又係又一城既舖頭呀，今次呢一間係最高個層，以前麥記個位，不過好多人都應該唔記得以前麥記係開係個到了。佢就係Simplylife Cafe啦，女仔會去食多D，男仔應該都比較少，原因好簡單，因為份量少，會食唔飽，但係又好好食。
Lunch有Set揀，分(1)主菜+飲品，(2)主菜+飲品+湯/甜品，(3)主菜+飲品+湯+甜品，價錢好似每樣相差$10。主菜大約每日都會有十款，飲品每日都唔同，好好食既漢堡。
2010年7月23日 星期五
2010年7月22日 星期四
Amaroni's Little Italy
又一城係一個好地方，又多好野食，Amaroni's Little Italy絕對係其中一間，平靚正，每人百幾，可以食到好飽。
大家去到呢到，d waiter 就會放低一籃麵包，香草包配上黑醋同橄欖油，係提升餐前小食。
2010年7月19日 星期一
Cafe Marco
講起自助餐，真係特別開心，因為款式多，可以試多幾樣。亦因款多既關係，永遠都係聚餐既首選，因為唔駛怕呢個唔食呢樣，o個個唔食o個樣，係都只是怕價錢問題，不過既然係聚餐，大家都應該唔介意一次半次既。
今次係去馬可孛羅酒店既Marco Polo Cafe，呢個buffet既評價都好多，價錢大約係388一位，但係同事有coupon既關係，好似係有65折，所以價錢平左好多。
現在去，仲有煎大虎蝦同即焗有機麵包送，雖然係自助餐，但係呢兩樣野係無得任拎既，虎蝦蝦肉結實，煎得好香，只可惜既係每位一隻，如果有多d就好了。
基本上，食得buffet既人都會主打冷盤海鮮同魚生等等，呢到既冷盤海鮮都只係得d蟹腳、翡翠螺、生蠔等等。而魚生都只係得三款，大路既三文魚，八爪魚同立魚。講起d生蠔，好多間buffet都已經唔再供應，真係唔開心，呢到有生蠔供應，令我都有少少期待，不過黎到之後，就有d失望。生蠔唔夠肥美，refill速度慢，質素參差，相比旁邊佢供應既生蠔cocktail失色不少，cocktail有兩款，一款係bloody mary，另一款係volka。味道我就覺得volka個杯好食d。
其他冷盤就普普通通啦，d prama ham 就一d都唔好食，得咸味，咩肉味都無。不過d芝士反而幾好，種類唔多，但係味道好。
講到熱盤，種類就真係唔算多，可是呢到既燒牛肉，真係好食到不得了，比起其他扒房，呢到真係高出幾班。生熟程度剛剛好，肉質鮮嫩，味道又岩岩好。配上英式芥辣，真係回味無窮。
呢到另一個賣點，可能就係d甜品，款式多，味道好。雪糕係用上Movenpick同哈記既，裡面有一款叫summer berries，真係食極都唔厭。雪糕櫃前仲有幾十種配料俾妳加上，唔用杯食，又可以用con食，真係特別多花款。甜品細細件，方便進食不特止，仲可以樣樣試勻。
平時都唔會影食前既樣，但係唔知點解覺得呢到一定要影，無錯，係因為佢有提供筷子，平時呢d都係擺係魚生旁任拎既，但係呢到居然每位客人都提供一對，真係幾細心。
總括黎講，不過不失，偶有驚喜，對於燒牛肉同甜品，呢間真係高質素。
地址：尖沙咀海港城馬哥孛羅香港酒店1樓
滬江大飯店
香港眾多提供滬菜既舖頭裡面，滬江係我好鍾意去既一間，可能一來價錢唔貴，食物質素又有保證，而且每逢蟹季到來既時候，又有套餐食，相當經濟實惠，抵食。
呢到有D菜式係需要預訂既，例如：豆腐餃子，因為製作需時，要提早一天預訂。
冷盤類都離不開個幾種，而我就喜歡醉鴿，仲有雞絲拉皮同肴肉。醉鴿幾入味同嫩滑，之不過個肴肉始終唔係我相像中那樣，爭少少，可是又講唔出o個種味道。
冷盤之後，叫了一個蘿蔔絲鰂魚湯，味道好鮮，雖然呢個湯好簡單，但係個份鮮味真係不得了，十個人每人都分到一碗仔。
辣子雞同外婆紅燒肉就必須要試，奉勸一句，食唔到辣既唔好叫辣子雞，因為每塊雞都充滿辣粉，而外婆紅燒肉就比較甜，但係味道係好既，一下子已經食完。D熱盤都做得唔錯，回鍋肉同蔥爆牛肉都係OK貨色，配埋個菜飯，真係好正。
今晚既主角出場了，響鈴火腿夾包，用一塊包皮夾著一塊用蜜汁煮過既金華火腿同一份炸得脆卜卜既腐皮。每次食都開心，不過對於食多多都唔夠既我，最好一人有幾件啦。最後個炒飯真係好大碟，夠乾身，可是味道略淡。
雖然價錢唔係貴，但都比出面既貴一至二成左右啦，同埋都好多人食，次次都要book定位。
地址：銅鑼灣勿地臣街1號時代廣場13樓1303號舖
2010年7月18日 星期日
Paul Lafayet
今日路經K11，突然諗起好想試下個Cream Brulee，所以就去搵啦。嘩，呢間野真係好難搵，以為佢係AWFULLY Chocolate 隔離啦，點知又唔係，我轉黎轉去，行去條冷巷先搵到，激死我。
其實間舖頭又唔係太細既，不過佢擺左幾張椅子俾人坐係到食，攪到好似好迫咁。
一入到去，D 店員好nice，不斷笑住咁問妳需要d咩，望住個甜品櫃，真係好開心，d macaron 真係好靚，好可惜我只係想食cream brulee，今次無緣去試其他野。
每個cream brulee 係即燒既，order完，佢就會係你面前燒，感覺好新鮮，哈哈。
甜度剛剛好，唔會太甜，真係好出色。
地址：尖沙咀河內道18號K11購物藝術館G23舖
Pumpernickel
呢個食店絕對係值得去試既，不過只適合兩人去食，因為呢間位於天后既舖係好細，得幾張枱，去前最好留定枱啦。
呢到既麵包好出名，而且都好好食。今次黎到呢到，有款Pasta俾人揀，基本上價錢都係7X-9X左右，加多2x可以有麵包、湯同餐飲。是日有兩款湯，忌廉同南瓜湯，味道好好。之後有每人兩件蒜蓉法包，一件係法包，一件係五穀包。
主角出場了，先黎係我那碟豬柳牛脷忌廉長通粉，真係好食。另一碟係菇菌忍廉菠菜麵，同樣地都好美味。價錢加加埋埋都係一百左右一個餐，值得。
地址：天后琉璃街1號A
榮興小廚
一向都知道灣仔既美食到處都係，榮興小廚係我成日都聽見既名，好多人都話佢地D小炒好出色，前排就同同學一齊黎品嚐一下。
呢到都有好多招牌菜，有朱洪武豆腐，馳名蔥油雞等等。今次黎到呢到梗係試下佢地馳名野啦。
先黎一個朱洪武豆腐，係將一件豆腐切開，中間夾有一塊咸火腿，再拎去炸，再煮。味道真係幾好食。反而個蓮藕餅就爭少少，我覺得係我個日既野食裡面最唔好食既。
之後仲叫左幾樣野食，有干煸四季豆啦，菇菌煮菜苗同雞蛋炸魚腸。個四季豆雖然睇落好乾爽，但係都覺得唔夠乾身，差少少啦，味道搭夠。另外個兩個都好好食，個花甲好惹味。正！
終於到主角出場啦，蔥油雞，燒得脆卜卜，再配上碟上既蔥油汁，簡單就滋味無窮啦。張相影得唔好，睇落好似好差咁。
最後叫左兩碟飯同麵，一碟係濶佬炒飯同XO醬豬頸肉炒河。
總括黎講，味道好食，價錢實惠，每人百零蚊已好飽肚。
地址：灣仔船街7號寶業大廈地下至1樓
天與地中華料理
天與地中華料理係位於尖沙咀諾士佛臺既一間，佢都係屬於某某大飲食集團既，西式既裝修同配上中式既菜式，感覺舒服。
佢既菜式基本上係一間多個地方既中國菜，滬、京都有，其實簡單D講句，呢類餐廳就係外國人對我地中國人既睇法，以為中式料理就係同一種。哈哈。
先黎三個小食，一個係臭豆腐，不過切得好細粒，另一個係鹽水鴨胸，最後一個係春卷。臭豆腐雖然細粒，但係都做得OK既，個鴨胸普通啦，而個春卷，我就唔記得係咩黎了，不過都幾好食。
食完小食之後，就叫左一個黑醋桂魚，我對呢個有少少意見，雖妳炸得靚，不過只得半條，唔係咁大體啦，價錢都唔平架，都成128半邊，餐牌無寫係半邊架。
隨之而來既係一個怪味雞同魚湯菇菌浸菜苗。兩個都好食，個怪味雞，有D似山東燒雞變奏版，味體OK，炸得都好好。
最後梗係叫個甜品食下啦，炸鮮奶。個汁得得意，唔識形容，不過有D似京都念慈庵既味，哈哈，有D MINT味。
整體黎講，都好食既，不過D份量真係好細。好岩D 幾個女仔去食，可以試多幾碟，飲下野，傾下計。
地址：尖沙咀諾士佛臺6號地下及1樓
訂閱：
文章 (Atom)
