多食物，況且又唔駛等位，一點完d食物轉頭已經來到，最離奇的是個個都話夠飽，真奇怪。先上枱的是軟殼蟹生春卷，味道幾好，軟殼蟹炸得夠脆，沒有給生春卷的皮整淋，唔錯，內裡有米粉之類，填加飽肚感，而且賣相相當精緻，完全可以配合店內既裝修。

另外，叫了一個海鮮煎薄餅，除左一個貌似班戟的薄餅外，還附上一籃香草及生菜，自行給薄餅加上調味，加入了香草後，味道更加昇華。薄餅內夾著好多海鮮，一層薄薄既蛋皮包裹著所有材料，味道真係唔錯。

除左以上兩樣外，更點了一個好少食既沙律，就是炸魷魚青芒果絲沙律，各方平均都做得好好，青芒果絲的酸給人一種refreash既感覺，正好中和了炸魷魚的膩。

不得不叫牛油雞翼，呢到真係整得好好，好香牛油味，而且炸得好鬆化，一咬即散既脆皮外層，內裡仍然軟滑無比，食完仲想encore多一碟。

食左咁多炸野，都係叫了一個蔬菜，大頭蝦膏炒椰菜，菜裡頭加入了腰果粒增加口感，蝦膏辣辣地幾開胃，令到椰菜更加鮮味。

最後，叫了一個咖哩牛腩煲碑上蒜蓉飽作結，蒜蓉飽永遠都與咖哩係一對，呢款咖哩唔太辣，正好可以大啖大啖以咖哩伴食，十分美味。

呢到有極好既servide，全程waiter不斷同妳refill水，一見妳飲左半杯，即刻refill，而且個個都好有禮貌，有咩唔明都會同妳解釋，真係幾好，值得一去再去，不過如果可以book到窗口位就更加好了，全餐廳好像只有三張枱係窗口位，記住早d落booking。

地址：尖沙咀廣東道17號海港城海運大廈地下G51號舖

喜喜冰室

喜喜冰室係一間好特別既冰室，冰室呢個名字，係六七十年代好興既，不過現在冰室已成一個式微既行業，但香港興復古，所以某某美術指導就開了這間冰室，實行舊調新詞。

這裡既出品好多都係懷舊食品同飲品，飲品首推已消失係茶餐廳既黑牛、忌廉溝解奶等等，十分懷舊，真係諗起都想飲番杯。而食品方面，都有豬潤通、炸雞脾沙律及焗牛脷飯等等。不過講到驚喜，絕對是裝飾陳設，極之欣賞糖盒，因為所有茶餐廳都已經轉用砂糖或砂糖包時，佢地用回方糖，仲好整齊地排好，轉用砂糖係因為一來慳時間refill，二來慳地方，三來方便衛生。牆上既裝飾同擺設都有好多懷舊物品，而且仲特登整到殘殘舊舊，十分有趣。