泉章居

泉章居永遠都係我同一大班同學慶祝生日既好地方，原因十分之簡單，平靚正，食到飽飽都係每人百幾，多幾個大胃王都夠食，而且地點都係旺區，一間係旺角，另一間係銅鑼灣。

佢地既特色菜係鹽焗雞、梅菜扣肉、炸大腸等等客家菜。D雞真係幾好，夠入味，又夠嫩滑，而且份量都幾大隻，而家好多地方隻雞都細細隻，真係到喉唔到肺。

品香樓

大排檔已經慢慢係香港既生活內絕種，取而代之既係一間又一間既小舖頭，係南山邨內就有一間街坊餐廳，同埋簡直係城大人既飯堂，價格便宜，食物質素都幾好。

呢到D小菜做得幾好，而且又夠鑊氣，每逢下晝同夜晚，都經常坐無虛席，日日爆柵。我覺得呢到既咕嚕肉同避風塘豬手，整得好好食，仲有一個黃金魷魚，即係咸蛋黃魷魚，雖然膽固醇極高，可是真係忍唔到口。

Yogurtime

最近天氣咁炎熱，自自然然就喜歡左每日食完Lunch就去嘆番杯yogurt，呢間位於船街既yogurt店，每逢lunch時候，我都見到好多OL買黎當lunch食。

Yogurtime每日都有四種味道供應，Euro Tart, Vanilla and Chocolate係每日都有既。只有一種味係每日都更換，真係日日都唔同，我見過幾隻味，有青蘋果、焦糖吉士、藍梅、荔枝、香蕉朱古力、Pina Colada等等，聽講呢間店係有成100種味道既，遇到大時大節，可能仲有特別味道推出。

我食左咁多次，覺得荔枝清新得黎又唔甜，係夏天食，真係好正。反而個青蘋果味太重奶味，又唔夠酸，差D。Vanilla 同 chocolate 就好似軟雪糕，完全唔似yogurt。原味即係euro tart，呢個都唔錯。呢到仲有好多有特色既toppings，好似dry banana，煙煙韌韌，好得意，另外，mochi都好得意，仲有好特別既以色列椰絲糖，加埋落去都幾好食。

上圖係同事既錯配，荔枝配朱古力，大纜都扯唔埋，再加上chocolate clips，失敗左。

荔枝配euro tart，大家都酸酸地，好夾，白色一粒粒既係mochi，好似燸米糍，配合上黎好得。

chocolate banana配麥維他，飽肚之作，好重朱古力同香蕉味，不過太甜。

軟雪糕組合，朱古力配雲里拿，加上蜜糖脆脆，ok 的，不過一d都唔似yogurt。

地址：灣仔莊士敦道60號嘉薈軒地下3號舖

山頭火

久聞鰂魚涌既山頭火拉麵有幾咁好食，所以當知道 i-square 有時，就第一時間起程去試，雖然舖頭細細，但係等候時間都唔係太長。

當日試了幾樣野，覺得個日式撈麵好得意，因為平時都撈麵都係以冷麵為主，今次則以拉麵為題，配以一碗豉油湯底，感覺新鮮。麵條好彈牙，湯底都好鮮甜，不過就有一層油係面，但係食得拉麵都預左有層油，所以都唔係太介意，裡面有一隻糖心蛋，有d好似排骨既肉，實則似一碗排骨拉麵多d，整體配起上黎都幾好食。

程班長台灣牛肉麵

台灣牛肉麵係香港都已經存在左好多年了，由最初既既第一間台灣牛肉麵，至現在五花八門咁多間，不斷咁引入唔同地區既牛肉麵，而最新既首推程班長台灣牛肉麵。

佢間舖係好細，而且好擠迫，枱與枱之間，真係只夠一個人側住身行過，而且全店充斥著牛肉麵既香味，可是當你食完，就會覺得係一個唔好既味，因為你件衫已經吸哂d味。

牛肉麵加辣，辣度夠，麵條彈牙，可是湯底超級多油，可是香港好多人都接受唔到咁多油，因為一上枱，你會見到湯面泛起一遍油光。牛肉並唔係用牛展，佢應該係用左牛腩之類黎煮，味道都夠香濃，不過我始終覺得食牛肉麵需要配上大大舊既牛展肉，先係最美味既。

我另外亦叫了一碟飯，本來係想叫礦肉飯，但係居然無哂，我已經係晚上6:30去食，未到晚飯已經賣哂，係唔係真係煮得咁少丫，如果係，下次加番限量供應丫嘛。我碟雞飯係蔥油雞飯，佢地係飯上淋上佢地既肉燥汁，個味都煮得幾好，可是d雞肉無咩味，蔥油都吊唔起d味，所以真係好普通，好似食緊白切雞飯咁。

食完正餐之後，叫了榴槤班戟，味道好似滿遁，不過我覺得始終都係滿記好食d。總括來講，未食過，可以試，不過一次就夠了。

    地址：銅鑼灣駱克道463-483號銅鑼灣廣場二期地下                                      

北方餃子源

每逢一到Lunch時間，想係灣仔搵食，多人到插針都插唔入，而且好多舖頭都會趕客走，但偏偏好多間趕客走既都客似雲來。

皇后大道東尾既餃子源就係其中一間，如果你想係裡面有好招呼同慢慢食，唔好意思，你地可以轉地方了，事關呢到既老闆絕對有燥狂症，你可以一路食，一路聽到佢用上海話鬧人，有時仲可以見到D食客同佢大戰添，仲有你係無權自己揀位坐既，要由佢幫你安排，你話轉枱，佢真係會趕你走架，不過呢到絕對為你係一個平凡既Lunch時間增添好多色彩。

講回食物方面，事實上佢d食物又真係好吃，但係佢好狼死，事關佢全部都係湯餃，如果你想要煎餃，佢會做，不過每碟要收多八蚊，即係38蚊一碟煎餃。

呢到我覺得有三種餃係幾好食既，例如：鮮肉翠玉瓜、鮮肉芹菜同羊肉餃。翠玉瓜同芹菜，食落有甜味，芹菜餃仲散發出一種香味出黎，十分吸引。而羊肉餃就真係幾夠羊味，怕羶既千萬不要試，因為我本人怕羶的，可是呢到咁出名羊肉餃，點都要硬住頭皮食一隻，可是出奇地好味，好多肉汁。但係韮菜餃就麻麻地，我地叫左煎的，可是完全係炸囉，所以一d都唔好食，可以放湯會好味好多。

除左餃之外，好多人都會叫菜飯食，呢到基本上得三款菜飯，分別係炸豬扒(上海排骨)、手撕雞同牛展菜飯，我本人覺得三樣都好味，但手撕雞就比較遜色左少少，可能d雞好鞋口啦，同埋每碗飯都有一匙佢既秘制香料，少少辣，都幾惹味。碗飯份量都幾大架，食一碗配上一杯山楂水，真係好正，可以消埋滯。

真人真事：有一次去食，隔離枱其中一邊坐住一對母子，個細路得幾歲啦，佢好似唔係好想食咁，佢個媽媽唯有好快咁食完，餵仔仔食野啦，但係個細路食得慢，個老闆見到咁既情況，不斷用上海話鬧佢地：「食得咁慢，阻住哂d枱，快d走，出面好多人等緊。」呢段野講左好多次，個媽媽都唔好意思，佢已經好快咁餵緊個細路，個老闆鬧極都唔停，最後，見到仲有少少，直情叫佢地起身埋單走人，唔俾佢再餵個細路食，仲要叫佢下次唔好再黎。個個聽到都嚇親，野都唔俾人地食埋，仲叫人以後唔好黎阻住。

地址：灣仔皇后大道東259號地下

常嚐甜品

夏日炎炎，梗係想食一些冰涼消暑既野啦，常嚐甜品既招牌凍冰冰就係一個明智既選擇。

佢最近仲加左好多款味既凍冰冰，例如：榴槤冰、山竹冰同布冧冰等等，不過我就只愛食芒果，但係有個好得意既情景，就係發現次次食芒果冰冰都用唔同既芒果種，今次影相既係蘋果芒，佢用左半個芒果黎打冰，D冰打得好似雪葩咁，而且一入口，好冰涼，同埋好鮮甜，個冰冰成座山咁，有成一本書咁高。

栢檔去骨海南雞飯

近排又興另一熱潮，海南雞飯熱，近來間間都打正旗號係星加坡文華飯店出身，但係又有幾多間係做得係好食?

呢間就唔係啦，雖然無名牌係身，但係D海南雞飯都做得好好食。

三河屋

我好鍾意呢間係紅磡既小店，店舖雖少，食物種類就真係幾多。

比較少有既水雲酢、煎一夜干之類，不過講到最多人黎呢到食既野，一定係個三個飯，忌廉汁吉列豬扒飯、咖哩吉列豬扒飯，同我既至愛鰻魚飯。我次次黎到，每枱都實有以上既其中一個。

金田長壽司

金田長壽司係我最近成日都會食既一間日本舖，每日都好多人去食，而家尖沙咀都有舖頭啦，唔駛山長水遠入去食。

刺身價格便宜，但係質素高，新鮮肥美。每塊三文魚刺身都間隔均勻，可以紋理太密，如果d紋理疏d，會更加好，因為靚既三文魚刺身應該d紋理疏d。

清亭．燕萍

都有成個禮拜無寫過了，因為功課既問題，現在已經過去了，可以重新寫番。

咁多食物裡面，我細細個好鍾意食越南野，因為我唔鍾意食熱野，所以凍蒙係我其中一樣至愛既食物。

呢間食越南野既舖頭，係銅鑼灣黎講好出名，由最前身既越興園開始，到分開兩間舖頭，至現在合併一齊。真係由細食到大，以前會為左佢既牛油雞翼同鴨仔蛋，成日都要阿爸阿媽帶我去，不過真係好唔明白，點解細個夠膽食鴨仔蛋。

講番野食，越南小食都不外乎個幾樣野食，春卷、蝦餅同蒸粉卷，其實而家D水準真係無以前咁好食，只係普普通通。不過我就比較鍾意食牛油雞翼同炸田雞腿。

呢到既牛油雞翼同炸田雞腿就幾好食，牛油蒜蓉味香濃，炸得香口脆卜卜，除左呢兩樣，軟穀蟹都OK既。不過D粉漿好似厚左D，希望會改進下啦。

金邊粉都炒得唔錯既，不過味道又係普通過普通，豬頸肉乾巴巴既，好似一塊肉乾咁既，以前個D juicy感覺已經不再見了。

沙嗲算係燒得好架啦，成晚d野食，都係靠個醬汁吊味，再唔係就係太咸，唉，個飯就好似淡味左少少。連我至愛既撈蒙都無食到，因為已經無咩胃口，跟住既咖哩我都無食到，更加無理碟油淋淋既芥蘭啦。

呢間越南野都可以放棄了，咁多年感情，真係唔捨得。

地址：銅鑼灣謝斐道482號信諾環球保險中心2樓