金牌小龍

每逢想起小龍包，都必定是鼎泰豐，近來多了一間，就係金牌小龍了，雖然都係唔及鼎泰豐，可是卻是另一選擇。這店賣的食物同鼎泰豐都係差唔多，應該可以話係翻版。

食物質素都幾好，都係以叫點心為主，所以都係離不開小龍包、窩貼之類。今次叫了兩個冷盤，一個係醉雞，另一個係水晶蛋。醉雞同平常唔同，因為佢唔係以全雞或雞中翼處理，是將雞肉起骨再紮實浸製，所以比大多數店舖的味道濃烈，酒味好重，但從中都感到陣陣人參味滲出，可是卻沒有了原來應有既爽口彈牙的質感，肉質實實的。

水晶蛋又係另一估唔到之作，起初以為係燻蛋，點知一放入口，完全俾佢呃哂，係鹵水蛋，雖然味道不錯，甜生地，可是隻蛋好似係雪櫃岩岩拎出黎未解凍咁，食落有冰花，凍冰冰。

之後輪到熱辣辣既點心，先來的是金牌小龍包，皮薄多汁，皮層薄而唔易穿，湯汁好鮮味，肉餡做得好好，食完再想Encore多一籠。

蒸素菜餃則普普通通，覺得菜餡切得唔夠碎，香氣不足。雖然都係薄皮，可是菜餡唔夠好，影響了整個餃既味道。

全晚最好食當然要數另一招牌韭王鍋貼，煎得非常之好，一塊脆皮連著，皮薄餡料飽滿，煎得夠香脆，韭王味道完全提升左肉餡既味道，而且賣相好正，煎成一餅金黃色鍋貼。

但最令我感到出奇不意的是雜菌西蘭花，好好味，個汁煮得實在太好，鮮味十足，配埋索汁既西蘭花，實在絕配。

最後叫了原盅燉養生牛肉湯麵，麵同湯分開上，湯好鮮味，不過略嫌唔夠味道，內裡既一片一片牛肉，雖然牛肉軟稔，可是已經煮得無味。

整體味道幾好，實在是一間值得幫襯既小龍包店。

地址：銅鑼灣告士打道311號皇室堡304-305號舖

譚點 點心 - 甜品專門店

自從添好運榮登米記星之後，它帶起了點心潮流，賣點心既舖越開越多，再加上一d本身已有的老式茶檔，變成總有一間係左右，數量之多令人驚奇。今次並唔係講添好運，而是一間近期都頗為出名的點心舖 ~ 譚點 點心–甜品專門店。

它除了堅持做一些古法點心外，亦加入了不少創意，創出不少新奇的款式，令好多後生仔都對之產生興趣，新奇有趣的煮法亦令食物的味道更加深入。除此之外，甜品亦是這間舖頭主打之一，不過款式實在不多，只有幾款。

點心款式不多，大部份皆是傳統點心，不過其中一樣令我最深刻的，是那個燒汁煎封燒賣及脆皮蝦餃，無論味道同賣相都十分之好，那粒燒賣煎脆了底部，食落煙煙靱靱，好有咬感。而蝦餃則以炸芋盒的方法酥炸，食落亦都似炸芋盒般，只是將芋盒餡轉做蝦餃餡，但是亦因工夫繁複，好多酒樓已經不做了芋盒了。

蘭香麵家

蘭香麵家在佐敦只是一間唔太起眼的麵舖，位於柯士甸道的一旁，可是店舖提供的食物卻是馳名的很，主打三樣食材：雞腸、黑柏葉及冬菇。雖然這裡售賣的不止這三樣食物，還有很多食物可供選擇，每次經過時，看見每人都吃著以上其中一種，個個都食得津津有味，可是次次都不能進內品嚐，店舖內外皆是人，食一碗麵都要大排長龍，令我十分鼓譟。

前幾日，終於找到一個平凡的下午，店內有大約8張圓枱，只是有幾位客人，當然第一時衝入內霸個靚位食麵，周圍看了一看，全是報導它們的剪報或雜誌內頁，篇篇都大大隻字寫著雞腸、冬菇、黑柏葉，我當然不執輸，要了一碗冬菇雞腸麵，本來想要三拼的，可是又不覺得可以三拼，就是這樣，三款食物在我腦海內不斷搏鬥，最後勝出的就是冬菇及雞腸。

點了之後，阿嬸遞上了一小碟鮮味十足的黑豉油，目的是用來點雞腸的，麵上枱後，只見一大堆蔥花、雞腸同一隻隻超巨型的冬菇，隻隻都半隻手掌大，好嚇人。急不及待先試雞腸，果然非常之新鮮，爽脆彈牙，黏滿了肥膏，食落有鮮雞的味道，配上蔥花及特製的黑豉油，完全升了一個層次，非常美味。

上街食飯時，冬菇都只是細細隻，如手掌般大都是第一次見，開頭以為是鮮冬菇，可是又食到乾冬菇那份特別的濃縮味道，食落異常稔身及入味，真是招牌菜丫。湯底都十分鮮味，可是有一層油浮面，應該是雞腸的雞油溶了在湯裡，固此只是喝了幾口。

原來這碗麵外表看上去不是十分大碗，可是食完之後，又飽又滯，滿足至極。

地址：尖沙咀柯士甸路15號地下

甜蜜蜜甜品專門店

無黎甜蜜蜜都一段時間了，每次經過門口都咁多人，難得今次門口無咩人等位，即刻拎飛，但最終都等了30mins先入到去。一如以往，裡面坐無虛席，迫迫夾夾。可是這裡的甜品賣相不俗，吸引了很多客人幫襯。

炸香芒春卷配芒果沙巴翁係每次必叫甜品之一，個賣相都好靚，熱辣辣的芒果春卷點上凍冰冰的芒果汁，倍感美味，而墊底的沙巴翁亦使酸酸的芒果汁帶上了一點甜味，整體配合得宜。

法式焦糖燉蛋配脆皮雪糕球個名字好長，味道都一樣咁長久，脆皮雪糕球真係好好食，脆皮個質感好似食緊金莎咁，但係咬開後卻是冰凍的雪糕，個法式焦糖燉蛋，味道唔錯，可是感覺唔太滑溜，表面除了焦糖外，還灑上了一層糖霜。

黑白朱古力梳乎厘意思是朱古力梳乎厘配上朱古力醬加一球杏仁白朱古力雪糕，梳乎厘焗得幾好，好好味，而個雪糕球更加得意，味道十分特別，好軟滑。

最後上枱的是心太軟配雪糕，呢個甜品基本上去親邊一間都會叫，一來朋友們都喜愛朱古力，二來一見到朱古力漿流出那一下，真係令我垂涎欲滴。這個味道都唔錯，可是都要等好耐。

雖然水準比以前差了，但係尖沙咀甜品界都有一定地位，如果唔係就唔會日日都要排長龍啦。

地址：尖沙咀厚福街5-6號地下2號舖

Cafe Marco (甜品篇)

最後當然食甜品啦，這裡的甜品款式都算多，夾雜著多國甜品，西式、中式、日式同泰式樣樣齊，味道不俗。除了甜品外，更加不少得雪糕櫃，大約都有8-10款雪糕可以選擇，而且牌子仲係Hagendez及MOVENPICK，味道當然勝過好多酒店的雪糕。

甜品亦都有分大盤、小杯、一口Size同原個蛋糕俾客人選擇，就現場所見，大部份人都對大盤沒有太大興趣，最多都只是那個朱古力蛋糕，其餘都不是太多人去食。反而小杯裝甜品則勝一籌，侍應不斷refill，當然多客人食啦，細細杯，做得都相當精緻。

先試至喜愛的crumble先，這間酒店並不是以apple做主餡，而是改用了peach做主餡，味道會略有不同，比起apple crumble 少了那份酸味，多了一份甜味，本人不太喜歡。

杯裝芒果布甸看上去好像十分美味，可是卻相反，芒果味道不是新鮮的芒果做的，像是用了罐頭芒果般，質地都算滑溜，不過不失。

白酒啫喱賣相得到我們一致讚賞，朋友們說白酒味濃烈，有些過苦，我沒有品嚐，不願置評。

紅桑子杯評價不錯，唯一可挑剔的是有點過甜。而日式和果子則味道清新。

忌廉泡芙是其中一樣好好食的甜品，可是朋友們都不願嘗試，因為他們說這是惡魔食物，食一粒會等於食幾杯甜品，所以全部放棄了，只能嘆他們走寶了。

還有一件甜品好好味，亦是差不多9:00才出爐的甜品，那個apple pie，酸酸甜甜，熱辣辣配上凍冰冰的雪糕，真是十分美味，雪糕用上入口似藥水味，慢慢溶化後變果仁味的開心果雪糕，絕配。

食完這些精緻甜品後，都飽了，可是雪糕實在吸引，再次打開肚皮繼續進食，朋友們都悉心為他們的雪糕裝飾，好像佈置一樣，左邊一堆栗米片，右邊一堆生果粒，頂上灑了一些朱古力薄片，每一杯都美輪美奐，活飲一件件藝術品。但我則比較樸素，只是要了cone來食我至愛既雙重忌麻雪糕，入口非常幼滑，濃郁的奶味加上少少焦糖的甜味。

最後，以一杯檸茶作結，朋友們各有所好，奶茶咖啡樣樣都有，杯cappucio都整得唔錯。覺得是晚最出色的一定是甜品雪糕環節，其餘則不過不失，但係以超優惠的價錢則作別論，在這裡多謝今次的大老闆E先生。

頭盤篇：http://hk.myblog.yahoo.com/zysk-c/article?mid=1587

熱盤篇：http://hk.myblog.yahoo.com/zysk-c/article?mid=1588

地址：尖沙咀海港城馬哥孛羅香港酒店1樓

Cafe Marco (熱盤篇)

頭盤過後，轉攻熱盤，可是行了一轉，唔覺有咩好食，但驚見有豬腳薑，在一大盤內尋找了良久，再發現了一舊豬手，這舊豬手真是極品呀，成盤都一兩舊，可能我遲拎，之前俾人拎哂，但又無可能丫，有咩理由食自助餐會多人去拎豬腳薑食，這舊稀世珍品味道唔錯，不過D醋唔夠味，無薑味之餘，亦唔夠甜，只有咸味。另外，試了一小片鴨胸，十足十街邊的小食，普通到不得了。

行過烤爐，見到一排排粟米、燒雞同羊膝，即刻向廚師要求一隻雞脾，佢即時在烤爐取出燒雞並切了一隻雞脾給我，味道唔錯，用粗鹽醃雞，雞肉變得嫩滑，外皮鬆脆，好正。

燒牛肉總其食了兩次，第一次肉質好，不過無味，第二次有驚喜，味道濃郁之餘，肉質都算好，有肥膏，有血水，只是比第一次過熟。可是身為一間酒店，可以咁無水準，舊舊都唔同味，一舊淡到無味，一舊濃而有味，真難得。

接著要批評的一定是那盤燒三文魚，可能我遲食啦，成盤三文魚唔香之餘，亦是凍的，感覺是沒有放在暖爐上，凍了的三文魚，有股腥味，醬汁都不能完全遮掩腥味。

食了兩轉熱盤後，又一驚喜，發現了涼拌鮑魚，即時拎了來食，每一小份都有半隻鮑魚，味道鮮美，下面墊著的中華海草都好好味。

最後，食了每位一份的日式蒸蛋，這個好食，從觀感上，這味蒸蛋過老，可是一放入口卻異常嫩滑，清清淡淡，味道唔錯，杯底還有半粒帶子。

頭盤篇：http://hk.myblog.yahoo.com/zysk-c/article?mid=1587

甜品篇：http://hk.myblog.yahoo.com/zysk-c/article?mid=1589&prev=-1&next=1588

Cafe Marco (頭盤篇)

呢個季節，可能好多人都話去BBQ呀、打邊爐呀、蛇羹之類，但係我就偏偏覺得要去食自助餐，因為呢段時間生蠔又肥美、又好味，去蠔吧食都成五六百蚊，但係自助餐只係三四百蚊又任食，而且蠔既質素都非常之好。

雖然蠔吧款式多，亦夠新鮮，但係正所謂一分錢一分貨，對於我地呢D卑微既打工仔，一餐五六百蚊既，真係好高消費，唔係咩大時大節，都唔會特登去，能夠俾三四百蚊而可以無限量食蠔，真係賞心樂事。現在好多酒店既自助餐都為左吸引客人，慢慢轉向供應即開生蠔，而蠔既質素都比以前有所提高，有些甚至供應幾款生蠔俾客人選擇，讓客人可以品嚐到唔同地方唔同水域既生蠔。

Café Marco這間可算是例外，相比起之前食過既自助餐，這裡的生蠔是預早開好才拎出來的，並不是現場即開，可是都非常新鮮，而其餘食物款式不是太多，每類食物都有幾款，並不是太多選擇。

先講冷盤，海鮮吧款式OK，有生蠔、長腳蟹、翡翠螺、大青口同龍蝦仔，款式算齊備，可是除了對生蠔同翡翠螺有興趣之外，其餘都是少嚐。生蠔先前所講不是即開，可是都算新鮮，而且隻隻都肥美飽滿，可是我略嫌太過肥，食落太過Creamy，食得多，好滯，但呢到既cocktail汁實在十分出色，好好味，我覺得配上coctail汁可以減少飽滯感。

翡翠螺異常大隻，足足有大半隻手掌咁大，非常鮮甜，食多幾隻都已經夠回本。長腳蟹都好鮮甜，不過蟹腳的Size好參差，時大時細，細時可以好似花蟹咁細，大時可以長過隻筷子。青口係我所見之中最大隻，隻隻連殼時，大到成個網球咁大，嚇我一跳，整體海鮮都算ok。

另外，沙律方面都有幾樣選擇，不過唔知點解d生菜好苦，食左兩啖都無再食了，醬汁方面都好多，有意大利醋汁、千島汁、凱撒汁和紅酒汁，仲有好多唔同味道既oliver oil揀，呢一方面唔錯。

而凍肉方面，有煙三文魚、煙青魚和ham等等，質素普通，煙三文魚唔夠油分，ham就唔好食，唔夠咸香，好似無咩味咁。相反地芝士質素唔錯，款式都有幾款，最鍾意Brie芝士，夠軟身，夠味道，搽在餅乾上，十分好味。

餐湯都是分了中及西式兩種，見到中式湯比較吸引，即時搯了一碗，西洋菜陳腎湯，飲落都有火喉，味道OK。用了每枱都會奉送的即焗有機麵包伴湯同吃，麵包外層香脆，內裡鬆軟，搽上牛油，十分滋味。

刺身櫃的刺身完全俾師父糟蹋了，唔知道係唔係要不規則切出來會滋味d呢？可是係出面食咁耐都未見過好好地一條魚生，會切到無一塊係正常形狀或三尖八角的，一望落去都會覺得唔好食，其次是那些劍魚望落似鱆紅的，完全分唔出係劍魚，食了一轉，已經無心情再食，轉而攻熱盤。

熱盤篇：http://hk.myblog.yahoo.com/zysk-c/article?mid=1588

甜品篇：http://hk.myblog.yahoo.com/zysk-c/article?mid=1589&prev=-1&next=1588

鳴門壽司串揚料理

日本菜係香港實在十分普遍，成街成巷都有，除左明將外，我都未試過一間食完話唔會再有下次的，其實已經唔止一次俾機會架啦。鳴門這間店舖職員態度已經唔太好，仲要食物質素麻麻，價錢又唔係平，客人已經唔多，真唔明點解仲可以生存到。

九龍灣MEGA BOX 開了JUSCO，為了到那裡的日式雜貨店買禮物。買完之後，行勻全商場都唔知想食咩，屋企人偏偏要揀呢間，我都已經講左唔好去這間，再一次既不滿就這樣出現了。

沙律燒牛肋骨飯，在視覺上都好像樣，可是偏偏就係嗅覺同味覺上出現了偏差，一上枱已經聞到了一股濃烈的燶味，這是因為將沙律醬燒烤的味道，感覺太強烈，唔太好，有輕微味道都可以接受，可是實在太強勁了。輪到味覺，味道尚可接受，可是隻汁太甜，最重要的是呢碗唔係湯飯，飯量都已經唔係多，仲要俾半碗汁浸住，隻汁又太甜少少辣，真係食唔落去。

海港凍肉

聖誕節特別多Party，以前黎黎去去都係叫快餐店到會，大家樂、Pizzahut、KFC或茶餐廳等等......但呢一兩年刺身、自煎羊架和牛扒漸漸開始成為Party食物，香港賣雪藏凍肉既公司越來越多，海港凍肉就是其中一間擁有四十年歷史的凍肉舖。

這裡售賣的食物款式多，價錢實惠，比市面平起碼20%以上，食物可以係雪櫃自己拎，如果要大量的話，可以同店員講，等佢地執俾你，所有食物都好好味。

推介帆立貝刺身，大大粒，解完凍，打橫片一片，又鮮甜，又爽口，十分正。

公和荳品廠

公和荳品廠呢個名字，永永遠遠都係我腦海中飄浮，當小時候第一次接觸這裡的豆腐花時，已經深深刻劃在我的記憶內，那份滑溜溜的質感、那充滿黃豆的香氣，每次一想起，即刻有股衝動去食。

雖然公和的分店開到成行成市，可是偏偏只有深水埗及九龍城兩間做得出那份味道，古舊的裝修滿載了歷史的痕跡，九龍城店位於新興既西餅同曲奇店對面，兩者形成了一個強烈的對比，一新一舊，可是兩者都是整條街人氣鼎盛的店舖。

先來一碗熱豆花，望住這碗帶微黃的豆花，震下震下，十分生動，阿姐搯豆花的技術可見一班，一大片完整又滑溜的豆花擺在眼前，加上少少的黃糖，實在非常美味。豆花非常滑溜，一啜入口，已經直入喉嚨，豆味豐富。

Happy New Year!

話咁快就到了2011年了，呢個Blog都已經差不多有半年了，多謝大家既支持，黎緊呢一年，我會為大家帶來更多好味或抵食既推介。

如果大家都有d正野食，歡迎大家留個言或send個email俾我，分享一下。